¹ Nang Paulo karik Timoteo, ohoigyemak ho Kristo Yesu, d'ohothing fodok hotho Filipi hesarahini arakang ara ho Kristo Yesu, ohothing hengengelak egyemathik karik ohoigyemak dimaji h'ehuma. ² Alwahio thoiwona dothai karik elik n'ahap th'Ojok Omonye lohothai karik Ohobu Yesu Kristo. ³ Afurak nang Ojok hindang ahinywarang diyuuhina hohoi. ⁴ Awon nang h'amuno dimojo thoithai ditha omojitha hundang. ⁵ Afurak nang ithai ahinywarang d'asuduhe nathai n'evanjelio th'ofaning oithabothe lwai d'ofaning l'ahanana. ⁶ Arami hune ayenio nang dara laculuyo egyema nayyu obothok de ahani dingohina lwai d'ofaning lo Yesu Kristo. ⁷ Obis do nang diwonan ahana thoithai anyo, awon nang hothai dithaji honang. Ewonderek ithai ara ohoingarak hundang. d'alwahio hindang difitha karik dikayo h'ethakolyo n'evanjelio. ⁸ Ojok inyong ingengelak nang, angai awak nang kodyen ithai thoiwona h'amolye ho Kristo Yesu. ⁹ Nang lamojo ahana: amuno nathai thoboloro dith'atehan karik athenuna. ¹⁰ Amojo nang th'arami thohune diruhu ithai aning nayyu tholohide ayiji karik dinyahi ithai arami hadiri kwong omorit d'ofaning lo Kristo. ¹¹ Amojo nang dang difut ithai th'ahayo thah'abisan naindu tho Yesu Kristo d'ethabolorio karik efufurio n'Ojok. ¹² Thenene ne, awak nang ithai thoteha, olarok, hijan aning nafuk donang isarak evanjelio thoyilo ahithemi. ¹³ Diinduna iwonana ahani, athoritha hundang ditha ho Kristo ofuni th'afangan thalathatha ahang nekeye karik d'ohothing fodok. ¹⁴ Iruhi olarok holwa d'Ohobu th'efitha thohindang, karik owoni h'akolon dicama arami kwong abangi. ¹⁵ Owoni ohothing holwa hocama arami ho Kristo dindak th'ahayiini karik th'angalafa, ocama dang homok thayiji. ¹⁶ Ihandyo hothoholu hulya th'amuno, otehi hijan isarahini nang dine dikayo evanjelio. ¹⁷ Ti, ocama ohoithemok hulo th'arami thoho Kristo th'engaru, ikara th'arami th'ahadiri. Ojori ngona ofonik isong de ethathacana hindang, ahibu nang efitha. ¹⁸ Ya ainyong ti, ne? Thoyihothik fodok owoni ahanya, dia opwang dia hadiri,. athuhi anyahina ngai Kristo. Amuno nang th'arami thohune. Aa, karik amuno nang de. ¹⁹ Atek nang hijan thoyihoi tholya de ohohini nang th'omojitha thohothai karik alwahaio n'Ohoile lo Yesu Kristo. ²⁰ Owoni de iring nawaharik nang ainyong de oindu iwonan karik eyiihi nang hijan awang nang de ahu oju, karik dang owon de akolon, thenene iring no juii, ithahuye de Kristo dihwan honang, th'esu dia th'aye. ²¹ Do nang esu inyong Kristo karik aye arimahina n'esu. ²² Ti, ara awon nang ara othulo, orwang iring ijan olwahu nang de egyema. Ya nani de anyimu nang? Awang nang atek. ²³ Atidahunu nang dihiji h'asang arehai. Awahan hindang kodyen aden karik awonan ho Kristo, nelak ayiji, ²⁴ Ya ti, apwahan ara othulo osiru th'ahwandek thahathai. ²⁵ Atehan hijan arami hune ahani, atek nang hijan arasa nang de hothai fodok d'afwan ahithemi karik amuno ditha eruk. ²⁶ Dara ditha honang, diwon ithai h'ahu nethadararik ditha ho Kristo Yesu, ara nang laindu dothai koti. ²⁷ Isukathi thoyihothik thah'evanjelio no Kristo dara ara nang laindu ithai itihyo dia awang nang, dethaningu nang thoithai hijan iwoitha ithai ara nako ditha Ohoile Aboithe, ahu aboithe diribo amaji aboithe th'eruk than'evanjelio. ²⁸ Hoibangatha ongarehio hothai. Ethamijani ne n'engohunu nasong, ti, ithamijani nalwahununa nathai - karik naindu th'Ojok. ²⁹ Atha athuhi ahorihina dothai th'ofure tholo Yesu, ikara th'eruhon donyong ti, karik dang th'ethathacana th'ofure tholonyong. ³⁰ Awonan h'angica narwang iring netehu ithai donang, ara ithai dang ithayiru ditha ho nang.