¹ Th'arami thohune, nang, Paulo lawon ara othulo lefitha lo Kristo Yesu th'ohothing thohoikela th'Ojudei. ² nang disuhe honang ara ohohorani l'alwahio n'Ojok nanya athuhi esarahina do nang thoithai. ³ Egero nang iring nathuhi nang anyahinerek thoteha arami hedima. Eladiri ne nedima na anyahi nang dothai ara nasuk. ⁴ Ara ohothai hehenio arami hune ocohi de dothai ditehan ainyong egigilo hindang ditha h'eladiri nedima no Kristo. ⁵ D'operi homok, eladiri ne, awang hoithaithahini d'olonyirok h'ohothing. Ti, thone, athuhi anyahina th'Ohoile thol'Odwa d'ohoifahak karik ohocorok honya isarahini arakang ara h'egyema ne. ⁶ Eladiri nedima ne, ojo hijan ohothing hoikela th'Ojudei, owoni ara ohoruthak karik ohothing howon iring amasok hamahama h'ahwan. Ongara isong arami homwai hanya athuk isong Kristo Yesu anyahina thoyihoi thal'evanjelio. ⁷ Aindu nang iwonan ara ohoigyemani l'evanjelio ne th'esorio than'alwahio n'Ojok nesarahini do nang th'egyema than'akolon nanyong. ⁸ Isarak nang Ojok esorio na, juk nang awon bebe diholu h'ohothing fodok h'Ojok hodwa. Esorio ne isarak nang thonyahi d'ohothing hoikela th'Ojudei ebarithi ho Kristo hawang othifeye. ⁹ Esorio n'Ojok do nang ne isarak nang eyanu d'ohothing afangan n'atehan ainyong owak Ojok ehandyo. Ojok nya idimaitho nya berien th'operi fodok aning nawak inyong ehandyo, inyong loyeu asang fodok. ¹⁰ Isarak nya Ojok ainyong owak inyong ehandyo thotehi thololonyi ekklesia d'ofuni ohoidefak h'amasom hothohide itehan oyaitha h'olofioro h'Ojok thoyihothik thoholwa. ¹¹ Ofuk arami hune iring ainyong owak inyong ehandyo iring nathuk inyong egyemarik ditha ho Kristo Yesu, Ohobu lohothai. ¹² Ditha Kristo ewon h'akolon karik eyihina n'eruk nahothai donyong. ¹³ Efiyo nang ithai th'aang hotaluhoi, anyo, thothai ethathacana nang. Ethathacan hindang abolori nathai. ¹⁴ Th'ahu than'arami hune, arigongo nang d'Omonye, ¹⁵ loindu thonyong efuryo n'ahang dihide karik dihap. ¹⁶ Amojo nang disarak dohothai, iring ebarithi h'abolori nanyong, thoithahongo th'akolon thon'Ohoile lonyong, lowon ditha hothai. ¹⁷ Amojo nang Kristo thoisukai dithaja hothai th'eruk dijingak ithai ditha h'amuno nanyong. ¹⁸ Ithai thoiwona h'akolon , ditek ithai, hohoiruhok fodok, abolori n'amuno nanyong. ¹⁹ karik ditek ithai hijan amuno no Kristo, okalaru atehan, karik difut ithai th'elajok thon'Ojok. ²⁰ Amojo nang le, locohi ehandyo tholohide ehandyo asang h'efiyo dia h'egiglo, th'akolon thananyong th'egyema ditha hohothai. ²¹ ahujon thoiwona donyong dith'ekklesia karik ditha ho Kristo Yesu d'operi fodok mak. Amen.