¹ Chonini yobe ku wethioni naha authambela, yobe munu, yobe uka wanena bakweni milonga, omu chije bene chi u wanenaho mukweni mulonga cho muli yobyoni chipwa chithingo. Mwafwa yobe uwanena bakweni milonga a byuma bije bene nobe lalo ukalingi. ² Olojo tuthzubuka ngachije ngwentu kuthompa cha Njambi chakala kwetheketha na bjuthunga ali boshe baje bakalingi byuma bya kufwa ngachije. ³ Oloni thinganyeka ngachije, yobe munu, yobe mukaku wanena milonga baje bakakulinga byuma bya kufwa ngachije nameme yobe lalo bikebyo bi ukalingi nobe. Cho kumani yobe uka pandukaho kuku thompa cha Njambi? ⁴ Indi yobe uli na ku yeluwitha bukama bwa kabumbi kendi tai, indi Kachitiko kendi kaje ka chili naku tatetha, indi kuthimpa chendi indi? Kumani kuwa tanekeyeye ngwe kabumbi na kakelako manganoni ka kutwale ku kutengunuka kuku linga bya bibi? ⁵ Oloni amulongoni wa ku kaluwitha manene mbunge yobe ije lalo ku itondo ku tenguluka cho uli na kulitulikiloni yobe ba benya bukalu a litangwa lya bukalu, tu tumbule ngwetu, lije litangwa lya ku jomboloka kwa kuthompetha kwa Njambi kwa ku thungama. ⁶ Ikeyoni aka fweta kuli umo na umo mu kwetheketha na bilinga byendi: ⁷ chojo kuli bajoni aba kwetheketha na ku kakateya mukulinga bya bibwa amo ba tondethethele bumpau, na kathingimiko, na bije bya kwilila, chojo nendi aka bana mwonyo wa myaka yoshe. ⁸ Oloni kuli baje baka kulishaka bakebo babenya, na bajoni baka kubyana buthunga olojo bowonoka kuli bije kubya thungamene, kuli baje boshe kuka ija bukalu na mateoeo a kutewetha. ⁹ Njambi a kanena kayando kakama na bukalu bwa kama kumyonyo ya banu boshe baje banakala na kulinga bya bibi, kuputukila bene kuli ba Yunda, cholalo na kuba Ngiliki. ¹⁰ Oloni bumpau, kathingimiko, na kwoloka bikahijoni kuli boshe baje bali na kulinga bya bibwa, kuputukila kuli ba Yunda, na kweta lalo na kuli ba Ngiliki. ¹¹ Mwafwa Njambi kethi kwandumuna. ¹² Omu boshoni baje bana bulumuna a kujeneka ku tanekeya mashiko cho na kuthsa lalo baka thsila anja ya mathiko, oloni bajoni bana bulumuna oku bana tanekeya laja mashiko cho ajebene mashiko a kaba hitha. ¹³ Mwafwa kethi ngwe baje bali na ku tolilila lika ku mashiko bakeboni banapu ba ku thungama ku mesho a Njambi, oloni baje bene baka kulinga muje mwaya mashiko bakeboni bubaka thambetha. ¹⁴ Mwafwa umononi ngwe baje ba Ngentile, bajoni kubakele na mashiko, kuthumuka mubukuma bwa bunu balinga bije bina litombola namashiko, cho bapwoni bakebo bane mashiko kuli bakebo babenya, nameme bakebo ku bakele na mashiko. ¹⁵ Mwafwa na mukulinga muchifwechi cho bakebo bana sholola ngwe bilinga byoshe bije bya litombola na mashiko babithoneka laja mu bimbunge byabo. Chojo na chitakutaku chabo chili na ku bana bukaleho, cholalo na bithinganyeka byabo bilyoni na kuba wanena milonga bakebo babenya nambe kuba thambetha kuli bakebo babenya ¹⁶ na kumesho a Njambi. Nachijonini chiak sholokoni a litangwa lijoni Njambi aka jombolola bijoni biba shweka banu boshe, kwetheketha na muthzimbu wange wa ubwa, kwitila muli Yesu Kilisitu. ¹⁷ Oloni nga yonbe uli thana ngwobe uka Yunda na ku thindamena a mashiko na kulithziba muli Njambi, ¹⁸ naku thzubuka chitzango chendi na ku tabetha bijoni bya bibwa manene mwafwa yobyoni ba kulongetha mashiko; ¹⁹ cho lalo nga umononi yobe chilibene una chi tabela yobebabenya ngwobe unapu u ntwama wa ku twamenena tupuputwa, lyethzi kuli boshe baje bali mu lithuthulungu, ²⁰ namuka kunangula kuli bilema, na mulongethi kuli banike babandondo, cholalo ngwe ngwabo yobyoni uli nacho chifwa cha mangana na buthunga mu mashiko, chonini ebi byoshe bili na kuku kwatha bationi mu ngila ije yuli na ku yoyelamo yobe? ²¹ Chojo yobyoni uka longetha bakweni, kumani kuwapandele kulilongethoni nobe babenya lalo ndi? Indi kumani yobyoni ukaleke banu ngwobe kethi ba ibe, cho kumani yobe wiba lalo? ²² Indi yobe ukendeka ngwobe munu kapandele kulinga bukwithzi, cho kumani yobe lalo uka linga bukwithzi? indi yobyoni wa thzinda tumponya, cho kumani lalo u pukula matembele? ²³ Indi yenioni baka ku lishangala kulama mashiko, kumani munatha lalo ku shaula Njambi kwitila mu ku jeneka ku thingimika mashiko? ²⁴ Mwafwa "lithzina lya Njambi banali shaula a kati kaba Njentile amulonga weni," ngwe muje bene bachi thoneka. ²⁵ Mwafwa ku tuhuka chikalalika na bukwithi ngwoni neni lalo muthingimika mashiko, olojo ngwe yenioni ku mu kabangeya mashiko, choni na kutuhuka kweni kutenguluka kujeneka ku tuhuka. ²⁶ Cho, oshongwe, ujoni munu wa kujena ku tuhuka a nyunga bije mashiko a nendeka, ²⁷ cho kumani kuje ku jeneka ku tuhuka chendi kuba chambatoni kupwa ku tuhuka? Ujoni munu wa klulinga kathi wa themukilile ka tuhukileho kathoni ku na ku shulithilila mashiko? Echoni chi natha kwija a mulonga wa kulinga yeni muli na mashiko a ku theneka na kutuhuka, olonini nameme chinapu ngecho yeni lalo baka kwonwa ku kabangeya mashiko! ²⁸ Mwafwa kethioni mu Yunda wa kwetaho uje wa kulinga a lisholola a kamwa lika; nameme bene ku tuhuka chije cha ku mushuni lika. ²⁹ Oloni mu Yunda wa kwetaho kubangoni uje wa mukati, chojo na kutuhuka lalo cha mbunge, mu Sipilitu, kethi mu mukanda lika. Chojoni na munu wa ngachijonini bakamu shangathzala kuli Njambi babenya kethi lalo ku banu na bakwabo.