¹ Ka doŋ gimoko ni doŋ wakwaŋ wacit i Itali, gimiyo Paulo ki lumabuc mukene i ciŋ ladit mo ma nyiŋe Julio ma lalo dano miya i kin dul mony ma gilwoŋo ni pa Augucito. ² Wadonyo i mel mo ma oa ki i Adramitio ma doŋ cok kwaŋ dok tuŋ waŋwat mogo ma i dog nam me lobo Acia. Wanywako yo ki Aristako, Lamakedonia ma gaŋgi Tecalonika. ³ Orwone wao i Cidon, ci Julio otimo Paulo maber mada, oyene me wot ka limo lureme wek gugwoke. ⁴ Waa ki kunnu, wakwaŋ warabo ŋet Caiprac, pien yamo okemowa, ⁵ ka doŋ waŋolo nam atir i ŋet lobo Cilicia ki Pampulia, wao i Mira ma i lobo Licia. ⁶ Ki kunnu ladit mony onoŋo mel mua ki i Alegijanderia ma cito Itali, ci omiyo wadonyo iye. ⁷ Wakwaŋ pi nino mapol, ci wao i Kunida ki tek. Yamo ogeŋowa wot anyim atir, mumiyo warabo ŋet Kurete cok ki Calamone. ⁸ Warabo ŋet Kurete ki tek ka wao i kabedo ma gilwoŋo ni Waŋ Wat Mabeco, ma cok ki gaŋ ma nyiŋe Lacea. ⁹ Kare malac onoŋo doŋ oballe, omiyo wot i nam doŋ odoko rac pien nino madit me ri kec bene doŋ okato woko, ci Paulo omiyo botgi ryeko, ¹⁰ owacci, “Ludito, aneno ni wotwa-ni bibedo rac ci kelo lannye me jami mapol, pe me yec ma gitiŋo i mel keken, ento wa mel kikome kadi wa kwowa bene.” ¹¹ Ento ladit mony oketo cwinye i lok pa ladit ma loyo mel ki lok pa won mel, makato lok ma Paulo owaco. ¹² Waŋwat meno pe romo maber me tiro iye i kare me koyo, pi meno pol pa dano gutamo ni ber gua ki kunnu wek ka twerre guo Poinike, ma en aye waŋwat me Kurete ma neno tuŋ wokceŋ tuŋ acam ki tuŋ wokceŋ tuŋ acuc, wek guri kunnu pi kare me koyo. ¹³ Ka yamo ma a tuŋ acuc ocako kodo mot mupye, gutamo ni doŋ orwatte ki tamgi. Guywayo lajuk mel woko ki i pii, gucako kwaŋ gurabo Kurete ma cok ki tura. ¹⁴ Ento ka kare okato manok keken, yamo lapiru mager twatwal ocoro, ma gilwoŋo ni Yurakwilo, okodo nia ki i wi tura. ¹⁵ Omako mel, opaŋo wiye ma pe doŋ twero kemo yamo, ci waweko mel doŋ woto ka ma yamo oterowa. ¹⁶ Ka warabo ŋet latin cula mo ma nyiŋe Kauda watemo ki tek me laro yeya. ¹⁷ Ka lukwaŋ doŋ guywayo yeya gutiŋo ki i pii, gukelo i mel, ci guywayo tol mogo gutweyo te mel piny ki i te pii. Lacen guywayo boŋo ma malo piny, wek yamo pe omi mel owot oyot twatwal, pien gilworo ni gwok nyo gibidonyo i kweyo me Cirtic i dog nam me Libya, ci guweko yamo otero mel kumeno. ¹⁸ Ka doŋ biamwonyi twago pii matek, ci orwone lutic mel gucako kwanyo jami ma i mel gubolo woko i pii. ¹⁹ I nino me adekke gucako bolo jami tic me mel woko i pii ki ciŋgi. ²⁰ Wari pi nino mapol ma pe waneno ceŋ nyo lakalatwe, yamo bene obedo ka kodo mager twatwal, ci lacen pe doŋ wabedo ki gen mo ni wabilarre. ²¹ Ka doŋ guri pi kare malac ma pe gicamo cam mo, Paulo obino ocuŋ i