¹ Chojo cha sholokele a Sapalalo omwoni Yesu wakele na kwita mumaya a tiliku, cho bandongethi bendi bakele na kunona mitwe ya tiliku, ku ithsena mu maboko abo, na kulya binona. ² Oloni bamo ba baje ba Faliseo bendekele ngwabo, "Bikajo muli na kulingila chuma chije ku batabethele kulinga a litangwa lya Sapalalo?" ³ Mu kuba kumbulula, Yesu wendekele ngwendi, "Kumani yeni kanda muchi chitandao laja chije chalingile Ndabiti omu wathsile njala, ikeye na baje banalume ba kele nabo? ⁴ Omu wa kobelele mu njubo Njambi na kunona makende aje achikombelo na kulya amo, cho lalo waneneko amo kuli baje banu bakele nabo mangana balye, nambe ngocho ba chitabethele lika kuwalya kuli tupilisitu." ⁵ Cho wendekele kuli bakebo ngwendi, "Muna Munu napu Shukulu wa Sapalalo." ⁶ Chojo chasholokele a litangwa likwabo lya Sapalalo omu wa kobelele mu Sinangonge na ku longetha banu baje bakelemo. Mwakele munalume wa liboko lya chilyo lya kuthekwa. ⁷ Bakakuthona na ba Faliseo ba mukengethethele manene ba mone ngwe a kangula umo munu ha Sapalalo, cho mangana ba wane ngila yaku muwanena mulonga. ⁸ Oloni ikeye wa tanekeyeye bibakele na ku thinganyeka cho wendekele kuli uje munalume wa liboko lya kuthekwa ngwendi, "Katuka cho wimane hano akati kamunu woshe." Chojo uje munalume wa katukile na kwimana aje. ⁹ Yesu wendekele kuli bakebo ngwendi, "Nji mihula, ba chitabetha a litangwa lya Sapalalo kulinga mwa mubwa indi ku bulumuna, kuyoyetha mwonyo indi ku unyongetha?" ¹⁰ Cho wabehwile boshe na kwendeka kuli uje munalume ngwendi, "Tandubula liboko lyobe." Cho nendi wa lingile bene ngocho co na liboko lyendi lya kangukile. ¹¹ Oloni bakebo ba lubalele manene cho bendekele kuli umo na mukwabo kuyongola bibanapande kulinga Yesu. ¹² Chojo cha sholokele kuma tangwa aje omwo wa londele kulilundu nakuya na kulonmba. Wa twaleleleo kulomba buthsiki bwoshe kuli Njambi. ¹³ Omu kwakile, wathanene ba ndongethi bendi kwija kuli ikeye, cho wangwile likumi na ba bali muli bakebo, aboni wa lukile lalo ngwendi miluwa. ¹⁴ Nathzina abaje miluwa akele Simoni (uje ya lukile lalo Petulu) na ndolome yendi Anduleo, Yakomba, Yomano, Filipu, Mbatolomeo, ¹⁵ Mateo, Tomasi, Yakomba muna Alufeya, Simoni ou bathanene Lishwalale, ¹⁶ Yundasi muna Yakomba, na Yundasi Isikalyote, uje wa mwendekele bungungu. ¹⁷ Chojo Yesu wa thikumukile nabo kulunda a lilundu cho wemanene a mwela wa kushalama amo na mbunga yakama ya bandongethi bendi na bwingi bwa banu kutunda ku Yundea na Yelusalema na ku ngenge ya Tile na Sindoni. ¹⁸ Bethzite na kutolilila kuli ikeye na kuba kangwitha ku mishongo yabo. Na banu baje bakele na minthzinthzime yaku jela na bakebo lalo ba kangukile. ¹⁹ Munu woshe mumbunga bakele na kwetheka ku mukwata mwafwa binthzili bya ku kangwitha bya kele na kutunda muli ikeye, cho wa bakangwile boshe. ²⁰ Cho wakelengele kuli ba ndongethi bendi na kwendeka ngwendi, "Mwabethzika yeni bakakuutwa, omwo bu mwene bwa Njambi bunapu bweni. Mwabethzika yeni muli na njala athimbu ino, mwafwa muka kuta. ²¹ Mwabethzika yeni muli na kulila thimbu ino, mwafwa muka bwaelela. ²² Mwabethzika yeni omwoni ba mithzinda, naku miyengula na kumituka na ku byana mathzina eni kupwa a mabi, mwafwa ya Muna Muna. ²³ Bwaeleleni a lityangwa lije na kulithamba, mwafwa chili bene muka tambula fweto ya kama mwilu, mwafwa na bakulu babo mukemwo bene muba yandethelelel tupolofita. ²⁴ Oloni lubinda kuli yeni muna fuku, mwafwa yeni mu natambwila chimweja kuhwima. Lubinda lweni yeni muna kutilachimweja, mwafwa kulutwe mukathsa njala. ²⁵ Lubinda lweni yeni muna bwaelela athimbu ino, mwafwa muka kala na buthiwa na kulila kulutwe. ²⁶ Lubinda lweni yeni omu banu boshe bali na ku mishangala, mwafwa omwo mukemo bene na ba kulu babo