¹ Cho bakakutambula lithimu nabakwabo baka kulinga bubi bakele nakwija kuli Yesu na muthzibililila. ² Boshe ba Faliseo na bakakusoneka bali yongwele umo na mukwabo, ngwabo, "Ou munu akatambula baka bubi,na kulya nabo." ³ Yesu cho wabalekele chithimo echi,ngwendi, ⁴ "Iyajo muli yeni,ou nga ali na bimanga chita chimo cho atahzimabalethaho umo,katha kuthethza baje makumi atanu na awana na batanu naba wana mu mambo,nakuya nakukathetela uje wakuthzimbala kubanga noho akamuwana? ⁵ Cho omwo aka muwana,akwa mwaka ha bithsili byendi na kubwahelela. ⁶ Omu aija kunjubo,athana babuthamba bendi naba ndambo walya nabo,nakubaleka boshe ngwendi, "Bwaheleleni nange,mwafwa njinawana manga wange wakuthzimbala.' ⁷ Njendeka kuli yeni ngwange nambe ngocho,kukakala kubwahelela mwilu hali muka bubi umo atenguluka,kutubakana makumi atanu na wana naba tanu naba wana aba kubashaka kutenguluka. ⁸ Nambe munakathzi wakala na likumi lya bimbongo lya chichele, nga athzimbalethaho imo lika,katha kumunika ndeya yendi,na kukomba munjubo,na kutonda bwino kweta nomu aiwana? ⁹ Omu aiwana,athana babuthamba na bandambo walyata nabo, ngwendi, 'Bwaheleleni nange,mwafwa njinawana mbongo yange njathzimbalethele.' ¹⁰ Chipwe ngocho,njendeka kuli yeni ngwange, kukakala nzolela ha mesho a tungelo ba Njambi hali muka bubi umo lika ou atenguluka." ¹¹ Cho Yesu wendekelengwendi, "Munalume umo wakele na bana bendi babali ba banalume, ¹² cho wamwanike wendekele kuli ishe ngwendi, 'Tate, njaneko mbathzubwila yange ya bufuko.' cho wapangele buje bufuko hakati kabo. ¹³ Mukwetile matangwa amangi,uje mwana wa mwanike wakungulwile buje bufuko nabo hamo na kuya kuli lifuti lyeka, kuje wakabihithile bufuko bwoshe mukuyoya cha kweneka mana. ¹⁴ Ngechi omu amanethele buje bufuko byoshe,kwethzile lihungu kya njala muje mu klifuti,cho waputukile kutonda bukwathi. ¹⁵ Waile kukyana babenya kuli umo ntungalimbo wa muje mu lifuti,ou a wamutumine kuya na kulitha bangulu bendi. ¹⁶ Munzolela wakele na kulya mubinkolola bya bingulu mwafwa kukwale umo wamwanene cha kulya choshe. ¹⁷ Oloni uje mwanike omu walihwithile mubunu,wendekele ngwendi, 'bangahi bangamba bali nabo tate bali na bya kulya bya bingi, cho yange njilikuno, mu kuthsa njala! ¹⁸ Njikatuka na kwiluka kuli tate,cho njikendeka kuli ikeye ngwange, "Tate, ninakubulumwnina mwilu nobe nawa. ¹⁹ Kunjapandelele kuthaniwa munobe lalo embwe,oloni njitengulule na kunjipwitha kupwa umo wabandungo bobe.''' ²⁰ Cho uje mwana wakatukile nakuputuka kwiluka kuli baishe. Omwo wakele halako,cho ishe wamu mwene cho wamuthzibilile ngothzi,cho washatukile kuya nakumumbateya na kuka muthsemba. ²¹ Uje mwana wendekele kuli baishe ngwendi, ' Batate,njinabulumwina Njambi cho njinakubulumwina nobe. Cho kunjapande lalo kunjithana munobe wa munalume.' ²² "Baishe bendekele kuli bangamba babongwabo, 'Neneni bwathi buthzalo bwa bubwa,cho mu muthzike,cho muthzikeni kathzeya kumunye wendi, muthzikeni bing'aku ku mendi endi. ²³ Cho munene uje muna ngombe wakununa linga mumuthsiye. Tulye na kubwahelela! ²⁴ Mwafwa munange wathsile,cho ali na mwonyo lalo,Wathzimbalele,cho tunamuwana.' Cho baputukile kubwahelela. ²⁵ "Olojo munendi wa mukulunu wa munalumewakele mulihya. Cho omu wethzile nakweta kunjubo,wathzibile myatho na kukina. ²⁶ Wathanene umo wabaje bangamba na kumwihula bika byakele nakulingiwa. ²⁷ Uje ngamba wamulekele ngwendi, 'Uje shongo yobe neluka cho baisho banathsiila muna ngombe wakununa mwafwa bana mutambula bwino. ²⁸ "Uje mwana wa munalume wamukulunu walubalele cho walubalele cho kakobelelemo,cho baishe batuhukile na kukamulambelela. ²⁹ Oloni uje mwana wamukulunu wabakumbulwile baishe ngwendi, 'Kenga,eyi myaka njinakupangela kutuma,kanda laja njiliule kukambeya kwobe,kuwanjaneeneho laja nambe muna membe linga njathe kubwahelela na babuthamba bange, ³⁰ oloni omwo munobe neja,ou nabihitha bufuko bwobe hamo na mahule,una muthsiila muna ngombe waku nuna.' ³¹ "Baishe bendekele kuli ikeye, 'Munange, thimbu yoshe wakala nange,byoshe byange binapu byoshe byobe. ³² Oloni chinapandele kuli yeta kubwahelele na kujolela,mwafwa ou ndolome yobe wathsile,cho ali na mwonyo,wathzimbalele,cho tunamuwanoni.'''