¹ Ka dano mo i kinwu tye ki lok mo i kom lawote, piŋo lewic pe make me pido ki dano-nu i nyim jo ma kitgi pe atir, ma ka pido kwede i nyim jo pa Lubaŋa? ² Pe wuŋeyo ni jo pa Lubaŋa aye ma biŋolo kop i kom dano me lobo? Ka wun kulu aye ma wubiŋolo kop i kom lobo, ci pe wuromo ŋolo kop mogo matitinone piwu kenwu? ³ Pe wuŋeyo bene ni wan aye ma wabiŋolo kop i kom lumalaika? Ento kop ma mako kwo ma watye iye-ni kono? ⁴ Ka ce wutye ki lok mogo me kwo ma watye iye-ni, piŋo wutero i nyim jo ma pigi pe tek bot jo muye Kricito? ⁵ Awaco lok man wek lewic omakwu. Pe tye ŋat mo maryek i kinwu ma romo tyeko lok ma tye i kin omegine? ⁶ Ma ka timo kit meno, nen, dano moni dok pido ki ominne kadi wa i nyim jo ma pe guye Kricito. ⁷ Ka wupido pido i komwu kekenwu kit meno, noŋo pe doŋ wupoto woko? Piŋo pe ber botwu me ciro gin marac? Bedo ber ka kono wuweko dano gubuyowu. ⁸ Ma ka timo kit meno, wun kikomwu aye dok wulokke wudok ka timo dano marac, dok bene wubuyo kadi wa utmegiwu. ⁹ Pe wuŋeyo ni jo ma pe kitgi atir-ri, ker pa Lubaŋa pe bibedo megi? Pe wuwek gibwolwu; kadi lutim tim kwele, nyo jo ma woro cal jogi, ki lutim abor, nyo jo ma buto ki co wadgi, ¹⁰ nyo lukwo, nyo luworo me jami, nyo lumero, nyo luyet dano, nyo luyak, ker pa Lubaŋa pe bibedo megi. ¹¹ Jo mogo i kinwu bene yam gubedo macalo jo meno. Ento wun doŋ gityeko lonyowu me bedo jo maleŋ, gityeko kwanowu ni wun jo ma kitwu atir pi nyiŋ Rwot Yecu Kricito ki piny Cwiny pa Lubaŋawa. ¹² ŋat mo biwacci, “Atwero timo jami ducu.” Ento meno pe nyuto ni jami ducu tye ki kony. “Atwero timo jami ducu,” ento pe abiye ni gin mo oloka adok opiine. ¹³ Wuwacci, “Cam tye pi ic, ki ic bene pi cam.” Ento gin aryo-nu ducu Lubaŋa bityekogi woko. Kom pe tye pi tim kwele, ento tye pi Rwot, Rwot bene tye pi kom. ¹⁴ Lubaŋa yam ocero Rwot woko ki i kin jo muto, en bicerowa woko bene pi twerone. ¹⁵ Pe wuŋeyo ni komwu aye obedo dul kom Kricito? Nen myero ka akwanyo dul kom Kricito, aloko odoko dul kom malaya? Pe twerre! ¹⁶ Pe wuŋeyo ni dano ma ribbe ki malaya doko kom acel kwede? Pien “gin aryonu gibidoko kom acel,” macalo yam gicoyo. ¹⁷ Ento ŋat ma ribbe ki Rwot, doko cwiny acel kwede. ¹⁸ Wubol tim kwele woko. Bal mukene ducu ma dano timo tye woko, pe gudo kome; ento ŋat ma timo tim kwele balo kome kene. ¹⁹ Pe wuŋeyo ni komwu aye ot pa Cwiny Maleŋ ma bedo i iwu, ma Lubaŋa omiyo botwu? Wun pe wutye piwu kenwu; ²⁰ doŋ giwilowu awila ki wel. Pi meno myero wumi komwu oket deyo i kom Lubaŋa.