¹ Waraga man oa ki bot Paulo gin ki Silvano, ka Temceo. Bot lwak jo muye Kricito ma gibedo i Tecalonika ma gitye i Lubaŋa Won ki Rwotwa Yecu Kricito: ² Lubaŋa Won ki Rwotwa Yecu Kricito omiwu kica ki kuc. ŋolo kop i kare me dwogo pa Kricito. ³ Utmegiwa, wan myero wapwo Lubaŋa jwijwi piwu. Myero wapwoye pien niyewu tye ka doŋo matek twatwal, ki mar ma dano acel acel maro ki lawote bene tye ka medde. ⁴ Pi meno wan bene wanyatte piwu i kin jo muye Lubaŋa i kabedo ducu, pi diyo cwinywu ki pi niyewu i un ma giunowu kwede ki i can ducu ma wutye ka cirone. ⁵ Meno aye lanen ma nyuto kit ma Lubaŋa ŋolo kwede kop atir dok kakare, wek gibikwanwu ni wun jo ma myero i ker pa Lubaŋa ma wutye ka neno can pireni. ⁶ Pien bot Lubaŋawa nen atir ni, myero ecul can bot jo muketo can i komwu, ⁷ ka doŋ miyowu yweyo, wun jo ma giketo can i komwu, ka wa wan bene. Meno en bitimo i kare ma Rwot Yecu binen iye ma kun a ki i polo kacel ki lumalaikane matek i dye mac ma lyel. ⁸ I kare meno en biculo kwor i kom jo ma pe ŋeyo Lubaŋa, ki i kom jo ma pe gilubo lok me kwena maber i kom Rwotwa Yecu. ⁹ Kop ma gibiŋolo i komgi en aye can me to ma pe gik, kun giryemogi woko ki i nyim Rwot dok ki i nyim deyo me tekone, ¹⁰ i nino meno, i kare ma en bidwogo kun jone miyo deyo bote, ma noŋo giure i kin jo ducu muye en; pien yam doŋ wuye lok ma watito botwu. ¹¹ Meno aye gin mumiyo walego Lubaŋa piwu nino ducu, wek en omi wubed jo ma myero ma kwowu rwatte ki lwoŋo ma en olwoŋowu kwede, wek Lubaŋa okonywu ki tekone me cobo mitwu ducu mabeco ki tic ducu ma wutiyo pi niye. ¹² Meno bimiyo dano keto deyo i nyiŋ Rwotwa Yecu Kricito piwu dok wun bene wubinoŋo deyo pire, pi kica pa Lubaŋawa ki Rwotwa Yecu Kricito.