¹ Ino ku makani ezipego zyo muya, nobenzuma, nsiyandi kuti mutambiwti. ² Mulizi kuti chindi nchimwachili bagani, mwali kongelezigwa okuso lodelwa kuzibumbwa zitakanzi kwammbola ne. ³ Mukambo aka ndiyanda kuti mumvwisisisye kuti takwe muntu naba omwi wambola mu muya wa Leza ukonzya kwamba kuti, Jesu mwami; ati kwinda mu muya usalala. ⁴ Ino kuli misyobo yezipego, pele muya nguwenya, ⁵ ape kuli milimo yandene-andene, pele mwami nguwenya. ⁶ Kuli nguzu zyandene-andene, pele Leza ngumwi uyibelesya yense mubantu bense. ⁷ Kuli umwi oumwi kuliyubulula ko muya kwapegwa kuti bantu bense bagwasigwe. ⁸ Oumwi ulapegwa o muya ookwambola chobusongo, kuti umwi chokwambola ko luzibo mu muya nguwenya. ⁹ Umwi ulapegwa muzumino mu Muya nguwenya kuli umwi zipego zyokusilika mu Muya omwi. ¹⁰ Kuli umwi nguzu zyokucita malele, kuli umwi businsimi, kuli umwi chokuziba myuya yandene, kuli umwi chokwambola mu ndimi zimbi, okuli umwi chokupandulula ndimi ezi. ¹¹ Muli ezi zyense Muya nguwenya ngubeleka, ape nguwabila muntu umwi oumwi mbuli Muya mbuyanda ¹² Nkambo mbubonya mbuli mubili mubili omwi okuba zizo zinji, ezizo zyo mubili zyense nanga kuti zinji, mubili ngumwi buyo, mbubonya namuya Okilisito mbwabede. ¹³ Nkambo mu Muya omwi twakapapatizigwa mu mubili omwi nibaba ma Juda, nibaba ma Giliki, nibaba bazike, nibaba bangunukide, nkambo twense twakapegwa kuti tunywe cho Muya nguwenya. ¹⁴ Nchonzyo, mubili tujesi chizo chomwi buyo, pele nzinji. ¹⁵ Kuti igulu lyamba kuti, mbwetainsi jansa, tandisi wo mubili; nikuba namuya nchibela chomubili. ¹⁶ Kuti na kutwi kwamba kuti, mbwetainsi linso, tandinsi wo mubili, nikuba namuya nchibela chomubili. ¹⁷ Kuti na mubili wense niwali linso, ino kuswilila nikwali kuti? ¹⁸ Pele mbubonya mbuli mbukubede, Leza wakabamba zizo mumubili chimwi e chimwi mbuli mbwakasala. ¹⁹ Ino kuti zizo zyense nichali chizo chomwi buyo, ino mubili niwali kuli? ²⁰ Mbuli mbukubede, kuli zizo zonji, pele mubili ngumwi. ²¹ Linso talikonzi kwambila janza kuti, 'Nsikuyandi ne,' na mutwe lwawo kwambila zijumba kuti, tandimuandi ne. ²² Pele nchonzyo, zizo zyomubili zilangika kuti tazijesi nguzu, zuayandika loko. ²³ Anzizyo zizo zyomubili nzituyeya kuti tazilemekeki, tula zilemekaloko. Anzizyo zizo zyesu zyusisya nsoni, zilainda kupegwa bulemu. ²⁴ Pele zizo zyesu zyebeka zilijesi kale bulemu. Leza nguwanunganya mubili. mponya zizo zitakwe bulemu, nzizyonya wakazipa bulemu, nzizyonya wakazipa bulemu bupati, ²⁵ kutegwa kutabi kwandana mubili, pele kuti zizo zyense zigwasyane. ²⁶ Kuti na chimwi chizo chachiswa, zizinyina zyense zilachiswa anzizyo. Kuti na chimwi chizo chakutekwa, zizonyina zyense zilasekelela antomwi. ²⁷ Ino nywebo muli wa Kilisito, umwi oumwi wenu nchizo chawo. ²⁸ Mponya Leza wakabika mulusangano chokusanguna Bapostoli, lwabili Basinsimi, olwatatu Bafundisi; kusule lyabo micito ya malele zipego zyokuponya, milimo igwasya bamwi, misyobo yokusolwedela, milimo igwasya bamwi, misyobo yokusolwedela bantu, emisyobo yandene ye ndimi. ²⁹ Ino bense mbapositolo? Ino bense mbasinsimi? Ino bense mbajundisi.' Ino bense balaata malele? ³⁰ Ino bense balijesi chipego chokuponya? Ino bensebalambola mu ndimi? Ino bense balapandulula? ³¹ Ine, pele amiyandole chenguzu zipego zipati kwinda. Amibo ndilamutondezya nzila mbotu kwinda zyense.