¹ Yesu wakengele cho wa mwene banalume baka bufuko baje bakele nakulambula bwana bwabo munjibo ya Njambi. ² Cho wamwene lalo fwile umo wa chihutu ali anakulambula tumbongo tubali. ³ Cho wendekele ngwendi,"Mwabuthunga njimileka ngwange,ou fwile wa chihutu nalambula mwakama kutubakana boshe. ⁴ Aba boshe banalambula bwana bwabo bwa kuli thala ku bufuko.Oloni ou fwile,mubuhutu bwendi,nalambula byanakele nabyo bya kulikwatha babyo." ⁵ Ngwe omwo bendeleke bya tembele,bainayi bwahetha na bubwa bwa mamanya na milambu,wendekele ngwendi, ⁶ "Oloni ha byuma ebi muna munu,thimbu ikaija omwo kukwethi limanya libakathetha ha likwabo lije baka thiula." ⁷ Cho bamwihilwe,ngwabo, "Mulongethi, mwaka mukajo bika lingiwa ebi byuma?" Bikajo bitghzibukitho tukathzibuka ngwetu ebi byuma bilinakondeka kulingiwa?" ⁸ Yesu wabakumbulwile ngwendi,"Cho nyanyameni linga linga kethi bamikwithe.Bababengi bakaija mulithzina lyange,nakwendeka ngwabo, 'Yange; na, 'Thimbu enete.' kethi mubakabangeye. ⁹ Omwo mukathziba binthzita nakulitengulukila,kethi mukali jujukwile,ebi byuma binapandele kulingiwa tahi,oloni mamanethelelo kuwaka lingiwa oho bene." ¹⁰ Cho wendekele kuli bekebo ngwendi, "Lifuti lika tengulukila lifuti likwabo,cho bumwene bukalwitha bumwene bukwabo. ¹¹ Cho kukakala mandunduma akama, cho njala ya lyangengele na mishongo ya kutewetha mum byela bya bingi.Kukakala byuma bya kutewetha na buthzibukitho bya kama bikatunda mwilu. ¹² Oloni thimbu kanda byuma ebi bisholoke,baka mikwata na kumiyandetha,bakamitwala kuma Sinangonga na mutu menga,baka mineha ha mesho a bimyene na bangubulu hamulonga wa lithzina lyange. ¹³ Ikapwa thimbu yeni ya kwambulula buthunga bwange kuli bakebo. ¹⁴ Ngachije bene byakeni mubi mbunge byeni kethi muyongwele chimweja ngweni bati tukendeka, ¹⁵ Omwo njikamyana majwi an mana linga bithothzi bene kubakatha kubyana nambe kulinga bimata. ¹⁶ Oloni baka myana kufuma ku bithemi,bandolome,babushoko,na babauthamba,cho bamo muli yeni bakaba thsiya. ¹⁷ Cho babengi baka mithzinda mwafwa wa lithzina lyange. ¹⁸ Oloni nambe ching'ambu chimo cha ku mutwe weni kuchikanyongo. ¹⁹ Mukukoletha kweni muka wanenemo mwonyo yeni. ²⁰ "Omwo mukamona Yelusalema banai thzenguluka ku maswalela,Cho thzibukeni ngweni mu nyongwa kwayo kuli muyehi. ²¹ Cho baje bali mu Yundeya bakatewela ku minkinda,baje bali munganda bakatundemo nabaje bali hanja ya nganda kethi bakakobelemo. ²² Mwafwa awa akewo matangwa a kunyanyametha,linga boshe byuma bibasonekele bikalishulithilile. ²³ Cho lubinda ku banakathzi bakakala namemo na baje bakajamwetha mu matangwa aje! mwafwa mukakala tuyando twakama mu lifuti, kubukalu bwaba banu. ²⁴ Bamo bakathtsa ku mukwale,cho bakaba twala mu mafuti a bundungo, cho Yelusalema bakailyatelela kuli ba kamafuti kweta noho thimbu yabo bakamafuti ika lishulkithila. ²⁵ "Cho kukapwa bithzibukitho bika sholoka ku litangwa,ku ngonde,na kubingongonothi,nahakaye.Baka mafuti bakalishoshomwena, na lyoba mwafwa wa kuluma kwa mema a kalunga na mankimba. ²⁶ Bamo banu bakathsamo kabelabela mwafwa wa lyoba omwo bakabandamena byuma bije bikaija hano hathi. Mwafwa binthzili bya mwilu bakabi ndingangetha. ²⁷ Cho bakamona Mana Munu alinakwija mu lishwela na nthzili na bumpahu bwakama. ²⁸ Oloni ebi byuma bikashangumuka kulingiwa, katukeni na kwandula mitwe yeni,mwafwa kupatuka kuli muyehi." ²⁹ Yesu wabatelele chithimo ngwendi, "Tala ku chiti cha mukuyu,naku miti yoshe ikwabo. ³⁰ Omwo mumona maputa ashangumuka kujobelela,muthzibuke yeni babenya ngweni nyangao ili muyehi. ³¹ Muchifwa echi,omwo mukamona byuma ebi bilingiwa,muthibuke ngweni bumwene bwa Njambi buli muyehi. ³² Mwabuthunga bene njimileka, echi chikota kuchi kathsi kubanga byuma byoshe ebi binalingiwa. ³³ Lilu na kaye bikaita,oloni majwi ange kuwakaiti. ³⁴ "Nyanyameni umo na mukwabo, linga bimbunge byeni kethi bishote ha lulya na kunwa na bishoti bya mwonyo,mwafwa litangwa lije likamikathumwitha ngwe muje mukamwashoka muheto. ³⁵ Omwo bikajo banu boshe baje bayoya hano hathi. ³⁶ Nyanyameneni thimbu yoshe, lomeni linga mukale na binthzili bya kuhyana byoshe bije bikalingiwa,nakwimana ku mesho a Muna Munu." ³⁷ Mu mutangwa aje wakele na kulongetha mu temebele,cho buthsiki watundilemo na kukakala kuje ku munkinda wa Oliveta. ³⁸ Cho mutondo - tondo banu boshe bakele nakuya ku tembele na kukamutolilila.