¹ Waraga man oa ki bot Paulo ki Temceo, ma gin lutic pa Kricito Yecu. Bot jo pa Lubaŋa ducu ma tye i Kricito Yecu ma gibedo i Pilipi, kacel ki lutel ki jo ma konyogi: ² Lubaŋa Wonwa ki Rwotwa Yecu Kricito omiwu kica ki kuc. ³ Apwoyo Lubaŋa i kare ducu ma noŋo atye ka po piwu. ⁴ I legana ducu alego piwu ducu ki yomcwiny, ⁵ pien cakke i nino mukwoŋo o kwede wa onyoo, wuribbe kweda i tic me tito lok me kwena maber. ⁶ Aniaŋ maber ni, Lubaŋa ma ocako tic man i kinwu bicobo kakare nio wa i nino pa Kricito Yecu. ⁷ Oporre bota me paro piwu ducu kit meno, pien piwu litta twatwal, pien wun ducu wuribbe kacel kweda i nywako kica ma Lubaŋa omiya kanyi buc, ki dok i kare ma alaro pi lok me kwena maber wek omok matek. ⁸ Lubaŋa aye obedo cadenna ma ŋeyo ni, par matut ma abedo kwede piwu a i mar pa Kricito Yecu kikome. ⁹ Dok alego Lubaŋa ni meno, mar mewu myero odoŋ omedde ameda i ŋec kikome ki niaŋ matut, ¹⁰ wek wupwo gin maber makato. Man bimiyo wubedo ma cwinywu leŋ laboŋo bal mo i nino pa Kricito, ¹¹ dok bene bimiyo ticwu ducu mabeco me kit ma atir nya i komwu pi Yecu Kricito, kun kelo deyo ki pak bot Lubaŋa. ¹² Utmega, amito wuŋe ni, lok mutimme i koma okonyo matek me nyayo lok me kwena maber. ¹³ Tic 28.30 Lwak askari pa Cecar ducu, ki jo mukene ducu, kombeddi giŋeyo maber ni, an atye i buc pi Kricito. ¹⁴ Dok utmegiwa mapolle gengi omedde i kom Rwot pi bedona i buc, omiyo gitito lok pa Lubaŋa ki tekcwiny madwoŋ twatwal, laboŋo lworo. ¹⁵ Ada, jo mogo tito pi Kricito ki cwiny me nyeko ki daa, ento jo mukene gitito ki cwiny maber. ¹⁶ Jo ma tito ki cwiny maber-ri gitito pi mar, kun giŋeyo ni Lubaŋa oketa kany ka lweny pi lok me kwena maber. ¹⁷ Jo mukene ca gitito nyiŋ Kricito pi laro dito kun noŋo cwinygi pe leŋ, tamgi tye me medo can bota i buc kany. ¹⁸ Lok mo pe, an gira cwinya yom ayoma, pien i yo ducu, kadi i goba nyo lok ada, gitye ka tito pi Kricito. ¹⁹ Iyo, pud dok abibedo ki yomcwiny. Pien aŋeyo maber ni, pi legawu ki pi kony ma a ki bot Cwiny Maleŋ pa Yecu Kricito, bimiyo abwot ki i can. ²⁰ Pien mitina ki genna madwoŋ tye ni, lewic pe bimaka i gin mo, ento atamo me miyo deyo bot Kricito i koma-ni ki tekcwiny madwoŋ, i kare-ni macalo i kare ducu, kadi akwo nyo kadi ato. ²¹ Pien ki tuŋ bota, bedo kwo en aye Kricito, ki to kono miyo anoŋo magoba. ²² Ka abedo kwo i kom, miyo abitiyo tic mogo ma konyo ento pe aŋeyo gin ma abiyero. ²³ Kwanyo acel i kom gin aryo-ni ocuŋo wiya woko. Mitina tye ni kono ato wek abed kacel ki Kricito, pien meno aye ber makato ducu. ²⁴ Ento bedo kwo i kom mitte twatwal piwu. ²⁵ An doŋ aniaŋ i lok man, omiyo aŋeyo ni pud abibedo, dok abiri botwu ducu wek wumedde wuwot anyim, wubed ki yomcwiny i niyewu. ²⁶ Meno bimiyo wakkewu pira i Kricito. Yecu bedo dwoŋ twatwal, ka dok adwogo botwu. ²⁷ Gin acel ma pire dit en ene ni, kit kwo me bedowu myero orwatte ki gin ma lok me kwena maber i kom Kricito mito, wek kadi abino me nenowu, nyo kadi abedo bor kwedwu, ka awinyo lok i komwu, myero aŋe ni, wucuŋ matek i cwiny acel ki tam acel, kun wulwenyo kacel pi niye ma bino pi lok me kwena maber. ²⁸ Pe wuwek lukworwu gumiwu lworo i gin mo. Man aye lanyut ma cimo botgi ka maleŋ ni gibirwenyo woko matwal, ento lanyut man nyuto botwu ni gibilarowu; meno gire gin ma a ki bot Lubaŋa. ²⁹ Pien en omiyowu mot me kica pi Kricito, pe mot me ye en keken, ento me neno can pire bene. ³⁰ Wudonyo doŋ i kit lweny ma yam wuneno i koma-ni, dok bene kombeddi pud wuwinyo ni atye iye.