¹ Nang, Paulo, ohifak lo Kristo Yesu, karik Timoteo olai lohothai, ² d'ohoiruho karik olarok ohoiruhok do Kristo howoni di Kolossia. Alwahio thoiwona dothai karik elik th'Ojok Omonye lohothai. ³ Ifurak ohoi ahinywarang d'Ojok, Omonye l' Ohobu lohothai Yesu Kristo, ohoi h'emojo juui thoithai. ⁴ Ethaningu ohoi eruk nathai do Kristo Yesu karik amuno newon ithai honyong d'ohothing thoisarahini arakang d'Ojok. ⁵ Iwon ithai hamuno ne, anyo itek ithai aning nakana ara nathai dihide. Ethaningu ithai enihina nshesndek d'aning necahi arimahina ditha arami hadiri, evanelio, ⁶ nathuk ainduna dothai. Evanjelio ne nethadoyo ahayo karik dang naboboloro dihap fodok. Athuk ehandyo ahani dothai karik hara th'ofaning lethaningunerek ithai karik ara ithai iyeyena inyong th'alwahio thon'Ojok th'arami thahadiri. ⁷ Inyong ne evanjelio iring n'eyeyenarik ithai tho Epafras, ohoigyema loth'elulung hohoi lomunoi, ohoigyemani loyyu lo Kristo thohoi. ⁸ Athuk Epafras esarahina ohoi thoteha amuno nahoi d'Ohoile. ⁹ Th'amuno thone, d'ofaning lethaningurek ohoi inyong, kabong ohoi ithawejo amojo thoithai. Ithabuho ohoi efiyo hijan ithai thoifutha th'atehan awahan nanyong d'elofioro karik athenuna n'arami h'ohoile. ¹⁰ Emojo ohoi thoithai didaha ithai oyihoi lethamunoyo Ohobu. Emojo ohoi thoithai diwon ithai h'ahayo d'asang h'ehandyo ithai ara hayyu karik dibolo ithai d'atehan n'Ojok. ¹¹ Imojo ohoi thothai diwon ithai hakolon n'abolori nanyong, nesarak ithai ewasan dicuhit. ¹² Imojo ohoi thoithai difurak ithai Omonye ahinywarang th'amuno. Inyong lesarak ithai angara ayiji nedyaharai d'ohoiruhok h'afangan. ¹³ Ethahoru ohothai th'ohobye l'omudwe karik eyaru ohothai d'ohobye l'Olonyi lonyong lomunoi. ¹⁴ Ditha h'Olonyi lonyong ewon h'ethalwahuna karik ahohina n'eyatha. ¹⁵ Olonyi arijori n'Ojok laang hoco hatehuna. Inyong lo ohoithemoni l'ayeuna fodok. ¹⁶ Tholonyong oyeuni asang fodok, hothohide karik hothohop, asang hatehunu hahaang otehunu. Dia okani, ohobyehio, elulungi h'ogalla dia ohoindefak h'ohothing karik amasok, hayeuni nya asang fodok thonyong karik ara hanyong. ¹⁷ Inyong lo dihithemi h'asang fodok karik ditha honyong osuduha asang fodok amaji aboithe. ¹⁸ Inyong lo ahu n'ahwan, ekklessia. Inyong lo aculwe karik ohoithemoni th'ohoyak, th'ahu thone owon inyong h'amaji ehethemoni d'asang fodok. ¹⁹ Omuno nya Ojok hijan inyong fodok thomanyai ditha honyong. ²⁰ karik dithamoryo asang fodok thololonyi donyong alefeng. Ethamoryo Ojok asang fodok donyong. Eyanu Ojok elik thal'ahotho n'akruce nanyong. Ethamorik Ojok asang fodok dia hothohop dia hothohide donyong. ²¹ Th'orii homok nyana, awang ithai nya dang otehi ara h'Ojok. Iwon ithai nya ara omerok h'Ojok th'egigilitha karik th'asang thah'ehandyo ithai. ²² Ti, thone, athuk ithai ethamoryo th'aye than'ahwan thananyong. Ihandyo ahani dinyahinerek ithai hijan idwa ithai, awang ithai omorye karik tholohide hohune awang ithai ithamonyorye dihithemi honyong, ²³ ara ethacoyo ithai ahani th'eruk thanako, ikara nabwangye th'asang hayyu hawon de h'evanjelio hethaningu ithai. Evanjelio ne nethuk ithai elolongohina d'ohothing fodok hoyeuni dihap. Inyong ne evanjelio nesarak nang, Paulo, thoiwona ara ongaca. ²⁴ Thenene ne, amuno nang ditha hethathacanitha hundang thoithai, nang ethafuthak dihwan honang aning nawang th'arwaji thahangongok Kristo th'ahwan thananyong, ekklesia. ²⁵ Nang ongaca l'ekklesia iring nesarahinerek nang awona ahani ne th'Ojok thoithai dowon ocame l'Ojok ara ladiri. ²⁶ Arami hune hadiri hedima nya th'oyingathik karik th'operi. Ti, d'orii lya athuhi ethalyehina d'ohothing hoiruk donyong. ²⁷ Dosong owak Ojok anyahina ebarithi h'ahujon n'arami hadiri hedima hune d'ohothing hawang owoni ara Ojudei. Inyong nawon Kristo ditha hohoi, eladiri n'ahujon no mwai. ²⁸ Inyong lya lelolongo ohoi lo. Inyahi ohoi tuhudi, ara ohoi ityenio ohothing th'olofioro fodok, dinyahi ohoi d'ohothing howon fodok do Kristo. ²⁹ Th'arami tho hune, egyema nang, nang aringitho digyema th'akolon thananyong than'egyema ditha honang, dith'akolon.