¹ Utmegiwa, lok i kom dwogo pa Rwotwa Yecu Kricito ki cokkewa me rwatte kwede, wabako dogwa botwu ni, ² pe wuwek tamwu ogwaŋŋe oyotoyot, cwinywu pe myero opoti, kadi pi lok ma wuwinyo ki bot lanebi mo nyo pi lok ma gitito, nyo kadi pi waraga mo ma giwaco ni oa ki botwa, ma tito ni, nino pa Rwot doŋ oo. ³ Pe wuwek ŋat mo obwolwu i yo ducu, pien nino meno pud pe bibino, nio waŋ ma jemo i kom Lubaŋa koŋ obedo tye, dok bene nio waŋ ma dano ma turo cik koŋ onen, dano ma myero orweny woko matwal. ⁴ Dan En pyem, dok kette kene me bedo malo ma loyo gin ducu ma gilwoŋo ni lubaŋa, nyo gin mo ma giworo; dok bibedo i wi komme i ot pa Lubaŋa, kun nyutte kene ni en Lubaŋa. ⁵ Pe wupo ni yam atittiwu lok man i kare ma pud atye botwu? ⁶ Wuŋeyo bene gin ma tye ka geŋe i kare-ni, wek onen ka doŋ kare oromo. ⁷ Pien twero ma miyo dano turo cik kombeddi doŋ tye ka tic i muŋ; ento ŋat ma geŋe pud bigeŋo nio ka doŋ giryeme woko. ⁸ Lacenne dano ma turo cik binen, ci Rwot Yecu bineko woko ki alur doge, tyeke woko, i kare ma en bidwogo turu ki nen woko ka maleŋ. ⁹ Bino pa dano ma turo cik a ki i tic pa Catan kun tye ki teko ducu, ki lanyut mogo ki taŋo mogo me goba. ¹⁰ Dok bibedo ki lwak bwola maraco pi jo ma birwenyo matwal, pien gukwero maro lok me ada ma kono olargi. ¹¹ Pi meno Lubaŋa biketogi i te twero me bwola, wek guye goba, ¹² wek giŋol kop oloo jo ma pe ye lok me ada, ento cwinygi yom i timo gin ma pe tye atir. Jo ma Lubaŋa oyero yam wa con pi larre. ¹³ Utmegiwa ma Rwot maro, myero wapwo Lubaŋa piwu nino ducu, pien Lubaŋa okwoŋo yerowu con wek elarwu pi Cwiny Maleŋ ma lonyowu wubedo maleŋ, ki pi ye lok me ada. ¹⁴ Olwoŋowu i man ki lok me kwena maber ma watito, wek gimi wunoŋ deyo pa Rwotwa Yecu Kricito. ¹⁵ Pi meno utmegiwa, wucuŋ matek, wumak kit ma wapwonyowu kwede, i lok nyo ki waraga. ¹⁶ Kombeddi Rwot Yecu kikome, ki Lubaŋa Wonwa ma marowa dok okweyo cwinywa matwal ki gen maber ma obino pi kica, ¹⁷ okwe cwinywu, omokwu matek i tic ki i lok ducu mabeco.