^{1 3} Paulo, wakaitwa o Jesu kilisitu kuti abe mwaposito kwaindila mukuyanda kwa Leza, ape Sosthenes muzyalwama, ² Kucikombelo ca Leza ku Colinto, ⁴ Cindi cense ndilumbaizya leza wangu akambo kenu kuti leza wakamubida oluse olo kilisito jesu ndwakamupa. ⁵ Wakamuvubya munzila ili yense, mu myambo yense ape abusongo bwense, mbonyina mbuli ⁶ bumboni bwa kilisito bulizibikene kale kuli nywebo akati kenu kuti mbwe nconzyo. ⁷ Nikuba namutambulide cipo comuya mbuli mbumulindilila kuboola ko mwami wesu jesu kilisito. ⁸ Uyocita kuti ape mushoma cenguzu kusikila kumamanino, mukuti mutakabikwi kambo mubuzubo obo bo mwami jesu kilisito. ⁹ Leza ulashomeka, wakamwita kuti muyanzane o mwami wakwe, jesu kilisito mwami wesu. ¹⁰ Ino ndamukumbila nobazyalwa ma, kwinda muzina lyo mwami wesu jesu kilisito, kuti mwense mu zuminane, ape kutabi kwanzana akati kenu. Ndakumbila kuti mujatane antomwi o muyeyo womwi ape omukambo komwi. ¹¹ Nkambo ndakambilwa kuti kugama nywebo, nobazyalwama, abantu bokukilowe kuti kuli kukacilana akati kenu. ¹² Ncindamba ncokuti: oumwi oumwi wenu wamba kuti,"ndali wa Paulo,"ndili o Apolosi, Na ndili wa Kefasi,"na"ndiliwa kilisito. Nkoluti kilisito uli anzeene anzene? ¹³ Nkokuti Paulo wakakankamininwa nywebo? nkokuti mwakabbabbatizigwa muzina lya Paulo. ¹⁴ Ndilumba leza kuti takwe umwi wenu ngundakabbabbatizya, kunze lya kilisito o Gayosi. ¹⁵ Eci cali cokuti kakutakwe umwi uyoamba kuti mwaka bbabbatizigwa muzina lyangu. ¹⁶ (Ndaka bbabbatizizya ape beganda ya Sitefanasi. kunze kwe namu, tandizi kuti na ndaka bbabbatizya bamwi) ¹⁷ Nkambo kilisito takwe nakandituma kubbabbatizya ati buyo kukamboka makani maboyu-kutainsi mukucejela kokwamba, mukucilila kuti cingano ca kilisito citakasyali kacitakwe nguzu zyaco. ¹⁸ Kumajwi amba zyecingano mbufubafuba kuli abo balikumana. Kono akati kaabo bafutwidwe, ninguzu zya leza. ¹⁹ Nkambo cililembedwe,"Ndiyonyonyona busongo bwabasongo. Ndiyolobya mano abasimano. ²⁰ Ino uli kuli muntu musongo? Ino uli kuli wiiya? Ino uli kuli sikukazyana wansi eyi? Nkokuti leza wakasandula busongo bwansi kubufuba-fuba? ²¹ Nkambo insi mubusongo bwayo tiyali mwizi leza, leza wakabotelwa kufutula abo bashoma kwindila mubufubafuba bokukambokilwa. ²² Bajuda babuzya kuyanda kubona zitondezyo ape bagiliki bayondola busongo. ²³ Kono tulakamboka kukankaminwa kwa kilisito, cilebyo kuba Juda obu fubafuba kuli bamasi. ²⁴ Kono kuli abo leza mbakacita, ba Juda aba Giliki, tulakamboka kilisito mbuli nguzu o busongo bwa leza. ²⁵ Nkambo bufubafuba bwaleza mbusongo kwinda bantu, ape butete bwa bwiinda nguzu zyabantu. ²⁶ Amubone bwitwe bwenu, nobazyalwama. Kutainsi kuti bunji bwenu basongo kwindila ku nyama. Kutainsi kuti bunji bwenu balenguzu. Kutainsi kuti bunji bwenu bakazyalwa abantu beni beni. ²⁷ Kono leza wakasala zintu zyobufubafuba zyansi kusya basongo. Leza wakasala eco citete kubantunsi kuti ausye nsini eco cilenguzu. ²⁸ Leza wakasala eco cilimunsi cisampwedwe munyika mane wakasala e zintu ezyo nzibatabali, kweta kutakwe zintu ezyo zibalwa kuti nzezizyo zyeni zyeni. ²⁹ Wakacita namu mukuti kakutakwe muntunsi unga wayeya kulisumpula kuli nguwe. ³⁰ Nkambo kuco leza ncakacita, ino muli mulikilisito Jesu, oyo wakaba busongo bwesu kuzwa kuli leza. Wakaba mululami wesu, musalazi, ape sikutunununa. ³¹ Cili mbuli mbwamba malembe kuti<Ämumuleke oyo ulikankaizya, alikakaizye mu mwami.