¹ पावुहु अत्मिक दानाबोदल तुमा ओजाने रा जोजे ऐहकी मा इच्छा नाहा. ² जाहा तुमा परराष्ट्री आथे, ताहा जेहेकी चालवुले जातले आथे तेहकी तुमा इया मुक्या मूर्तीहोवे लिजातले आथे इ तुमाहाल मालुम हाय. ³ तियाहाल आय तुमाहाल आखतोहोका देवा आत्म्याकी गोगणारो केडोबी माअहु एहेकी आखतो नाहा का, यीशु शापित हाय आणे पवित्र आत्म्याबोददल केडोबी यीशु प्रभु हाय ऐहकी आखी शकतो नाहा. ⁴ आमी कृपादाना जुदेजुदे प्रकार हायज पेण आत्मो एकुज हाय.

⁵ तेहकी सेवा करूला जुदा जुदा प्रकार हाय, पेण प्रभु एकुज हाय.

⁶ आणे कार्यकेरूला जुदा जुदा प्रकार हायज पेण बाददाम बादो कार्यकेणारो तो देव एकुज हाय. ⁷ पेण आत्म्या प्रकटीकरण इं बाददाल उपयोग केरा खातोर एकएकाल देदलो हाय. ⁸ काहाका एगाहाल आत्म्याहाकी ज्ञाना वचन मिलेहे, आणे ऐगाहाल तिया आत्म्याइच्छा होच विद्या वचन देदली जाहे. ⁹ बिहिराल तिया आत्म्यापेने,आजी एगाहाल तिया आत्म्याहाकी हारो केरूलो कृपादान. ¹⁰ आजी एगाहाल चमत्कार केरमलो शक्ती ने बिहिराल भविष्य आखुलो शक्ती, ताहा बिहिराल आत्मा आमामेने फद आखुलो, आजी एगाहाल जुद्याजुद्या प्रकारा भाषा गोगुलो,आजी एगाहाल भाषांतर किईन अर्थ आखुली शक्ती देदली हाय. ¹¹ पेण इया बाददाम तो एकुज आत्मो कार्य केहे.तो आपु इच्छाहाकी बाददा जाहाल कृपादाने वाटी देहे. ¹² काहाका शरिर जियाप्रमाणे एकुज रिईन तिया अवयव खुबुज हाय आने एक शरिर अवयव खुब विईन एक शरिर हाय तियाहोचुज ख्रिस्त् हाय. ¹³ काहाका आपु शहुदी का ग्रीक आथा, गुलामम का सुटटा आथा तेबी एकाज आत्म्याकी आपु बाददाहा एकुज शरिराम बाप्तिस्मो वेलो हाय आणे बाददाहान एकुज पवित्र आत्माम पोरायाम आलेहे. ¹⁴ तेहकीज शरिर इं एकुज अवयव नेय खुबुज अवयव मिलीन एक हाय. ¹⁵ नाहा पाग अरवी, आय आथ् नाहा तियाहाल शरिर नाहा, ताहा तियापेने तो शरिरा नाहा ऐहकी नाहा. ¹⁶ आणे कान आखीका, आय डोओवो नाहातियाहाल शरिरा नाहा, ताहा तिया पेने तो शरिरा नाहा ऐहेकी नाहा. ¹⁷ बाददो शरिर डोओवो रेतोता ताहा ऊणायुलो किही रेतो आणे बाददो ऊणायुलो रेतो ताहा वास लेवुलो किही रेतो. ¹⁸ पेन शरिरामने एक एक अवयव देवाय इच्छापेने लागवी योवाला हाय. ¹⁹ ते बाददेज मिलीन एकुज अवयव वेते ताहा शरिर केहेडे रेतो.

²⁰ पेण आमी खुबुज अवयव हायता तेबी एकुज शरिर ऐहेडो हाय. ²¹ आने डोओवो आथाल आखी शकणारो नाहा का, माल तो गोरोज नाहा, तेहेकीज मुनको पागाल आखी शकणारो नाहा का,माल तुमा गोरोज नाहा. ²² ताहा ऊलटो, शरिरा जो अवयव खुबुज कोमजोर देखाहाय तो बिआपु जोजे. ²³ आणे शरिरा जो भाग आपु कोमी माना होमजुतेहे तियाहान खुबुज जाहाको माना कोवोर पोवतेहे आणे आपु कुरूप भागाल खुबुज जाहाको हारी शोभा मिलेहे. ²⁴ काहाका आपणे हे शोबेहे एहेजे देखाणारा अवयव गोरोज नाहा, पेन जी भागाले गोरोज हाय तियाहाल खुब जाहाको मानपान दिईन देवाय शरिर उबजावलो हाय. ²⁵ काहाका शरिराम केल्लोबी मतभेद नेय रा जोजे, ताहा अवयवाय एकबिहिरा सारखोज कालजी केरा जोजे. ²⁶ आणे एक अवयव दुखतो वेरीता ताहा तियाआरी बादा अवयवाहाल दुख वेहेआणे एका अवयवा गौरव वेअयो ताहा तियाआरी बाददा अवयव आनंद केताहा. ²⁷ आमी तुमा ख्रिस्ता शरिर विईन आने स्वोताहा केता अवयव हाय. ²⁸ आणे देवाय मंडळीम एहेडे काय नेमले हाय पेअला प्रेषित बिहारा संदेष्टे तिसरा शिक्षक, तीयाआरीचमत्कार, तियाआरी रोग काडवु कृपादाने, हेगाव्याम सेवा, व्यवस्था आणे जुद्याजुद्या प्रकारा भाषा गोगणारे उेहेडे नेमले हाय. ²⁹ बादेाज प्रेषित हाय का बादेज संदेष्टे हाय का बाददेज शिक्षक हाय का बाददेज चमत्कार केणारे हाय का? ³⁰ बाददाहालुज रोगे काडुलो कृपादाने मिलीह का बाददेज अन्य भाषा गोगतेहे का बाददेज अर्थ अखते का ? ³¹ पेन तुमा खुब मोडे कृपादाने मिलावाखातोर इच्छा केरा आने काहाका आय तुमाहाल ऐ खुब हारो मार्ग दाखावतेहो.