¹ Ikyakupelako, mwebakwasu, kamututembelelako ati, amshiwi aba Shikulu atwlilile ukutulishiwa nekupokelelwa nebuleme, koti nifyopelefyo ifi akitilwe pakuti pali mwebo. ² Kamutembela kabili ati ba Lesa bakatupulushe ku bantu ababipile abakubifya. Pakuti tabali nibonse abaketekela amashiwi, koku. ³ Sombi ba Shikulu baketekelwe, lomba bakamukosheni nekumulameni kukapondo. ⁴ Nakabili ba Shikulu balukutupela ukuketekela ukwamuli mwebo, kabili tulishi ati mulukukita ifyo ifi twamwebeleni kabili ati mukatwalilila ukulukukitefyo. ⁵ Ba Shikulu ngabamutangilileni kukwishiba ukwakukilapo ukwabutemwe bwa ba Lesa kumutima nteka uyo upelwe kuli ba Kilishitu. ⁶ Mwishina lyaba Shikulu Yesu Kilishitu, tulukumu fundeni, mwebakwasu, ati mulekane nabo abakwasu bonse abali nebufila, abo abalabalonapo amafunde ayo aya twabapele. ⁷ Mwebo mwebene mulishi ati mulyelelwe ukukita koti nifyopelefyo ifi twalukukita. Tatwalipo nebufila ili twalinenu. ⁸ Tatwapokelepo ukafwako kamuntu apakubulo kumulambula koku. Sombi twalukukite milimo nekupyunga makosa, ikine twalukupyunga akasuba nebushiku mukwebati tekumukatasheni. ⁹ Tatwalukukitilefi mukwebati tatukwete ubukulu ubwakupoke fyakofwako koku, sombi nipakuti pakufwaisha ukuba kyakutuntululako ati mwebo mukalukulonda fyopelefyo. ¹⁰ Ili twali nenu twalimufundileni ati, ''Uyo ulukukana ukite milimo, nekulya ngaleke. ¹¹ ''Tulukulabila fi pakuti twalyumfwile ati epo bali abantu bambi abafila pakuti pali mwebo, abatabakitapo neli kantu, sombi balikalile lukoso ukufulunganye milimo yababyabo. ¹² Mwishina lyaba Shikulu Yesu Kilishitu tulukufunda nekubakengesha aba bantu, balyelelwe ukikale myeo iweme nekulukupyunga mukupake fyapakwikala kwabo. ¹³ Sombi mwebo, mwebakwasu, tekukatala ukukite ifiweme. Pangalukuli umbi uko utekuti akomfwile, funde lyo ili twalemba muli yiyi nkalata. ¹⁴ Kani epwali, ngamulukumuketa lukoso nekubulo kwikala nakwe ati akomfwensoni. ¹⁵ Nangabefyo tekumupata koti kapondo koku , sombi kamumukengesha koti mukwabenu. ¹⁶ Ba Shikulu abene abali nintulo yabutende bwesu, ngabamupeleni ubutende impindi shonse namunshila shonse. Ba Shikulu babe namwebo mwense. ¹⁷ Kanshi ninemo ne Paulo nalemba kukuboko kwangi. Ndukulabila ati mitende mwane. Iyi enshila iyi nshilishishamo inkalata shonse, ifi efindemba. ¹⁸ Uluse lwaba Shikulu besu ba Yesu Kilishitu lube na mwebo mwense.