¹ Imbai ntoloompita ya luseengo mu Ziona, kabiji ibai ya yakwibajimuna pa mutuumba waami wazhila! Lekai boonse beekalamo bazakame na mooyo, pakuuba juuba ja Yehoba jibeena kwiiya; kiine, jiji peepi. ² Jo juuba ja mfiinshi, juuba ja makuumbi ne mfiinshi ine. Noobe kyeeya kiiya na kukuumbana pa mutuumba, nzhita ikataampe kabiji yakosa ibeena kufweenya kwiipi. Keechi kwajiingapo nzhita noobe ayo ne, kabiji keechi kukeekalapo jikwaabo ne naangwa panyuuma yakupitapo makulo avula. ³ Mujilo ubeena kusooka byoonse kulutwe yaayo, kabiji ne kunyuuma yaayo kuji lubeebe lubeena kuteema. Mushiji uji nobe bujimi bwa Edena kulutwe yaayo, mino kunyuuma yaayo kuji jisaka jo baonauna. Kiine, kafwaako kikapulukamo ne. ⁴ Kumweeka kwazhita kumweekana noobe bambili, kabiji banyeema noobe ba pa bambili. ⁵ Bakiluka na kyoongo noobe aba ba pa makalaki peulu ya mituumba, noobe kiwoowo kyakisha kya mujilo kibeena kusooka neenge, noobe nzhita yakosa mukusaka kulwa. ⁶ Ku meeso abo baantu bakaakilwa ne biluungi byaabo bipiiluka. ⁷ Banyeema noobe biyaangala byakosa; bakaanjila bibuumba noobe bashilikaale; beendela, boonse mu ntaampulo imo, kabiji keechi baseendukamo ne. ⁸ Naangwa umo kushiinjika mukwaabo kuunsa ne; beenda, kila muuntu mujishiinda jaanji; bapomona masakwa ne kufuma mu munoongo ne. ⁹ Banyeemena pa muzhi, banyeema pa bibuumba, bakaanjila mu mazubo, kabiji batweelela pa bipeenze noobe ba ngivi. ¹⁰ Ntaanda isuunkena kulutwe yaabo, meulu azakama, juuba ne n`oondo byuuba mfiinshi, ne tubaanga baanga tuleka kusaama. <sup>11</sup> Yehoba usuuntula jiiwi jaanji kulutwe ya bashilikale baanji, pakuuba biyaangala byaanji byavujisha; pakuba bakosa, aba bakookela mikaambizho yaanji. pakuuba juuba ja Yehoba jo juuba jikatampe kabiji jakatazha. N`aanyi wakoonsha kukosa byojikafika? ¹² "Mino naangwa luno"- abino byo bya amba Yehoba amba- "Alulukilai kwi amiiwa na michima yeenu yoonse. Muzhikilwe na nzala, mujile, ne kuuba bulaanda." ¹³ Mutabaule michima yeenu keechi bivwaalo byeenutu ne, kabiji mwalulukile kwi Yehoba Lesa weenu. Pakuuba aye ye wa bibusa ne lusa, aye ubaanda kizhiingila kabiji wayuula na butemwe bubula kwaaluka ne uleka kuuba lukabiisho lo a fuukwile. ¹⁴ N`aanyi wayuuka? Kana ukabweezhamo muchima waanji ne kuleka kuuba kyo a fuukwile, ne kwimushiilako bibusa byo akapita, mulaambu wa kajo ne mulaambo wa byakutoma byo bya kulaambula kwi Yehoba Lesa wenu nyi? <sup>15</sup> Jizhai ntoloompita mu Ziona, mutoongole juuba ja kuzhikilwa na nzala ne kwiita baantu kwiikala kipwiilo kyazhila. <sup>16</sup> Koonkanyai bakuluumpe; koonkanyai ne baana ne baana balukeke. Lekai babeena kusoongolwa balupuke mu mazuubo abo, ne babeena kusoongola balupuke mobeekala. <sup>17</sup> Lekai ba n`aanga, ne