¹ Ká kʉrro gi anni ótá nyéttiŋꞌíŋ waar áláŋ dawaŋa jelló na jʉ̌mas jʉ̌ʉm na kwa–sís jʉ̌ʉm na kwa nyét–sís assó assó jáa. ² namaŋ á̱bʉŋo na kwa kila nyét ǎl kuriŋa gé áláŋ jaiŋ aape na lúllâ kaiŋ nás Wʉ́oꞌŋ ere ta̱gɨŋ suŋŋâ na ba̱gɨ káwli na áláŋ kwaꞌŋ ta̱bʉ́ŋ ʉ́tóŋá–sí kí anal tullê kaw. ³ Na jʉ̌ʉm ininiŋ bat tullé–ii, naŋ dá'ŋ Wʉ́o ǎl dáíŋ Jopódʉŋo ii–sí kilma sɨmmó pii ⁴ . Wʉ́o kwa nyét–sí kóel ásáŋ kopoŋol na ʉʉsees kalŋa . ⁵ Illâíŋ ná Wʉ́o bá délliŋ tog bɨr–ii na táasja̱rɨ́dʉŋo bá délliŋ tog bɨ́r–ii Wʉ́oꞌŋ táas kí kwaꞌŋ, na illa bá Jáásodʉŋo Ísa–ii alá dʉldɨ eŋa . ⁶ Yé dééŋ suur–sí kwa nyét–sís jopóꞌŋ temen jáá, alá illa tin tágꞌíŋ nʉ́ŋɨ́dʉŋo–ii ásáŋ in paalí Wʉ́o ála kóel ásáŋ dʉ́o bi dʉ́o jópóŋó. ⁷ Naa illaꞌŋ ʉʉ́ŋ ká–sí namái ta̱mbɨ́edʉŋo na kʉréeme kawíe, na áláŋ seeǎ̱ɨ na ʉʉsee–lé jáaraꞌŋ gʉʉcpáálí eeŋ. na in aísa ámiŋ ʉʉ́see–ii na pɨé á iiba náis aw. ⁸ Naa Ká Wǒel kwakeya tin bi tin na lóó bi lóó ná seejǎ̱ɨkwǎ dorol kɨŋɨ áláŋ kʉ̌meli. Ná kin áláŋ kwakeya kila gé alá jaiŋ illa ka̱ɨŋ asá Wʉ́o tɨɨnel, na abá koŋa írí ka̱gɨe áláŋ kʉ̌mal, ásáŋ kilmáꞌŋ tʉkkɨŋ kɨ́eŋ kilmaŋa–lé á ka̱ɨŋba wala gal ásáŋ kí kwa kerŋaŋ darma koró á ka̱ɨŋba. ⁹ Ká dog wǒel áláŋ yáaŋa ba̱gɨꞌŋ jʉrɨŋa kiŋítía, kila ǎl jammáila na taraas gé, ná in á loŋba ásáŋ síbíŋá–sí kénykényá kawrítía, wala gal siirꞌíŋ dagága na sa̱mɨt hǒrraꞌŋ dagága kiŋítía wala gal jʉrɨŋa táráŋa kíŋítía. ¹⁰ Maraŋ in loŋ áláŋ tááríŋá tulléŋá kawe, ila ʉʉ yáaŋa–lé taraas–ii alá in kámiŋa âl Wʉ́o–sí ba̱gɨ kawe. ¹¹ Yáa ǎw nás ʉ́tóŋá–sí kí maale na kí kilmáꞌŋ táaye nyét ɨwɨ kila kwaꞌŋ eré asá seejǎ̱ɨkwǎ–sí gʉʉd kúlŋíe . ¹² Ká ás ɨɨnelba ásáŋ yáa dʉódee–sí gʉʉdpáálíti wala gal ásáŋ dʉódee–sí kʉrroꞌŋ pii, yé áláŋ délliŋ dirrig ǎw . ¹³ Illâíŋ ná main Adam–sí kewe namá lia Âwa–sí kewe. ¹⁴ Na Adam–sí ta̱bʉ á kámmíeba, maraŋ yáa–sí ta̱bʉ kámmíe ná ka̱tɨ́eŋa–lé poí, namá ka̱tɨ́eŋadʉŋo eŋa . ¹⁵ Maraŋ yáaŋa ásáŋ iladɨo kopoŋol alá dogólá keereli,abás seejǎ̱ɨ na joiŋí na tɨyyyɨŋ–lé kʉ́ɨ́tɨ́a, kí suuríŋorojááꞌŋ dorá.