¹ Waraga man oa ki bot Paulo ma lakwena pa Kricito Yecu pi cik pa Lubaŋa Lalarwa ki Yecu Kricito ma genwa ocuŋ i kome. ² Bot Temceo latinna me ada i niye: Lubaŋa Won ki Kricito Yecu Rwotwa omii gum, kica, ki kuc. ³ Macalo nene koŋ abako doga boti i kare ma acito i Makedonia, amito koŋ idoŋ i Epeco wek icik jo mogo pe gupwony pwony mo mapat, ⁴ dok pe guket cwinygi i kom lok me ododo, ki nyiŋ mogo ma giryeyo mabocoboco ma lubo te kwaro, ma kelo tam atata, pe konyo yub pa Lubaŋa ma ocuŋ i kom niye. ⁵ Yam aciki ni iwek dano gubed ki mar ma dano bedo kwede ka cwinye leŋ dok kite ber ma pe ki bala mo i kome, dok ma niyene goba pe iye. ⁶ Jo mogo guŋak woko ki i lok man ci gudonyo ka boko lok atata ma konnye pe. ⁷ Gimito bedo lupwony-cik, kun pe giniaŋ kadi wa lok ma giloko, nyo kadi gin ma gitye ka lok i kome, ma gucuŋ iye matek twatwal-li. ⁸ Waŋeyo ni cik ber ka dano otiyo kwede i yo ma cik mito. ⁹ kun waniaŋ ni, cik pe giketo pi jo ma kitgi atir, ento giketo pi lutur-cik ki pi jo ma pe ki winy, pi jo ma pe lworo Lubaŋa ki pi lubalo, pi jo ma pe gileŋ, jo ma pe keto cwinygi i kom Lubaŋa, pi jo ma neko wongi ki jo ma neko megigi, pi lunek dano mukene, ¹⁰ dok pi jo ma timo tim kwele, jo ma buto ki co luwotgi, jo ma kwalo dano girwenyo kwede woko ali, lugoba, jo ma kwoŋo kwoŋ laboŋo tere, ki gin mukene ducu ma pe rwatte ki pwony me ada. ¹¹ Meno aye pwony ma noŋŋe i lok me kwena maber ma yam gimiya me atita, lok maber ma tito pi deyo pa Lubaŋa ma gipwoyo. ¹² Apwoyo ŋat ma omiya teko me tiyo tic man, en Kricito Yecu Rwotwa, pien doŋ okwana me bedo lagen, ka oketa bene i ticce, ¹³ kadi bed yam abedo ka yete pi keto ayela i kome ki balo nyiŋe. Ento en otima kica, pien ceŋ atimo meno ki kwiya piny laboŋo niye, ¹⁴ ka kica pa Rwotwa omedde twatwal i koma kacel ki niye ki mar ma tye i Kricito Yecu. ¹⁵ Lok man lok me ada, myero dano ducu guye ni, Kricito Yecu yam obino i lobo pi laro lubalo. I kin lubalo an aye abedo labal mukwoŋo, ¹⁶ ento otima kica pi lok man, wek i kin lubalo, Yecu Kricito okwoŋ nyuto diyo cwinye maber-ri bota macalo lanen bot jo mukene ma gibiye en, ka doŋ gicako noŋo kwo ma pe tum. ¹⁷ Woro ki deyo obed nakanaka bot Kabaka ma loyo kare ducu, ma pe to, ma pe nen, en Lubaŋa acel kene. Amen. ¹⁸ Latinna Temceo, amiyo boti cik man ma rwatte ki lok ma yam lutit lok pa Lubaŋa guloko i komi, ¹⁹ wek ka ilubo lokgi wek ilweny lweny maber, kun imako niye matek ma ii leŋ. Pi kwero tam ma i igi ma nyuto botgi balgi, jo mogo niyegi oballe woko. ²⁰ Jo mogo i kingi, Kumenayo ki Alegijada, yam amiyogi i ciŋ Catan wek gupwonnye guwek yeto Lubaŋa.