¹ Me agikkine, utmegiwa, wuleg Lubaŋa piwa, wek lok pa Rwot owinnye oywek woko oyotoyot, dano guket iye deyo macalo bene otimme i kinwu, ² dok bene wek walarre ki i ciŋ jo maraco, ma kitgi oballe woko; pien jo mogo pe gitye ki niye. ³ Rwot genne, en bimiyowu teko, dok bigwokowu ki i kom gin marac. ⁴ Watye ki gen i Rwot i komwu ni, wutye ka tiyo gin ma nene wacikowu ni wuti, dok bene wubimedde ki tiyone. ⁵ Rwot myero otel cwinywu nio wa i mar pa Lubaŋa ki i diyo cwiny ma a ki bot Kricito. ⁶ Utmegiwa, kombeddi wacikowu i nyiŋ Rwotwa Yecu Kricito ni, wupokke woko ki i kom ominwu mo ma lawackom ma bedo ka wirre kun balo kare nono labaŋo tic mo, ma pe lubo kit ma myero ma wun wumako ki botwa. ⁷ Wun kikomwu wuŋeyo kit ma myero wulub kwede kitwa. I kare ma nene watye botwu pe wabedo luwackom kun wabalo kare nono laboŋo tic mo. ⁸ Wan yam pe wacamo cam pa ŋat mo laboŋo culone, ento wacanne i tic dyeceŋ ki dyewor wek pe waket peko i kom dano mo i kinwu. ⁹ Pe te lokke ni wan wape ki twero, ento wamine giwa kenwa me bedo lanen ma myero wun wulubi. ¹⁰ Pien kadi i kare ma onoŋo watye botwu, wamiyowu cik man ni, ŋat ma dag tic myero wutwon ki cam. ¹¹ Pien wawinyo ni jo mogo i kinwu komgi wac, gibedo ka wirre kun gibalo kare nono ma pe gitiyo tic mo, ento giridde i tic pa jo mukene. ¹² Waciko kodi dano macalo meno, dok wabako dogwa botgi i Rwot Yecu Kricito ni, myero guti ticgi mot, wek ŋat acel acel opitte gire kene. ¹³ Utmegiwa, pe wuol ka tiyo gin maber. ¹⁴ Ka ŋat mo okwero lubo lok ma gicoyo i waraga man, myero wuniaŋ maber i kom dano meno, pe wuribbe kwede, wek lewic omake. ¹⁵ Pe wunene macalo lakworwu, ento wucike macalo ominwu. ¹⁶ Rwot ma en won kuc omiwu kuc i kare ducu, i yo ducu. Rwot obed kwedwu ducu. ¹⁷ An Paulo acoyo botwu mot man ki ciŋa. Man aye lanen ma tye i waragana ducu; man aye kit ma acoyo kwede. ¹⁸ Kica pa Rwotwa Yecu Kricito obed kwedwu ducu.