¹ Penka ba Yawe balibonekele kuli Abulama mupanga ya mamuli, ili aikele mu mulyango we tente ili kakabile akasuba. ² Alikebele mwiulu kabili, moneni, alimwene abantu batatu kebamakene pali ye. Ili abamwene; kababutukila mukuba kumanya mu mulyango we ntente ne kukotamina panshi. ³ Kalabila ati, ''Ba Shikulu bangi, nga kyakwebati nakitilwe akumbu pa menso enu, napapata mwipitilila umupyungishi wenu.'' ⁴ Lekeni amenda anini aletwe, musambe amakasa enu, ne kutusha mwebene munshi ya kichi. ⁵ Lekeni ndete ifyaakulya, pakwebati mwikalike mitima yenu. panuma mutachike ukuya, pakuti mwaisa kumupyungishi wenu.'' kabamwasuka ati, ''Kita kwati ifyo walabila.'' ⁶ Penka Abulama kabutukila ukwingila mwitente kuli Sala, ne kulabila ati,'' Butuka, tola ifyakwesha fitatu ifya bunga bwa fulaulo, ufiknde, ne kupanga shinkwa.'' ⁷ Penka Abulama kabutukila kwitanga, na kubula umwana wa ñgombe unakile ne kuwama, ne kupela kumupyungishi naye kabutuka mukupanga. ⁸ Alibulile amandala ne mukaka, ne mwana wa ñgombe uyo bapekenye, ne kubika ifya kulya kuntanshi yakwe, kabili alimakene pakati kabo munshi ya kichi ili balukulya. ⁹ Kabalabila kuli ye ati,' ''umukashi obe Sala alikwepi?'' Kaasuka ati, ''kulya mwitente.'' ¹⁰ Alilabile ati,' ''ndine kubwela kuli mwebo mu mpindi ya mweo, kabili mona, umukashi obe Sala ali ne kufyala mwana mwalalume.'' Sala awkumfwa mumilyango we tente, iyali munuma yakwe. ¹¹ Penka Abulama na Sala balikulile, ne bukote, kabili Sala kakila pampindi ya kufyala abana. ¹² Sala kalikesela mwine, ne kuli labilisha ati,' ''panuma nakota ne kupwamo na Shikulu wangi akota, kani kabapo ne kusangalala?'' ¹³ Ba Yawe kabalabila kuli Abulama ati,' ''mba nindo Sala akisekela ne kulabila ati, 'kanshi ikine nemo nkafyala umwana, ili nkontele? ¹⁴ Kanshi palipo ikikosele kuli ba Yawe? pampindi isontelwe na nemo, pampindi ya mweo, ndi ne kubwela kuli mwebo. Pambpindi lyakuba fyenkefi mu mwaka uli kwisa Sala ali ne kuba ne mwana.'' ¹⁵ Penka Sala kakana ne kulabila ati, ''shasekelepo,'''pakuti ali ne mwenso kaasuka ati,' ''Koku, wakiseka.'' ¹⁶ Penka abalalume kabena ne kuya ku Sodoma. Abulama kaya nabo pamo mukubamona mulwendo lwabo . ¹⁷ Kabili ba Yawe kabalabila ati, ''kani nakumufisama Abulama ifyo ndine kukita, ¹⁸ Pakuti Abulama ali ne kuba mutundu ukulu ne kukosa, ne mitundu yonse ya bantu pakyalo ili ne kupalwa kupichila muli ye. ¹⁹ Pakuti na misala pakwebati engaba uwa kutangilila abana bakwe ne bañanda panuma yakwe mukulu kulama ishila shaba Yawe, mukuchita ubulungami ne kwesho kulungeme, pakwebati ba Yawe bengaleta pali Abulama ifyo balabile kuli ye .'' ²⁰ Kabili ba Yawe balilabila ati, ''pa mulandu wakwebati ukulila palwakwa Sodoma na Gomola kwakula, ne bubi bwabo bwafulisha, ²¹ Nakwikila ne kuya panshi ne kubona ukulila kwabo ukwafika kuli nemo, nga kya kwebati ikine bafikita. Nga yowo, nakwishiba.'' ²² Penka abantu kabafutatikilako kulya, ne kuya ku Sodoma, pakuti Abulama kashala kaimakene kuntashi yaba Yawe. ²³ Kabili Abulama kaisa apepi ne kulabila ati,'' mwakupyanga bonse abalungeme pamo ne babipile? ²⁴ Nga kyakwebati kuli balungeme amakumi asanu mukati kamushi, mwakupyanga bonse ne kubula ukushapo umupunda pa mulandu wa balungeme amakumi asanu abalipo? ²⁵ Kibe ukutali kuli mwebo ukita iki kintu, ukwipaya abalungeme pamo ne babipile, pakwebati abalungeme benga kichilwa pamo ne babipile, kibe ukutali ne mwebo! kanshi aba kupingula tabakite ikilungeme pano pa kyalo kyonse?'' ²⁶ Ba Yawe kabalabila ati,' ''Ngankasange mu Sodoma abalungeme amakumi asanu mukatika mushili, ndine kumusunga umushi onse pa mulandu wababo. ²⁷ Abulama kaasuka ne kalabila ati, ''moneni, nalipela ukulabila kuli ba Yawe, nangabati ndifyo lukungu ne matoyi! ²⁸ Kani kipala pakacepa basanu palyabo aba makumi asanu abalungeme? mwingo naula umushi onse pakubulisha basanu?'' Penka kalabila ati, ''shakonaulepo, ngakasangepo abali amakumi yane naba sanu.'' ²⁹ Alilabile kabili kuli ye ati, ''Nga kyakwebati mukabe aba makumi ane?'' kaasuka ati, '' shakakitepo ikyo pamulandu waba makumi ane.'' ³⁰ Alilabile ati, ''Mwifitwa, ba Shikulu ukwebati ningalabila. Lomba amakumi atatu aka sanganwamo mulya. Alyasukile ati,'' Shakakikitepo, kani nkasangemo mulya abali amakumi atatu.'' ³¹ Kalabila ati, ''Mona, nalipela ukulabila kuli ba Shikulu bangi! Lomba amakumi abili baka sanganwamo mulya.'' Kaasuka ati,'' Nshakonaulepo pa mulandu wababo amakumi abili. ³² Kalabila ati, Nasasa mwefitwa, ba Shikulu, kabili ndabile ilya kupelako. Lomba abali ikumi limo ngabasangwa mulya?'' penka kalabila ati,'' shakonaulepo pa mulandu wabalya abali ikumi limo. ³³ Ba Yawe penka kabaya ili ba pwishishe ukulabila na Abulama, naye Abulama kabwelamo.