ba miingilo ba Yehoba, bajijile pakachi ka bukoonde ne kya kusookelapo bitapisho. Lekai baambe amba, "Bobilaiko lusa baantu beenu, anweeba Yehoba, keechi mulengele bo mwanoonka kweendelekwa ne, amba byaalo bi beendeleke ne. Maambo ka o bafwainwa kwaambila mu byaalo bikwaabo amba, 'Lesa waabo uji pi?"' ¹⁸ Poonkapo Yehoba wasakishe ntaanda yaanji kabiji wiboobijile lusa baantu baanji. ¹⁹ Yehoba wakuumbwile baantu baanji amba, "Talai, amiiwa nsa kwimutumina kajo, ne binyu bipya, ne maanyi. Ne anweeba mukatoondwa naabyo, kabiji keechi nkemuleengela kweendelekwa mu byaalo ne. ²⁰ Nsakwibafumyako be milukuka ba kukabeta ka ku buyeke ne kwiibatwaala kwaleepa na anweeba, kabiji nkebatwaala mukyaalo mwabula meema mu masala. Aba bataangila ku nzhita bakaya mu kaluunga ka kumusela, ne bakunyuma bakaya mu kaluunga ka kumuzhika. Mibiji yaabo ikafuuluka, ne kunuunka kwaabo kwatama kukoomvwanyika." Kiine, baubile biintu bikataampe. ²¹ Kuchiina ne, obeewa ntaanda; sekela ne kusaangalala, pakuuba Yehoba ukooba biintu bikataampe. ²² Kuchiina ne, anweeba banyama ba muungye! Maambo nsono ya muungye ikasapuka, bichi bikapaanga bipaangwa byaabyo, ne bichi bya mikuyu ne min`aanza n`aanza ikapaanga bipaangwa byavujisha. ²³ Sekelai, anweeba baantu ba mu Ziona, saangalelai mwi Yehoba Lesa weenu. Pakuuba aye ukemupa mvula wavula ne kwimunokeshesha, mvula wa pakimye kyafwainwa ne mvula wa muunsulo byoonka byo aubile ne kala. ²⁴ Matala ayuula na wiinchi, ne bileo bikayuula na binyu bipya ne maanyi. ²⁵ "Amiiwa nkabweezha kajo ko bajile mu yooya myaaka ku nzhiye yeenda kisaamba- nzhiye ikataampe, nzhiye ijaana, kabiji nzhiye yonauna- nzhita ya nzhiye yaami yo ne mutumine mwi anweeba. ²⁶ Mukaja byavula ne kwiikuta, ne kutuumbijika jizhina ja Yehoba Lesa weenu, aye wauba bya kukumya mwi anweeba, kabiji keechi kaleengesha buumvu baantu baami ne. ²⁷ Mukayuuka amba amiwa nji moonka mu Isalela, kabiji mukayuuka amba ne Lesa weenu, kabiji keechi kujipo Lesa mukwaabo ne, kabiji keechi kalengesha buumvu baantu baami ne. ²⁸ kulutwe nkeetulwiila mupashi waami pa baantu boonse, kabiji baana beenu ba balume ne ba bakazhi bakaulaanga. Bakuluumpe beenu balootanga bilooto; baana beenu bakamonanga bimweesho. ²⁹ Ne ku ba miingilo ba bakazhi ne ba balume, mu oa mooba nkebeetulwiila mupashi waami. ³⁰ Nkamweesha byakukumya mwiulu ne pa ntaanda, mashi, ne mujilo, ne mashiki a bwiishi. ³¹ Mute ukaluke ke mfiinshi ne mweenzhi ukaaluka ke mashi, juuba jikataampe kabiji jakatazha ja Yehoba sa jikyaangye kufika. ³² Boonse bakeeta pa jizhina ja Yehoba bakapuluka. Pakuuba pa mutuumba wa Ziona ne mu Yelusalema mukeekala bakashaalapo, byonka bya amba Yehoba, kabiji mu booba bakapuluka, mukeekala booba bo akeeta Yehoba.