Já̱wlɨ ¹ In ila tawrájawí–ii ǎl Ya̱sʉ́a Jáásodʉŋo–lé ʉ́ndʉl ǎl Wʉ́o íní ásáŋ kééŋ tááríkwǎ–sí ʉ́tóŋá kɨt paalí ǎl naa dúítía áláŋ ɨŋɨ. Jáásodʉŋo kila ʉ́tóŋá–sí júní nás kí ila dorá ɨwɨ́ŋɨ́e alá dééŋ meleg dééŋ táárídʉŋo Yáaye–lé áddeŋ piá. ² Yáaye lia namás ʉ́tóŋá nyétꞌíŋ jɨ́bé ǎl yé já̱gɨ́la asá kí Wʉ́o'ŋ belé na kí Ya̱sʉ́adʉŋo'ŋ jɨbé tɨɨlɨ. ³ Borapattá ila dʉó'ŋ–ii asá kin domoŋkwǎ'ŋ domoŋa kwa–sí kí dair árdeŋ piá pii. Borapattá kila kwa'ŋ–ii alá a̱rɨ ɨt ǎl dɨ́eŋ dɨó rímmeŋ eŋa–sí kelkaame na ba̱gɨ kawe, ilâíŋ ná tin áláŋ kin ʉ́tóŋá ɨŋɨ dakkis piá. ⁴ In dombore Yáaye–lé ʉ́ndʉl ná ma̱sɨ́gakwǎ saabe–lé dúi alá a̱kʉro–lé ka̱ɨŋ: Ǎw nái bɨŋa tʉllɨŋ na a̱a̱pɨŋ kanía ǎl ila Dʉó–lé ʉ́ndʉl alá dééŋ kʉttɨ'ŋ ta̱bʉ́ŋ ka̱ɨŋ, ⁵ na alá Ya̱sʉ́a Jáásodʉŋo–lé ʉ́ndʉla alá nʉ́ŋɨ́dʉŋo seekʉŋo–ii, alá dʉó waarkʉŋo–ii asá wǎy–le sállá káwe na alá sʉʉrʉ'ŋ ábakuriŋa'ŋ kuri–ii. Ǎw galaŋa na kʉrro ná kééŋ ge aíla kɨŋa kóel na aíla kɨŋa kí kééŋ kewa káíŋ ka̱tɨ́eŋa–lé a̱lgɨ júndí. ⁶ Na aíla kɨ́ŋa júndí áláŋ kʉrɨŋ keeŋ na áláŋ pǎ̱gɨŋa keeŋ nás dééŋ Wʉ́o Báa–sí táarí káa. Ǎw galaŋa na kʉrro ná kééŋ ge namaŋ níŋ ka̱ɨŋ báŋ ka̱ɨŋ. Ee yáa. ⁷ Ba̱gɨ́l,yé kí kútuŋaŋ ʉ́ndʉl, na nʉ́ŋɨ́ bi nʉ́ŋɨ́ níŋ já̱gɨl, namaŋ kila alá yee ká̱wyé, na órréŋá nyét ǎl sʉʉrʉ'ŋ írí ka̱ɨŋ dééŋ ʉʉ́ŋ níŋ komólal. Ee, bát see–i na kí seéŋsee níŋ eeŋ. Ee yáa. ⁸ Wʉ́o Loŋpii in beléŋ, "Ká Alapa na Omega aŋ. Yé ka̱kkɨ́rekʉŋo, alá kee na alá kérrég kéŋá na asá ká̱ɨ́ŋ alá êl." ⁹ Ká Yáaye, dɨ́eŋ bára, ɨdɨ̂ɨ́ŋ alá Ya̱sʉ́–sí arrá ka̱rɨ kʉlʉ, mííneŋjeeŋ–lé na kʉrɨŋ–lé na jɨrɨ́mó'ŋ jɨrɨ́mó–le dɨ́eŋ ampâr dóŋâŋja̱bɨ́dʉŋo aŋ. Ká domnya díg–le aáŋá alá Patmos ka̱rɨ̂ŋɨ, Wʉ́o'ŋ belé'ŋ ʉʉ́ŋ na Ya̱sʉ́a'ŋ jɨbé'ŋíŋ. ¹⁰ Loŋpii'ŋ Soog–lé ká namá Kʉo Teyyáŋa'ŋ dɨó aáŋá, namá dúíŋ soór ʉrʉ́ sîw kelámi inná ambayá. ¹¹ na in beléŋá, "Dombore–lé ʉ́tóŋá kɨt rímmeŋ jáa alá ja̱lʉ nás ma̱sɨ̂gkwǎ saabe–sí áddeŋ jáa, Ipisa na Simirna na Pergamum na Suatira na Sardis na Piladelpia na Lodika." ¹² Namás a̱ɨŋo áláŋ a̱gɨ́l kiíŋ arka kéŋá náis kaa risíŋá, asá bá a̱ɨŋo, namá siirꞌíŋ másárája'ŋ mardába saabe a̱gɨla. ¹³ Híllâ namá dʉó díg kéŋá ná in lóŋá inná Dʉldɨ́ŋkwě ná másárája'ŋ mardába'ŋ túle kɨɨréliŋi, ná garambʉ̂bʉ kurrâ jíŋí ná kééŋ tarŋa–lé péégéliŋi nás siirꞌíŋ ka̱rtʉ̂m wa̱ssê kéŋá ná dééŋ ógo–lé rɨ́gɨ́ŋá. ¹⁴ Nyɨ́lɨ́w dééŋ ta̱bʉ́ŋ pattâ kéŋá, inná ʉrɨ̂ŋnyɨ́lɨ́w pattâ, inná urány. Kééŋ kʉ́ŋɨ́ bá in lʉ́ŋɨŋɨ inná utú ǎl lííŋ. ¹⁵ Na kééŋ tarŋa bá in ulmeliŋi inná nihâs asá utûŋebede–lé kɨɨrʉl, na dééŋ arka bá in lóŋá inná koro suŋŋâ'ŋ kola. ¹⁶ Na dééŋ dóŋá súru–lé ná in ulmeliŋi inná dʉlé kí dʉlé'ŋ sibîr. ¹⁷ Ǎlbá yee a̱gɨla, namá kééŋ tarŋa–lé kʉrboŋ áwi inná dʉó waitól. Lia yé namái dééŋ dóŋá súru írí jáá ná in kwǎ, "Ka̱lɨ ái tɨ̌ɨba, ká Waarkʉŋo na Ka̱rɨkʉŋo aŋ. ¹⁸ Ká Sállâkʉŋo aŋ! Ká úsá na naa Ká sállâ aŋ namaŋ níŋ aiŋ báŋ aiŋ! Na ká Wǎy na Utú'ŋ–si gonyâyéŋkwě aiŋ. ¹⁹ Na naa kila ʉ́tóŋá rímmeŋ jáa alá jɨ́ ja̱gɨla, kila ʉ́tóŋá alá naa jállíŋá na kila ʉ́tóŋá áláŋ ta̱bʉ́ŋ eré jalliŋol. ²⁰ Na kila úríŋá saabe'ŋ bʉ̌tʉ alá jɨ́ dúíŋ dóŋá súru–lé ja̱gɨla na siirꞌíŋ másárája'ŋ mardába saabe'ŋ bʉ̌tʉ kin gé, úríŋá saabe namá ma̱sɨ́gakwǎ saabe'ŋ melega gé, na másáraja'ŋ mardába saabe namá ma̱sɨ́gakwǎ saabe gé.