¹ Nang, ohoifithani l'Ohobu, lanyahi ithai thoiwona ara ohothing hosiru d'oilongit lonya ilongorik ithai. ² Emimingak nang ithai thoisukai th'alauna ahwandek karik angnongio, ara ithai imuno ahwandek. ³ Ihandyethe aning nacohi hothai ehandyo diwon ithai h'asuduhe n'Ohoile th'elik than'ahwandek karik n'ahap. ⁴ Owon ahwan oboithe karik Ohoile aboithe, iring nanya ilongorik ithai ditha hayenio n'elongo ithai. ⁵ Karik owon Ohobu aboithe, eruk aboithe, Abatisimo aboithe, ⁶ Ojok aboithe karik Omonye l'ohothing karik asang fodok. Ojok Omonye tholohide asang, thal'asang karik dith'asang fodok. ⁷ Athuhi esarahina othulo aboithe th'ohothai thoityenie alwahio, iring abolori n'esorio no Kristo. ⁸ Iring najararik amaninihio halwa: "Adohan nanyong nya dihide, adiroro ohoifithak difitha, karik inyong esarak esoritha d'ohothing." ⁹ Ainyong ojo, "Adok dihide," arahari ajan ecuru dang di hap? ¹⁰ Inyong lecuru di hap inyong lya dang aboithe lodok dihide tholohide h'ahide, dithafuthak inyong asang fodok. ¹¹ Esarak Kristo homok ara ohifak, homok ara ohocorok, homok ara ohoithamojok karik ohoithayeyenak. ¹² Esarak inyong lo ohoigyemak hulya thoihuhumye ohothing honyong hodwa d'egyema n'alwahio diduhorik ahwan no Kristo. ¹³ Obothok inyong lo ara aduho n'athwa no Kristo lwai ohothai edwongon d'athuna, atehan n'Olonyi l'Ojok karik dang debi edwong d'athemit n'efuthan no Kristo. ¹⁴ Oduho ohothai Kristo dihide, daang ewon iring okalifinok hethalacyangyo ahomwa n'etyenathik hekela karik ohongitha h'odwalak. ¹⁵ Kombwo acama eladiri ditha h'amuno. isarak ohothai thoboloro th'oyihothik fodok ditha honyong, lowon ara ahu lo, Kristo. ¹⁶ Oduho Kristo ahwan fodok, d'othuna awon ara aning aboithe. Ara igyema oyirik lahwan ara aboithe h'ahwan, isarak ahwan thoboloro aduho ahwan nanyong dith'amuno. ¹⁷ Th'arami thohune ajo nang, nang emimingak arami hune d'Ohobu. Hoinyahatha esuka iring ohothing haang owoni ara Ojudei, d'aning nabo nawang thohosi hosong. ¹⁸ Athuhi ethariyohyo isong ditha h'atehan nasong, esukai olamarai thoisukaitha h'Ojok thaangan natehan nawon ditha hosong, th'akolo thon'othaja hosong. ¹⁹ Awang ajwon n'ahosi thosong. Athuhi amirohina ahwandek d'arami karik asang hamonyo. H'odihandyo asang karik arami h'ebot. ²⁰ Ti, ikara oyihoi lya lonya iyeyenarik ithai Kristo. ²¹ Thono hindang, ojak donang ethuk ithai ethaninguna tuhudi arami hanyong, etyenie ithai arami hanyong, iring nawonderek eladiri ditha ho Kristo. ²² Athuhi ithai etyenio thoidehi oyihothik hothai honya h'amanya nathai nanya berien. Othulo ongoroi lo lomuyak, asang fodok hawak inyong adwala thororo. ²³ Athuhi ithai etyenio diwon ithai ara ongejuho ditha h'ohoile l'ahosi hathai, ²⁴ ara ithai iyofok dihwandek othulo ongejuk loyeuni d'arijori n'Ojok - d'abisan karik adwaran nadiri. ²⁵ Inyong na, idehina adwala. Ocamathik h'othulo loyindek dohoi arami hadiri, atha ithai hulo ohothing h'elulung aboithe. ²⁶ Ingerejatha. Ti, hoiyauna. Hoisarak oholong tholumo h'engere nahoi. ²⁷ Hoisarahina sitan thomunoi atehuna nanyong ara latehu ithai eyauna. ²⁸ Othulo lonya ohoholyo thoidehi. Thoigyema asang hayyu th'ahinang thananyong d'orimak among nabo nangara inyong hohoicyanak. ²⁹ Hoisarahina ocame lobo lomuyak thoifunu thohuthuhie hothai. Ocamathik ocamitha holwahu aduhohina ohothing homok dihide iring nawaharik isong. Ocamitha hothai tholwahu ohothing hoithairu ithai. ³⁰ Hoikorotho Ohoile l'Ojok, thonyong nya ifunu ithai iwonderek ara h'ofaning l'alwahio. ³¹ Idehina asang fodok hamonyo iring: adwaran n'othaji, engere, ethethena, omoritha karik asang fodok hamonyo. ³² Oyijotho ara ithai imuno ahwandek hothai, iwonatha h'othaji hoilik, omehunethe ahwandek, iring namehinerek ohothai Ojok ditha ho Kristo.