¹ Ká Pául, Jáásodʉŋo Ísaꞌŋ kʉréeme kí Wʉ́oꞌŋ áare eŋa, aíla áddeŋ piá áláŋ illa jaiŋ–sí tawra awí ǎl ka̱sɨŋɨ asá kééŋ ka̱rɨŋa Jáásodʉŋo Ísa–lé tɨɨlɨ. ² Ká namás in domoŋ Timos dúíŋ kwě kondó–si rimmeŋ aw. Kaílâŋ Wʉ́o Báa na dáíŋ Loŋpii Jáásodʉŋo Ísa tʉllɨ'n na ʉrmɨŋ na a̱a̱pɨŋ kanía. ³ Ká Wʉ́o–sís assó assó ámiŋ, illa ǎl ká kí kilmáꞌŋ tɨyyɨŋ ba̱gɨ aw inná ǎl kúíŋ wʉ́oŋa ba̱gɨ káwe, ká Wʉ́o–sís kúíŋ jʉ̌ʉma–lé tettebe assó assó ámiŋ kí luul na tóó abá gís dɨ́eŋꞌíŋ lóŋóle . ⁴ Abá gís kɨ́ɨ́ŋ kolaꞌŋ líŋóle, ká bá kí zɨndɨ́e wóeláíláŋ a̱gɨ́l, ásáŋ mat ká kí kilmáꞌŋ sɨmmɨŋ pis eeŋ. ⁵ Na ka–sí báís dɨ́ɨ́ŋ seejǎ̱ɨ suurbáásꞌíŋ lóŋítía, illa ǎl waar dɨ́ɨ́ŋ abo Lois na dɨ́ɨ́ŋ Íya Ʉnɨke–lé kéŋá, na ká in–sí ɨbɨ́ŋtɨ illa seejǎ̱ɨ âl dog dɨ́ɨ́–lé kee. ⁶ Na inꞌíŋ ʉʉꞌŋ ká jɨɨ gî nʉgʉsʉg aw ásáŋ Wʉ́oꞌŋ dol–sí así keer jʉo illa alá dɨ́ɨ́ŋ dɨó kee, illa ǎl kí kúíŋ koŋaꞌŋ julpóꞌŋ dorá dɨ́ɨ́ŋ dɨó kee. ⁷ Ilâíŋ nái Wʉ́o kɨŋa ka̱lɨꞌŋ kʉo ái íniba, maraŋ namái kʉoꞌŋ kʉrro na joiŋí na suuríŋorojáa.íní. ⁸ Na naa péllét ta̱bʉ á gis tʉ́ɨ́ba ásáŋ kwa–sí dáíŋ Loŋpiiꞌŋ nʉ́ŋídʉŋo jeeŋ, na walá dúíŋ ʉʉ́ŋ ta̱bʉ áis tʉ́ɨ́ba ǎl Jáásodʉŋoꞌŋ ʉʉ́ŋ túmá aiŋ. Maraŋ–si kí Wʉ́oꞌŋ kʉrro Belétullêꞌŋ ʉʉ́ŋ dúí–le miine–lé jaldíŋó. ⁹ Wʉ́o jopo gîs namái kí ta̱rɨ́ teyyâ ta̱rɨ́a áláŋ kééŋ kwa keeŋ, in á lóŋba âl illa a̱rɨꞌŋ ʉʉ́ŋ–ii ǎl kɨ́ káa marraŋ dééŋ aji na tʉllɨŋꞌíŋ ʉʉ́ŋ–ii .Na in tʉllɨŋ kɨŋa bá gi Jáásodʉŋo Ísa–lé kaníe main asá tin á tuŋba. ¹⁰ Maraŋ naa in tʉllɨŋ kí dáíŋ Jopóedʉŋo Jáásodʉŋo Ísaꞌŋ Jaloŋla waardʉŋoꞌŋ dorá lóŋóla, ǎl wǎy–sí paaso nás jaiŋ na wǎyíŋwa̱rɨŋ éla ásáŋ kí Belétullêꞌŋ dorá nyéttiŋ ɨwɨ́ŋɨ́ . ¹¹ Ná Belétullêꞌŋ ʉʉ́ŋ, kaa ta̱mɨ́edʉŋo na kʉréeme na gʉʉdpáálí gi kawía. ¹² Belétullêꞌŋ ʉʉ́ŋ–ii na ká naa aiŋ ná mí íneŋ ɨndel. Maraŋ dog dééŋ ʉʉ́ŋ ta̱bʉ áis tʉ́ɨ́tɨba, ɨdɨ̂ɨ́ŋ nás ká aluŋ kii sí–ii ná see éél, na ká in–si ɨbɨ́ŋtɨ yé ása illa a̱rɨ–sí taga jaan aíla kaa íní namaŋ níŋ Jansáŋsoog páágó. ¹³ Na Jɨ́ illa gʉʉdd tullê–sí ǎl dúí–lé keljámi pʉ́ttôn jǎ̱ɨ. Na ǎw ná dɨ́ɨ́–le mitíl–ii áláŋ ka̱rɨ jʉlʉ na ǎw ná innálaŋ kí sejǎ̱ɨ na joiŋí jaw ǎl Jáásodʉŋo Ísa–lé ka̱ɨŋ . ¹⁴ Na ila kosmon tullê–sis jaáno aíla jɨɨ kí Kʉo Teyyáŋaꞌŋ dorá kaníe ila alá dáíŋ dɨó kee. ¹⁵ Jɨ́ jaluŋ–sí Âsiaꞌŋ a̱kʉ́ro–lé kaa kwa nyét gi da̱ldɨ́le kundíe. Pigilasiŋ kí Harmoganas dog gí da̱ldɨ́le kundíe . ¹⁶ Kasâŋ Loŋpii Onesparasꞌíŋ toŋíŋkwa–sí uram paali, ɨdɨ̂ɨ́ŋ ná yé kaa gîŋ kérrég jʉ́ndɨ nái kʉrro ééríŋá na walá dúíŋ tumnaꞌŋ jaiŋꞌíŋ ʉʉ ta̱bʉ á sîŋ tʉ́ɨ́tɨ́eŋiba. ¹⁷ Maraŋ albá Room innâŋ paago, bái kóíŋí kóíŋí namaŋ gîs bʉ́ló. ¹⁸ Kalâŋ Loŋpii mʉ̂nne íní ásáŋ Jansáŋsoogꞌíŋ írí Loŋpii–lé urma bʉ́ló! Na jɨ́ túllêndiŋ–si jaluŋ yé kaa Ipisa kí koraŋa suŋŋâ ay gîs nyíiŋí.