^{1 2} Ká Pául alá Jáásodʉŋo Ísaꞌŋ kʉréme aŋ kí Wʉ́o dáíŋJopódʉŋoꞌŋ núrgúꞌŋ dorá na kí Jáásodʉŋo Ísaꞌŋ núgúꞌŋ dorá alá dáíŋ já̱ɨ́go–ii, in domoŋ. 2 Jɨ́ sí–ii Timos dúíŋ Kwě seedʉŋo seejǎ̱ɨ–lé náis rimmeŋ aw. Kaílâŋ tʉllɨŋ na ʉrmɨŋ na a̱a̱pɨŋ kanía alá Wʉ́o Báa na Jáásodʉŋo Ísa dáíŋ Loŋpii–lé ʉ́ndʉla. ³ Ká kʉrro gí aní áláŋ Ipisa já̱w iladɨo alá Ká Masidónia annɨ́eŋi, áláŋ kwa dǐi–sí ka̱lɨ janí kwa–ssí seejâ̱ɨŋa korroŋa ás kúlŋítíaba. ⁴ Na áláŋ yeeŋa ka̱lɨ janí ná tin kila aldíŋa asá seeŋa á geba na kɨ́eŋ wʉ́oŋaꞌŋ konaꞌŋ tʉrʉrʉŋa–lé addeŋ á kaweba . kila asá guldaŋa jʉ́rʉsa já̱gɨ́tɨ́a kí ɨt áláŋ wʉ́oꞌŋ jopóꞌŋ járri–lé tin áddeŋ kawe alá kí seejǎ̱ɨꞌŋ dorá ɨ́ndélíŋ. ⁵ Ná in ka̱lɨjaníꞌŋ aji bá ilâíŋ–ii ásáŋ kwa joiŋí ka̱ɨŋ, joiŋí ǎl kilmá ser na kilmáꞌŋ tɨyyɨŋ tullê na seejǎ̱ɨ ser–lé ʉ́ndʉl. ⁶ Kwa dǐi kin gʉʉda–lé ka̱rɨŋa kɨllʉl ná ta̱bʉŋa beléŋá jʉ́rʉsaꞌŋ eré kawíe . ⁷ Yeeŋ kǒeli áláŋ Mûsaꞌŋ dáálíꞌŋ gʉʉdpáálíŋá ge, maraŋ ás kalŋaba kaáŋ–ii ná kírsiŋa wala gal kaa ʉ́ióŋá ge ǎl yeeŋ dééŋꞌíŋ kí kilmáꞌŋ palaŋ kírsiŋa. ⁸ Kɨ́ in–sí kaluŋ Dáálí âl tullé–ii abás dʉó yee táárí tullé pii . ⁹ Na kɨ́ illa Dáálí–sí kaluŋ–si, ye–sí kwa wǎ̱rɨgaꞌŋ ʉʉ́ŋ á–iiba ná kayé, maraŋ Dáálí–sí kwa kila–sís káyé ǎl yee ba̱gɨ á kaweba inná : konsajaarîŋkwǎ na wʉ́owa̱rɨkwǎ namaŋ ka̱tíeŋakwǎ na kwa ǎl–si kilmaŋa teyyáŋa á ka̱ɨŋba namaŋ asá seejǎ̱ɨ á ka̱ɨŋba, na kwa kila ǎl kɨ́eŋ âbbaŋa wala gal Íyaŋa–sí kɨrrɨwe namaŋ asá kwa ǎl kuíŋájǎ̱ɨkwǎ ge, ¹⁰ na a̱jlɨkwǎ–sí namaŋ suuríŋjuŋúkwǎ , na kwa ǎl koyaꞌŋ ja̱bɨ́jarâŋkwǎ ge na pɨékwǎ na zʉʉrkwǎ namaŋ a̱rɨ bi a̱rɨ asá kí seejǎ̱ɨ tullê waddaŋa gé. ¹¹ Illa seejǎ̱ɨ tullê asá kí in Belétullê áámíŋá aíla kaa Wʉ́o galaŋâŋ íní Wʉ́o ǎl mʉjjéꞌŋ–ii. ¹² Jáásodʉŋo Îsa dáíŋ Loŋpii–sís assó assó ámiŋ, aíla kaa kʉrro íní, Ilâíŋ nái Yé kaa seejǎ̱ɨdʉŋo jasa, namái jááŋó ásáŋ dééŋ táárí áa. ¹³ Wʉ́o in ʉʉ–sí piá ná Ká dog waar alá Jáásodʉŋoꞌŋ ka̱rɨjʉ́lodʉŋo á eŋaba ŋanyiŋdʉŋo na táltíleŋjáadʉŋo na kalbatdʉŋo aáŋá . Maraŋ yé kaa ʉrmɨŋ gîs paalí ɨdɨ̂ɨŋ ná ká táárí kí ɨllɨŋ na seeja̱ɨŋwa̱rɨŋ awa . ¹⁴ Kaa dáíŋ Loŋpiiꞌŋ tʉllɨŋ suŋŋâ gí írí bʉ́ŋí, kí seejǎ̱ɨŋ na joiŋíꞌŋ dora kila ǎl Jáásodʉŋo Ísa–lé ka̱ɨŋ. ¹⁵ In belé seekʉŋo–ii naŋ nyéttiŋ jɨɨnꞌŋ–ii illa alá Jáásodʉŋo Ísa da̱ldɨŋ –lé éla ásáŋ ka̱tɨ́eŋakwǎ–sí jópó. Ká namá jɨttɨŋaꞌŋ jɨttɨ aŋ. ¹⁶ Maraŋ inꞌíŋ ]ʉ́ŋ kéŋá náis kaa urma káwlíe, áísáŋ kaa alá ka̱tɨ́eŋakwǎꞌŋ jɨttɨŋaꞌŋ jɨttɨ aáŋa, Jáásodʉŋo Ísa jɨrmó komolmol paalí ásáŋ kila kwa–sí mitíl eeŋ alá kannía áláŋ see kěya na jaiŋ lʉʉt–sí kooomía . ¹⁷ Na in Abakuri lʉʉt alá páásíŋba, na alá á lóŋítíba, bá délliŋ Wʉ́o–ii ǎw ná ba̱gɨ na galaŋa kééŋ ge namaŋ n'ŋ ka̱ɨŋ báŋ ka̱ɨŋ Ee yáa. ¹⁸ Timos, dúíŋ kwě, Ká in ǎwsa gí anní asá kí in dʉmʉŋɨŋ áámíŋ ǎl dɨ́ɨ́ŋꞌíŋ míŋ tóóríg aáŋé, na naa alá kin domoŋa ka̱rɨ jʉlʉ gʉʉdpáálíŋá pɨékwǎ–sí níŋ kí kilmáꞌŋ pʉttɨŋ jééro. ¹⁹ Na áláŋ in ʉʉ–sí jáa, jǒel ásáŋ seejǎ̱ɨꞌŋ na kilmáꞌŋ tɨyyɨŋ tullê–lé pʉ́ttôn jʉ́ɨ, alá kwa dǐi kawríŋíe namá dɨ́eŋ seejǎ̱ɨꞌŋ jáásíŋo–lé mííneŋ kɨŋɨ . ²⁰ Kila kwaꞌŋ dɨ́o Himinus na A̱lɨzandar gé ǎl ká Jáíseŋ áa ná Sitan–sí dóŋa aá, na ásáŋ in paali áláŋ Wʉ́oꞌŋ ŋanyiŋ–sí kase.