¹ Abino byo byaambo bya Yehoba byaishile kwi Yoela mwaana Petuela. ² Umvwaai bino, anweeba bakuluumpe, kabiji teelekai, anweeba bangikazhi boonse ba mu ntaanda. Bushe byauno musaango byakimweekapo kala mu mooba enu nyi naangwa mu mooba a bashaakulu beenu nyi? ³ Mukebabuule baana beenu kino, ne baana beenu bakabuule baana baabo, kabiji ne baana baabo bakabuule nkulo ikeya. ⁴ Byashaamo nzhiye, nzhiye ikataampe yaaja; byashaamo nzhiye ikataampe, mateete aja; byashaamo mateete, biloongolo byaaja. ⁵ Buukai, anweeba ba bitomi, ne kujila! Jilai na bulaanda, anweeba mutoma binyu, maambo binyu byatobala bebichibako. ⁶ Pakuuba kyaalo kyaiya pamushiji waami, na ngovu kabiji kwakubula nambala. Meeno anji o meeno a bookwe, kabiji uji na meeno a bookwe mukazhi. ⁷ Kabiji waleenga bujimi bwaami bwa min`aanza n`aanza ke mpuuzha ya masala ne kupasula bichi byaami bya mikuyu. Bebipobola ne kwibitaaya; ne misaampi yaayo yashaalatu ke yatookatu too. ⁸ Jilai noobe kisuungu wavwaala bivwaalo bya masaaka na maambo a lufu lwa mwaata waanji waafwa. ⁹ Mulaambu wa kajo ne mulaambu wa bya kutoma wachibiwaako ku nzuubo ya Yehoba. Ba n`aanga, ba miingilo ba Yehoba, naabo bajile. <sup>10</sup> Majimi be onaua; mushiji ubeena kujila maambo kajo bekonauna. Binyu bipya byauma; ne maanyi kafwaamo. <sup>11</sup> Ubai buumvu, anweeba ba njimi, ne kujijisha, anweeba ba mubyaala man`aanza n`aanza, ne ba wiinchi ne baale. Pakuuba kunowa kwa majimi kwaonaika. <sup>12</sup> Min`aanza n`aanza ya leela ne bichi bya mikuyu byauma; bichi bya mapomengulanchi,ne bichi bya luunkiindu, ne bichi bya maepo- ne bichi byoonse bya mu bujimi byaleela. Pakuuba lusekeelo lwa leela pa baana ba baantu. <sup>13</sup> Vwaalai anweeba beene bivwaalo bya masaka ne kujila, anweeba ba n`aanga! Jijishai, anweeba ba miingilo ba ku kyakusookelapo bitapisho. Iyai, mulaale kasa mwavwaala bivwaalo bya masaka, anweeba ba mwiingilo wa Lesa waami. Pakuuba mulaambu wa kajo ne mulaambu wa bya kutoma wachibiwaako ku nzuubo ya Lesa weenu. ¹⁴ Toongolai juuba ja kuzhikilwa na nzala, kabiji mwiite baantu ba kipwiilo kyazhila. Pwiizhai bakuluumpe ne beekala mu ntaanda boonse ku nzuubo ya Yehoba Lesa weenu, ne ku mujijila Yehoba. ¹⁵ Kyatamina jooja juuba! Pakuuba juuba ja Yehoba jafika kala. Jikeeya na loonaiko kufuma ku wabulume. ¹⁶ Naanchi kajo keechi bekachibako ku meeso etu ne nyi, ne lusekeelo ne buwaame naabo ku nzuubo ya Lesa weetu ne nyi? ¹⁷ Nkunwa yabolela muunshi, matala aikalatu, ne bipuujilo bya kuunduka, pakuuba kajo kaleela. ¹⁸ Ba n`oombe byo babeena kubiinza! Bipanyi byaabo bibeena kusuusuta maambo keechi biji na munyeemvu ne. Ne mataanga a mikooko abeena kumanama. ¹⁹ Anweeba Yehoba, najila kwi anweeba. Pakuuba mujilo wasooka nsono ya muungye, ne lubeebe lwasooka bichi byoonse bya mu majimi. ²⁰ Ne ba nyama ba mu majimi babeena kwi mutamina anweeba, pakuuba tukola twauma, ne mujilo wasooka nsono ya muungye.