¹ Njili nakwendaka ngwange baswana, chakama napu mwanike, kalithethzele na ndungo, chipwe byuma byoshe binapu byendi. ² Oloni bachili nakiumulela na kumunyunga kutwetela noho thimbu ya mwakele ishe ikata. ³ Netu lalo,omwo twapwile tubabandondo,twakele tubandungo ba mulifuti. ⁴ Cho omwo thimbu yayibwa yetele,Njambi watumine munendi,wathemukile ku munakathzi,wathemukile mwitha lya mashiko. ⁵ Walingile ebi managana obole baje bakele mwithi ya mashiko,linga tutambule buswana bwa bana. ⁶ Omwo mwapwa mubana,Njambi natumu mundthindthzime wamunendi mu bimbunge byetu, uje tukathana ngwetu, Ambaa, tate." ⁷ Cho kukwethi nawa ndungo,oloni mwana,cho nga mwana, cho yobe unapu uswana kwitila muli Njambi. ⁸ Oloni hathimbu ije,omwo kumwathzibukile Njambi,bamipwithile kupwa bandungo kuli baje,mubindthzili bya banu, kethi bya tumponya. ⁹ Oloni hapumwa munathzibuka Njambi,nambe banamithzibuka kuli Njambi,bika bimwilukila kuli butheye na bwangochongocho bya bibi? Mutonda kupwa mupwa bandungo lalo? ¹⁰ Yeni mukathingimika matangwa na bingobe bya bihya na bithimbu na myaka! ¹¹ Njinathzibi lyoba hali yeni mwafwa bipangi byange nenei binathe kupwa bya ngocho. ¹² Njiilomba,bandolome,fweni yange, omwo nange njinafu yeni. kumwanjibulumumwinine. ¹³ Oloni mwathzibuka ngweni chapwile cha chikalu kumubila wa thitu kwambulula muthzimbu waubwa kuli yeni ha kulibanga. ¹⁴ Chipwe kumubila wange wamyakeleha mu byetheko,kumwanjiyengwile nambe kunjibayna. Oloni mwanjitambwile ngwe njikangelo wa Njambi,nambe ngwe nji kilisitu Yesu babenya. ¹⁵ Cho bibethiko byeni bili kuli? mwafwa njinendeka kuli yeni ngwange, ngwe chapwile chachathi,ngwe munatunditha mesho eni na kwana yange. ¹⁶ Choni,cho njinapu chitothzi cheni mwafwa njinamileketha buthunga? ¹⁷ Cho bakebo bashaka kumihapa, chakujeneka kwa bithinganyeka bya bibwa. Bashaka kumyangununa mangana makale nakubangangela bakebo. ¹⁸ Oloni chachibwa thimbu yoshe ngwe mupanga ha bithinganyeka bya bibwa,kethi ngwe njili hamo nene lika. ¹⁹ Eni bana bange,yange njili na mushongo wa kukita yeni kweta noho Kilisitu akapwa mukati keni. ²⁰ Njishungwiya ngwe njinakala neni hamo hathimbu ino mangana njitengulule endekethi yange,mwafwa njalikomokelele manene hali yeni. ²¹ Njilekeni,yeni mushaka kutumbama kwithi ya lishiko,kwethi na kuthzibilila lishiko? ²² Mwafwa bachithonekele ngwabo Abilahama wakele na bana babali,umo kuli ndungo wa munakathzi mukwabo kuli munakathzi weni. ²³ Umo wathemukile kututa kuli ndungo wa munakathzi na ku mubila,olini mukwabo wathemukilke kutunda ku munakathzi wendi kwitila mu lishiko. ²⁴ Ebi byuma twatha kubilumbununa ngwee bithimo,mwafwa aba banakathzi babali bemanene bikumiyo bibali.Umo waku munkinda wa Sinai cho wakitile bana bendi babali bapwile bandungo.Ou ikeye Hangale. ²⁵ Choni Hangale bamupwithile kupwa munkinda wa Sinai mu Alembiya;cho wemanenene Yelusalema,mwafwa ali mu bundungo na bana bendi. ²⁶ Oloni Yelusalema ya Mwilu ya kupatuka.Cho napu inetetu. ²⁷ Ngwe mubathoneka ngwabo,"Jolela,obe mumba uje kekukita bana, tambeka manene cho tambeka na kujolela,yobe kuweku kuyanda kaayando ka kukita;mwafwa bana uje munalathzi wa kuyengula banapu babengi kuhyana bauje munakathzi uje ali na munalume." ²⁸ Oloni yeni,bandolome,bakupwa ngwe Isaka,banapu bana ba likulahetho. ²⁹ Muthimbu ije uje wathemukile kwetile mumubila wa yandethele uje wathemukile ku mundthzindthzime.Chinafu chimo honi. ³⁰ Oloni bika bithoneka byendeka? Twaleni ou ndungo wa munakathzi na munendi.mwafwa uje ndungo ya munakathzi kakawanako mbathzubwila mu muswana na uje mwana wamunalume wauje munakathzi wakupatuka. ³¹ Chohoni,bandolome,kutwapwile bana bauje ndungo wa munakathzi,oloni bauje wakupatuka.