¹ Yakobo, Ohoigyemani l’Ojok karik l”Ohobu Yesu Kristo, d’amukoko tomon larehai dith’athurohunu. Emanda! ² Iduhuna ara amuno fodok, olarok hundang, ara iwon ithai hethathacianitha olwarai hekela. ³ Itek ithai hijan iyanu ethemyo n’eruhon nathai amanya. ⁴ Amanya ditha h’eruhon, thoingohi egyema nanyong, diyyu ithai bukulung ara ithai ithuba, ara hang aning neyangyo. ⁵ Ti, ara owak lobo thothai olofioro, thoifiye inyong th’Ojok, lesarak ija kwong eringyo d’ohothing fodok hoifiyo, isarak de dang inyong donyong. ⁶ Ti, inyong thoifiye ditha h’eruhon, kwong eririhitha. Aca, d’othulo leririhitha ojahitha ahari hepongaitho th’ahomwa dith’ahari nahitto karik asullaru arabo arakang. ⁷ Othulo lya thaang hoigigiloi hijan ifothu inyong de aning nabo th’Ohobu. ⁸ inyong lo othulo leririhitha, aang owetha ara loko d’oyihothik honyong fodok, ⁹ Olai lowon dihap, thoitharai th’amaji thananyong thanawon dihide. ¹⁰ ti, othulo lobara l’amaji nanyong nothohop, anyo, olo de adi iriing athuyathi nothoth’omiyang. ¹¹ Aca, ittoru oholong ara lonok, karik ethayohojyo amiyang. Odou athuyathi dihap, ara alibori nanyong alitho. Th’oyihoi tholya aboithe olitho de ohosomani dihiji h’oyihoi ladaha nanyong. ¹² Othulo lolang ethemitha, thomunoi. Aca, ara athuk inyong alangan ethemitha, ifothu de olohuluk n’esu, nathuhi esarahina arakang ara n’ohothing hamuno Ojok. ¹³ Lobo thang ijara ara inyong lethabuyangie, “Ojok lothemyo nang.” Anyo, aang Ojok othemyo th’amonyori, aang dang ngonyena Ojok othemyo othulo lobo. ¹⁴ Ti, othemye othulo, th’awahan thanyong, nethangaru inyong karik ewuwularu inyong arakang. ¹⁵ Ajara thiya, diholu hawonan n’egigilo ne dihu honyong, ayisu eyau, ajarara eyau ne abolo, ayisu aye. ¹⁶ Hoiruhotho ethadwala, olarok hundang homunoi. ¹⁷ Esorio nanyyu karik nathenunu, esorio ne naindu th’hide. Oindu inyong na dihap th’Omonye l’afangan. Honyong, aang eloyicio dia obibile l’eloyitho. ¹⁸ Anyimu Ojok ayisuna ohothai th’ocame tholo eladiri. Diwon ohothai ara ohayocong ohoithemoni l’asang food hayeu inyong. ¹⁹ Itek ithai arami hune, olarok hundang homunoi. Othulo, thoithairye, thocamai karik engere tiibai. ²⁰ Aang engere n’othulo ohorik inyong abisan n’Ojok. ²¹ Inying na, iduhu adi eruji karik abolori n.amonori n’eyau. Ditha elamuha, ifothuna ocame ledula ditha hothai, locohi ethalwahuna ohoilehio hothai. ²² Iwonatha ara ohihandak h’ocame, ikara ohoithayirak, ethadwalyo ahwandek hathai. ²³ Aca, ara ithayiryo ocame, aang ihandyo aning nabo, ojahitha othulo lengengelyo ahomong dith’engengelit. ²⁴ Ingengelyo ahwan nanyong, alo adi, okworok kwak angai dwo oya inyong. ²⁵ Ti, othulo lomijyo tuhudik d’oyalu l’athenuna n’oyaitha, amattak diya, ikara ara ohoithayirani lokworo, omuno de othulo lya ditha egyemathik hanyong. ²⁶ Ara igigilo othulo lobo hijan inyong lo l’eruhon, aanghogotterek ongadiep lonyong,inyong lo dithadwalyo othaji lonyong, esarak eruhon nanyong awonan ara amonyoroni. ²⁷ Eruhon aliboroni, naang ithorohoja dihithemi h’Ojok karik Omonye lohothai, inyong alwahio d’ohohino karik aharathak ditha ethathacianitha hasong karik dinfaitho ahwan ara naang ahap ithabocyo.