dyegi ci owacci, “Luditona, kono yam wuwinyo doga ma pe wua ki I Kurete, kono pe wapoto i can man ki lannye pa jami. ²² Ento koni acikowu ni wudi cwinywu pien kwo pa ŋat mo i kinwu pe birwenyo, ento mel aye. ²³ Pien tin i dyewor man lamalaika pa Lubaŋa ma an a danone, ma an aworo-ni, obino ocuŋ ka ŋeta, ²⁴ ci owacca ni, ‘Paulo, pe ibed ki lworo. In myero icuŋ i nyim Cecar; nen Lubaŋa doŋ omiyo boti dano ma iwoto kwedgi ducu.’ ²⁵ Pi meno wudi cwinywu, pien an ageno Lubaŋa, aŋeyo ni bitimme kit ma giwaco bota-ni. ²⁶ Ento myero mel oyokke i cula mo aye.” ²⁷ Ka nino oromo apar wiye aŋwen, ma yamo terowa i dye nam me Adria, i cwiny dyewor, lukwaŋ gutamo ni tye lobo mo ma cok kwedwa. ²⁸ Ka giporo oromo futi miya acel ki pyeraryo. Ka doŋ gidirre manok, dok giporo oromo futi pyeraboŋwen. ²⁹ Gulworo ni gwok nyo mel bicorre i kom got, ci gubolo lajuk mel aŋwen i pii ki tuŋ tere, ci gulego ni piny myero koŋ oru. ³⁰ Lukwaŋ guyenyo yo me lwi woko ki i mel, ento ka doŋ gucwalo yeya i nam kun gitimo macalo gimito bolo lajuk yo tuŋ nyime, ³¹ Paulo owaco bot ladit mony ki bot lumony ni, “Ka pe jo man gubedo i mel; pe wubilarre.” ³² Ka lumony guŋolo tol yeya, guweko yeya okwaŋ ocito. ³³ Ka piny doŋ mito ru, Paulo odiyogi wek gin ducu gucam cam mo, ci owaco ni, “Tin doŋ nino me apar wiye aŋwenne ma wubedo ka ri kec ma cwinywu oŋabbe aŋaba, pe wucamo gin mo. ³⁴ Pi meno abako doga botwu ni wucam cam mo wek wunoŋ tek; pien kadi wa yer i kinwu.” ³⁵ Ka doŋ owaco lok man, okwanyo mugati, omiyo pwoc bot Lubaŋa i nyimgi ducu ci ocako camone. ³⁶ Ka gin ducu cwinygi odoko tek ci gucamo cam pigi kengi. ³⁷ Onoŋo wan ducu ma wabedo i mel waromo dano miya aryo ki pyerabiro wiye abicel. ³⁸ Ka doŋ gucamo guyeŋ, ci doŋ guyako jami woko ki i mel kun gibolo ŋano woko i nam. ³⁹ Ka piny doŋ oru, lukwaŋ pe guŋeyo lobo ma guo iye, ento guneno gul nam ma kweyo tye iye ci gutamo ni ka twerre myero gikel mel i dog tura kunnu. ⁴⁰ Guŋolo tol ma mako lajuk ducu, guweko odoŋ i nam; i kare meno bene gugonyo tol ma onoŋo gutweyo ki pol ma giwiro ki mel, ka doŋ guŋabo boŋo matidi ki tuŋ nyime wek yamo omaki, ci guweko mel omol owoto kun kemo tura. ⁴¹ Ento ka guo ka ma tol pii mager aryo oromo iye, ci nyim mel otomme ki lobo ma i te pii, ogeto woko likiŋ, te mel bene pii otugge oturo woko. ⁴² Askari guyubo ni ginek lumabuc woko ducu, wek acel mo pe okwaŋ oriŋ woko matwal, ⁴³ ento ladit mony omito laro Paulo, ci ojukogi pe oye ni gulub tamgi-nu. Ociko ni jo ma giŋeyo kwaŋ gukworre i pii wi ati gucak kwaŋ wek gukat i wi tura, ⁴⁴ ka lacen jo ma gudoŋ gulub korgi i wi bao mogo nyo i wi dul mel. Kit meno gin ducu gukonnye kekengi gukato i wi tura.