¹ Doŋ me dok i lok ma wucoyo waraga bota pire, bedo ber ka laco mo pe ogudo dako, ² ento pi geŋo tim me abor, myero laco acel acel obed ki dakone, ki dako acel acel bene myero obed ki cware. ³ Laco myero ocob miti pa dakone, ki dako bene myero ocob miti pa cware. ⁴ Dako pe loyo kome kene, ento kono cware aye ma loyo; kit meno laco bene pe loyo kome kene ento dakone bene ma loyo. ⁵ Dano acel acel pe myero okwer pi kome bot lawote, kono gwok nyo pi kare manok mo keken ma wuyubo ayuba dok wuye kacel, wek wunoŋ kare me bedo ka lego Lubaŋa. Ka lacen dok wuribbe kacel, wek Catan pe obitwu, pi miti ma wutye kwede ma pe jukke. ⁶ Awaco lok man kun aye ayeya keken, ento pe aketo macalo cik. ⁷ Kono onoŋo twerre amito dano ducu gubed kit macalo atye kwede-ni; ento dano acel acel tye ki kit motte mutiko en, ma Lubaŋa omiye; inoŋo ni dano mo-ni tye ki mot man, ki dano mukene tye ki mapatte. ⁸ Bot jo ma pud peya gunyomo, ki bot mon ma coggi oto, awaco kit man ni, bedo ber ka kono gubedo macalo an. ⁹ Ento ka pe giromo jukke kengi, myero gunyom, pien nyom ber kato ma laco nyo dako obedo ka ciro miti me kom. ¹⁰ Bot jo ma doŋ gunyomme, acikogi ni dako pe okwer cware, ento man pe an aye ma aciko, Rwot gire aye muciko. ¹¹ Ento ka ce dako mo doŋ oweko cware, myero obed kene, nyo odwog cen bot cware, pe oger laco mo mukene. Dok laco bene pe myero oryem dakone. ¹² Bot jo mukene-gu, an kikoma aye ma atye ka lok, pe Rwot gire, ni, ka ce Lakricitayo mo tye ki dakone ma pe oye Yecu, ka dako-nu oye me medde ki bedo kwede, laco pe myero oryeme woko. ¹³ Ka dako mo bene tye ki cware ma pe oye Yecu, ka ce cware oye me medde ki bedo kwede, pe myero okwere. ¹⁴ Pien laco ma pe oye Yecu doko leŋ pi dakone, ki dako ma pe oye Yecu bene doko leŋ pi cware ma Lakricitayo-ni. Ka pe kumeno, kono litinowu pe gibedo leŋ, ento kit macalo tye gileŋ gigi. ¹⁵ Ento ka ŋat ma pe oye Yecu mito pokke woko ki lawote, wek opokke. Doŋ lok macalo meno Lakricitayo ma laco nyo ma dako pe tye iye ki dic mo, pien Lubaŋa olwoŋowa ni wabed ki kuc. ¹⁶ In dako, iŋeyo niŋniŋ ka ibilaro cwari? Nyo in laco, iŋeyo niŋniŋ ka ibilaro dakoni? ¹⁷ Myero doŋ dano acel acel olub kit kwo ma Rwot omiye, en kwo ma yam en tye iye i kare ma Lubaŋa olwoŋe. Man en gin ma aciko ki jo ducu ma guye Kricito. ¹⁸ Tye dano mo ma onoŋo doŋ olirre i kare ma gilwoŋe? En pe myero openy yo me dwoko kome macalo dano ma pe giliro. Tye dano ma onoŋo doŋ pe gilire i kare ma gilwoŋe? En pe myero openy yo me lirre. ¹⁹ Pien bedo ma giliri ki bedo ma pe giliri pe konyo gin mo; ento gwoko cik pa Lubaŋa aye konyo. ²⁰ Dano acel acel myero obed ki kite macon ma onoŋo en tye kwede i kare ma gilwoŋe. ²¹ I kare ma gilwoŋi