Isha umwine umukulu wabakemba; abapafilimba fya tambo, fya mimbile yabena Sheminiti. Lisalamo lyakwa Davidi. ¹ Mwe ba Yawe, mwenkalukila mu bukali bwenu nangu kundungika mukufitwa kwenu ukukulu yoo. ² Beni ne nkumbu pali nemo, ba Yawe, pakuti nji muneke; mposheni, ba Yawe, amafupa angi akonanka. ³ Umweo wangi nao ashupikwa. Lomba mwebo, ba Yawe - iki kyakutwa - lilika ubutali bwa pindi shani? ⁴ Bweleni, ba Yawe! Mpokololeniko. Mpususheni pamulandu wa lulayano lyenu ulwa kine! ⁵ Pakuti mumfwa talipo ukumyanukeni. Mu Sheoli mba ninani uwingamipeleni ukutota? ⁶ Nanaka ne mukutenda kwangi. Ubushiku bonse umupunda wangi ulebomba ne minsoshi; ndawasha ifya pa mupunda wangi ne minsoshi yangi. ⁷ Amenso angi akoya ili aputwa pakuti pa kikonko kyangi; akoya ili ashima pakuti pamulandu wa balwani bangi bonse. ⁸ Fumeni kuli nemo, bonse mwebo mwemukita ububifi; pakuti ba Yawe baufwa kwi shiwi lya kulila kwangi. ⁹ Ba Yawe baufwa kukulomba kwangi nalomba inkumbu; Ba Yawe basumina itembelo lyangi. ¹⁰ Abalwani bangi bonse bakofwa insoni kabili bakashupikwa apakulu. Bakabwekelamo kabili penkapo bakalengeshiwa.