¹ Pi meno, ka wunoŋo tekcwiny mo pi bedo i Kricito, nyo mar mo ma miyo wudiyo cwinywu, nyo ka gimiyowu ribbe mo i Cwiny Maleŋ, nyo cwiny mo me kica weko wutimo ber bot jo mukene, ² doŋ wumi yomcwinya ocobbe maber kit man: wubed ki tam acel ki mar acel, kun wuribbe kacel i cwinywu, tamwu bene myero obed acel. ³ Pe wutim gin mo pi laro dito nyo pi wakke awaka keken, ento wubed ki mwolo, kun dano acel acel woro lawote macalo ŋat madit loye. ⁴ Pe itam pi gin ma konyi keken, ento tam pi gin ma konyo jo mukene bene. ⁵ Wubed ki cwiny ma rom ki cwiny ma yam Kricito Yecu obedo kwede-ni. ⁶ I calle kadi bed en Lubaŋa kikome, ento pe oridde ki tek me bedo rom ki Lubaŋa. ⁷ Oweko meno ducu, ci okwanyo kit me opii, ka ginywale macalo dano. ⁸ Ka doŋ okatti macalo dano, omwolle woko gire kene, obedo lawiny nio wa i to, nio bene wa i to i kom yatariya. ⁹ Pi meno, Lubaŋa omiye dit ma malo twatwal, dok bene omiye nyiŋ ma tye malo makato nyiŋ mukene ducu, ¹⁰ wek gin ducu ma tye i polo ki i lobo, kadi wa gin ducu ma tye piny i te lobo, gurum coŋgi piny me woro nyiŋ Yecu, ¹¹ leb ducu myero otuc bene ni, Yecu Kricito aye Rwot, kun kelo deyo bot Lubaŋa Won. ¹² Pi meno, wun ma amaro, macalo yam wuwinyo lokka i kare ducu ma onoŋo pud atye botwu, myero wubed ki winy makato kare kombeddi ma doŋ atye bor kwedwu-ni. Wuti tic me cobo larwu kenwu kenwu ki lworo kacel ki myelkom, ¹³ pien Lubaŋa aye ma tye ka tic i cwinywu, kun miyowu miti ki teko me tic, wek wun wuyom cwinye. ¹⁴ Wuti tic ducu laboŋo ŋuru nyo pyem mo, ¹⁵ wek wubed laboŋo lok mo ma loyowu, ma bal mo bene pe i cwinywu, litino pa Lubaŋa ma bal mo pe i komwu liweŋ i kin lwak jo me kare-ni ma guballe woko-ni. Wutye ka ryeny i lobo i kin dano calo lakalatwe. ¹⁶ pien wumako lok me kwo doŋ matek. Meno bimiyo awakke i nino pa Kricito ni, yam kara onoŋo pe ariŋo ŋwec nono, dok bene pe ayelle nono. ¹⁷ Kadi bed giony remona me bedo macalo gityer amata ma gionyo i wi keno tyer, kun niyewu kacel ki ticwu bote bedo macalo mot ma gitumo bot Lubaŋa, an gira cwinya yom kacel ki wun ducu. ¹⁸ Kit meno, wun bene myero cwinywu obed yom, wek wuribbe kweda i yomcwiny. ¹⁹ Atye ki gen i Rwot Yecu me cwalo Temceo botwu oyot, wek omi awiny kit ma wutye kwede, kun cuko cwinya bene. ²⁰ Pe atye ki ŋat mo mukene doki ma tye ki kit cwiny ma en tye kwede, ma twero paro piwu adada macalo en. ²¹ Jo mukene-gu ducu giparo pi gin ma konyogi keken, pe gitamo pi gin ma dok i kom Yecu Kricito. ²² Ento wun wuŋeyo kit Temceo ki konnye ma en onyuto. En ki an wabedo calo wego ki latinne; waribbe kwede i tic kacel pi lok me kwena maber. ²³ Pi meno atye ki gen me cwale botwu oyot, tek aniaŋ kit ma piny tye ka wot kwede ki tuŋ bota kany. ²⁴ Dok bene atye ki gen i Rwot ni an kikoma abio botwu i kare macokcok-ki. ²⁵ Atamo bene ni myero acwal omera Epaprodito botwu, ma en latic wadwa ma olwenyo kacel kweda, en ŋat ma yam wuore bota pi konya i pekona-ni. ²⁶ Pien en paro pi wun ducu, kun mito ni enenwu, dok bene cwinye obedo ka cwer matek, pien yam wuwinyo onoŋo ni kome lit. ²⁷ Adada, kome onoŋo obedo lit matek ma obwot to woko. Ento Lubaŋa okonye, pe en keken, ento kadi wa an bene, wek pe omedda cwercwiny i kom cwercwiny mukene ca. ²⁸ Meno gin mumiyo amito twatwal ni myero acwale botwu wek wubed ki yomcwiny ka dok wunene, ki an bene pe doŋ myero abed ki cwercwiny madwoŋ. ²⁹ Wujole i Rwot ki yomcwinywu ducu; dok bene wuket deyo i kom jo ma cal kwede. ³⁰ Pien en yam omiyo kwone adada ma obwot to woko pi tic pa Kricito, wek ecob gin murem i kom kony ma yam wumiya.