onoŋo ibedo opii? Pe ipar. Ento ka inoŋo yo me a woko ki i opii, ci ti kwede. ²² ŋat ma gilwoŋo me bedo i Kricito ma onoŋo en opii, en aye dano ma Rwot doŋ ogonyo woko ki i opii. Kit meno bene, ŋat ma onoŋo lone kene ka gilwoŋe, doŋ odoko opii pa Kricito. ²³ Wun jo ma giwilo ki wel; pe wudok opii pa dano mo. ²⁴ Utmegina, dano acel acel myero obed i nyim Lubaŋa ki kite ma ceŋ gilwoŋe kwede ca. ²⁵ Lok ma dok i kom jo ma pud peya gunyomme, pe anoŋo cik mo ma oa ki bot Rwot, ento amiyo tamma iye macalo dano ma Lubaŋa doŋ otyeko timo kica bote, en mumiyo abedo ŋat ma genne. ²⁶ Doŋ atamo ni, pi can ma odiyowa marac, bedo ber ka dano moni obedo kit macalo tye kwede. ²⁷ Itye ki dako? Pe item gonyo nyom woko. In dakoni pe? Pe imit nyom. ²⁸ Ento ka inyomo, noŋo pe itimo bal mo. Nyako bene ka ginyomo noŋo pe otimo bal. Ento jo ma nyomme gibinoŋo ayelayela me kwo me lobo man; amito ni ka twerre kono akwanyo ayelayela meno woko ki i komwu. ²⁹ Utmegina, gin ma aloko en ene ni, kare doŋ odoko diŋ; cakke kombeddi jo ma tye ki mon myero gubed calo jo ma pe ki mon, ³⁰ ki jo ma kumo myero gubed calo jo ma pe kumo, jo ma cwinygi yom calo jo ma pe cwinygi yom, jo ma wilo jami gubed calo jo ma pe tye ki gin mo, ³¹ jo ma tiyo ki jami me lobo man calo jo ma pe gitye ka tic kwede, pien lobo kit ma tye kwede-ni bitum woko. ³² Amito wubed laboŋo par mo. Dano ma pud peya onyomo, cwinye paro lok pa Rwot, kit ma myero eyom kwede cwiny Rwot. ³³ Ento dano ma doŋ onyomo, paro mere lok me lobo kit ma ebiyomo kwede cwiny dakone; ³⁴ tamme pokke i dul aryo. Dako ma pe ginyomo, nyo nyako, bene paro lok pa Rwot, wek ebed maleŋ i kome ki i cwinye. Ento dako ma ginyomo paro mere lok me lobo, kit ma myero eyom kwede cwiny cware. ³⁵ Awaco lok man pi konyowu, pe me geŋowu ageŋa, ento wek omi gin ducu owot kakare, cwinywu bene obed i kom Rwot, ma gin mo pe ywayo tamwu tero woko cen. ³⁶ Ka ŋat mo tamo ni kit bedone ki nyako ma ecikke kwede pe tye atir, ka marre dit i kome, en doŋ myero otim kit macalo cwinye mito, ka tamo ni obed ki meno. Bal mo pe iye, gitwero nyomme megi. ³⁷ Ento ka dano mo cwinye tek kun pe tye gin mo ma diye, ma doŋ bene noŋo otyeko mine me weko nyako-nu ma pe ginyomme, noŋo otimo ber ka ce twero loyo tamme. ³⁸ Kumeno ŋat munyomo nyako ma ecikke kwede noŋo otimo ber, ento ŋat ma pe onyomo nyako ma en ocikke kwede noŋo otimo ber makato. ³⁹ Cik geŋo dako ka pud cware tye kwo, ento ka cware doŋ oto woko, ci en bedo ki kare me nyomme ki laco mo mukene ma cwinye mito, ma tye i kin jo pa Rwot keken. ⁴⁰ Ci twero miyo dako-nu cwinye bedo yom makato ka ce en obedo kit meno ma pe dok onyomme; meno tamma, atamo bene ni atye ki cwiny pa Lubaŋa.