¹ Penka ba Yawe kabalabila kuli Mose, ''Koya kuli Felo ne kumubula, 'ba Yawe, ba Lesa ba ba Ebabeya, Ba labile fi: ''Baleke abantu bangi balukuya ukwebati benga pyungila nemo.'' ² Lomba kani ukane ukubalekako bo ati bakoya, kani webo uku ba kwachilile lukoso, ³ bona ukuboko kwa ba Yawe kukaleta ifyakukatasha fya myalo pa nama shobe ishakulela isho ishilimumalimi - pali ba kabalwe, pa mbongolo, pa ngamela, napamatanga añgombe, ne ambelele. ⁴ Lomba ba Yawe bakabiko mupaka pa na sha ba Isuleli ne nama sha bena Ijipita, ukwebati tapakabapo inama ya kubena Isuleli iikafwapo. ⁵ Ba Yawe babike mpindi ya ikalikilwe; balabila ati, ''Ni mailo ili nkakita iki kintu mu kyalo.'''' ⁶ Ba Yawe kabakite ki ubushiku ubwakonkelepo: Shonseñgombe sha bena Ijipita kashifwa, lomba tapaalipo inama yaba Isuleli yafwilepo, Nangu imo inama. ⁷ Felo kafwailisha, lomba boneni tapalipo, neli imo inama ya ba Isuleli yafwilepo Lomba umutima wakwe wali ne kitala, penka talekelepo abantu ati balukuya. ⁸ Popele ba Yawe kabalabila kuli Mose nakuli Aloni, ''Bula amatoyi peshiko. Webo, Mose, nekukusa amatoyi ne kupupila mu mwela ili Felo kali ku kebesho. ⁹ Akaluka lukungu lunini ponse pa kyalo kya Ijipita. Lukaba letela ifipote ne filonda fikaponena pa bantu napa nama monse mu kyalo kya Ijipita.'' ¹⁰ Popele Mose ne Aloni kabatola matoyi ukufuma peshiko ne kwimakana ku menso akwe Felo. Penka Mose kaposa mu mwela. Amatoyi kaalengela ifipote ne filonda ukuponena pa bantu napa nama. ¹¹ Aba fya kwelenganya tabaishibilepo ukulikanya kuli Mose kufipote, pakuti ifipote fyali palibo napali bambi aba Ijipita. ¹² Ba Yawe kabakosesho mutima wakwe Felo, naye Felo takuchikile Mose na Aloni. Iku kwali kulabilaso uko ba Yawe balabile kuli Mose ati Felo enga kita. ¹³ Popele ba Yawe kabalabila kuli Mose, ''Ukeme kumakya makya, ukemakane kuntanshi yakwa Felo, nekulabila kuli ye, 'Ba Yawe, Ba Lesa ba ba Ebabeya, balabile fii: ''Leka bantu bangi baye ukwebati benga mpopwela nemo. ¹⁴ Pakuti ino mpindi nakutuma imyalo shangi shonse pali webo wenka, paba bomfi bobe ne bantu bobe. Nemo kakite fi ukwebati wengeshiba ati tapalipo uuli koti ninemo ponse pa kyalo. ¹⁵ Lomba pano nenga fisho kuboko kwangi neku ku pama webo ne bantu bobe ne bulwele, kabili mwenga kumpulwa kufumishiwapo pa kyalo. ¹⁶ Lomba nipali kiiki nakwitabishe webo ukupuluka: mukubwenesha makosa angi, ukwebati ishina lyangi likali kutulishiwa pa kyalo kyonse. ¹⁷ Mukili kulimya peulu mwebene ukulwa ne bantu bangi pakubulo kubaleka ati balukuya. ¹⁸ Kuchika! Mailo pali iino mpindi nkalete imfula ya mabwe, iyo iyi tamwabwenepo mu Ijipita ukume mpindi yatendwile ukufika na luluno. ¹⁹ Lomba luno, utume abantu ne ku kolonganike nama shenu nefintu fyonse ifili mumabala pa mpunsha iiweme. Umuntu onse ne nama iyo iili mwibala iyi tailetelwe pamushi - Imfula ikesa panshi pali fyo, kabili fyakufwa.'''' ²⁰ Penka abo abakwa Feloo ketekele muli mashiwi aba Yawe kaba pubawisha ukuleta basha ne ñgombe mu ma ñanda. ²¹ Lomba balya abo tabapokele amashiwi aba Yawe kabasha abasha babo ne ñgombe shbo mu mabala. ²² Popele ba Yawe kabalabila kuli Mose, imyo kuboko mwiulu ukwebati mwengabe mfula mukyalo kya Ijipita pa bantu ne nama nekilimwa kyonse ikya mwibala lya Ijipita.'' ²³ Mose kaimya inkoto yakwe mwiulu, na ba Yawe kabatuma mfula, ne tulumba, pa mushili. Nabo kabalokeshe mfula mushili wa Ijipita. ²⁴ Penka kwali nemfula ya mabwe ne tulumba, utupatankene ne mabwe, uukateshe ukwakuchi ikya kwebati tayalipo mu kyalo kyonse kya Ijipita ukufuma apakyabelele kyalo. ²⁵ Ukupita monse mu kyalo kya Ijipita, amabwe alipamine kyonse ikyali mwibala, bonse abantu ne nama. Kaipama kyonse kilimwa mwibala nekumokole kichi kyonse. ²⁶ Sombi mu kyalo Gosheni, umwali kwikala aba Isuleli, tamwalipo imfula ya mabwe. ²⁷ Popele Felo katuma abantu mukwita Mose na Aloni kabalabila kuli bo, ''Nabifya pali ino mpindi nemo. Ba Yawe balungeme, ne nemo ne bantu bangi tulibabipile. ²⁸ Tembele kuli ba Yawe, pakuchi ukululuma kwakulisha ne mabwe akilamo. Nemo ndikumilekeni mukoya, kabili tamukali kwikalilila pamo yo-o.'' ²⁹ Mose kalabila kuli ye, ''Bukumo ili nakufuma mumushi, Nemo ndi nokutabmika maboko angi kuli ba Yawe. Ukululuma kwakukileka, kabili takwakubao imbi imfula ya mabwe muli fifi mukeshiba ati ikyalo kya ba Yawe. ³⁰ Lomba kuli webo ne babomfi bobe, Ndishi ati tamunga balemya ba Yawe Lesa ikyakine. ³¹ Penka ubukusa ne mabali kaba fyonaula, pakuti amabali alitatwile mitwi, ne mikusa yali ne mitwi. ³² Sombi tiligu nemasaka taba fyonawile pakuchi shali mbuto shakupelako. ³³ Ili Mose afumine kuli Felo na mumushi, katambika ukuboko kwakwe kuli ba Yawe; ukululuma ne mfula ya mabwe kafikileka, kabili ne mfula kaileko kuloka panshi. ³⁴ Ili Mose abwene ati imfula yakalika, nekululuma kwakileka, kabifya libili ne ku kosho mutima wakwe, pano ne ba milimo bakwe. ³⁵ Umutima wakwe Felo ka koshiwa. Kabili tabalekelepo abantu ba mu Isuleli ukuya, koti fyenka ba Yawe balabile kukuboko kwakwe Mose.