bakele na kuchilinga kuli baje tupolofita ba makuli. ²⁷ "Oloni njili na kwendeka kuli yeni muli na kuthzibilila, thzemeni bitothzi beni na kulinga mwa mubwa kuli baje ba mithzinda. ²⁸ Kwithuleni baje ba mithinga na kulombelela baje ba miyandetha. ²⁹ Kuli uje ya kupupa ku nana imo, mwane lalo na ikwabo. Umona ngwe munu akunyeka kathzalo kobe, cho kethi munu bindike na mukanjo wobe lalo. ³⁰ Ana komunu woshe uje a kulomba. Chojo ngwe munu a kunyeka chuma chobe, kethi u mwihwule ku kwilwithila cho lalo. ³¹ Muje mu ushaka banu ba kulingile cho, nobe lalo ba lingilemo. ³² Chojo ngwe uthzema lika banu baje ba kuthzema yobe, cho bungulu muka bu unalingi? Mwafwa nambe baje baka kulinga bubi ba kathzema baje ba bathzema. ³³ Cho ngwe ulinga mwa bubwa kuli banu baje ba milingila mwa mubwa lika, cho bungulu muka ulinga? Mwafwa nameme baje ba ka kulinga bubi mukemwo bene ba kalingi. ³⁴ Oshe u kumwitha lika banu baje ba u kulaela ku kufweta, cho bungulu muka ulinga? Nambe ba kabubi baka kumwitha ku baka kulinga bubi, baka tambula nge muje muba na nanelele. ³⁵ Oloni thzemeni bitothzi beni na kuba lingila mwamubwa. Kumwitheni, mwonowa ku kulaela ku milwithila, cho na chikandelela chikapwa cha kama, cho mukapwa bana bou wa mwilu, mwafwa ikeye hendi hendi a ka tetela baka kujeneka ku kandelela na banu ba babi. ³⁶ Kaleni na bin'eke, ngechi mwa ishweni wapwa wa bin'eke. ³⁷ Kethi mu thompethe, cho neni kuba ka mithompetha. Kethi muithe cho neni kuba ka mitha. Thambetheni bakweni, cho neni ba ka mithambetha. ³⁸ Aneni, cho neni ba kamyana cho. Chetheketho cha chibwa--cha kuthindakana, ku nyukumuna hamo na kushulilila--iketikila mu bindeya byeni. Mwafwa chetheketho chimu pangeyha, baka chethekela lalo ali yeni." ³⁹ Cho lalo waba telelele chithimo. "Kuma kapuputwa atha ku twamenena kapuputwa na mukwabo? Oshe alingamo,nbabali boshe ba wila mu bwina, kethi mukemwo ndi? ⁴⁰ Ndongethi ka tubakanene mulongethi wendi, oloni woshe ndongethi oshe na manetha bilongetha a kapwa nge mulongethi wendi. ⁴¹ Bikajo umwena ka chishoni ka kandodo kali mulisho lya mukweni, oloni u nonowa kumona mungowa uli mulisho lyobe ba benya? ⁴² Wendeka bati kuli ndolome yobe, 'Ndolome, nji tabethe njitundithe ka chishoni ka kandondo kali mulisho lyobe,' ohoni yobe babenya kuwethi na kumona mungowa uje uli mulisho lyobe babenya? Obe mukakukwitha! Chakulibanga tunditha mungowa uli mulisho lyobe ba benya, athinoni wathe kumona bwino na ku tunditha kachishoni ka kandondo kaje kali mulisho lya ndolome yobe. ⁴³ Mwafwa kukwethi muti wa ubwa uje wima bushuka bwa kubola, nameme kuli muti wa kubola uje wima bushuka bwa bubwa. ⁴⁴ Mwafwa muti woshhe u nthsimanena a chifwa cha bushuka bukemiko. Mwafwa banu kubatha kubuya bushuka bwa ku mukuyu ku muti wa mambimbo, na meme kubuya bushuka bwa ku mukuyu ku muti wa mukoma. ⁴⁵ Munu wa mubwa kutunda ku bufuko bwa bubwa bwa mbunge yendi aka lingi bya bibwa, na munu wa mubi kutundilila ku bufuko bwa bubi bwa ku mbunge yendi aka lingi bya bibi. Mwafwa kutundilila kubwingi bwa ku mbunge yendi kanwa kendi kakendeka. ⁴⁶ "Bikajo muka njithanena, 'Shukulu, Shukulu,' ohoni kumwethi kwononokela bije byuma binji kendeka? ⁴⁷ Woshe munu ou aija kuli yange na kuthziba mathzwi ange na kuwononokela, nji mileka chifwa chendi. ⁴⁸ Inapu nge munalume atunga njubo, ou wendile hathi manene cho wa tungile lubula lwa njubo a limanya lya ku kola. Libathzi mulyethzile, muta wa kama wa lipupile ha ije njubo oloni kuwa iningangethele, mwafwa ba itungile bwino. ⁴⁹ Oloni woshe munu ou athziba mathzwi ange cho ajeneka ku wononokela, napu nge munalume ou wa tungile njubo a kamwa ya libu kwa kweneka lubula. Omwo muta wa kama wa mema wa lipupile a ije njubo ya lundumukile."