¹ Paulo na Silwano na Timote tulukusekela abantu ba ba Lesa ba wishifwe naba Shikulu Yesu Kilishitu abali mwikelesha ilyakumushi wa Tesalonika. ² Ba Lesa bawishifwe naba Shikulu Yesu Kilishitu ngabamupeleni uluse nebutende. ³ Tulyelelwe fwebo ukulukutota ba Lesa impindi shonse pakuti pali mwebo, mwebakwasu! Ifyo efyelelwe ukukita fwebo pakuti ukuketekela kwenu kulukukula ukwakuti pamo nebutemwe ubo ubu muli nabo mwense umo umo ubwapababyenu. ⁴ Ikyo ekitulengele ukulitota pakuti pali mwebo mumakelesha aba Lesa. tulalitota pakuti pakuketekela kwenu ukwamutima nteka, na mukukululuka konse na mumapensho mulukuba nao. ⁵ Ifintu ifyo fyonse filukulangisha ati ukusololola kwaba Lesa kulungeme, pakuti ifyakuufuma muli fifi mwebo mukaba belelwe ubufumu bwa ba Lesa, ubo ubu mulukupengela. ⁶ Lomba ba Lesa bakakite fintu ifilungeme bakaleta amapensho pali babo abamupensheni mwebo. ⁷ Eli na mwebo mwemulukupenga bukumo mukapoke kutusha, na kuli fwebo fyopelefyo. Ba Lesa bakafikite fyo ili ba Shikulu ba Yesu bakaboneka ukufuma kwiulu pamo ne nkalamba shabo ishamakosa. ⁸ Ne mulilo ulukwaka mukubapelo mulandu abo ababakana ba Lesa nakuli babo aba tabasumina ikyebo ikiweme ikyaba Shikulu besu ba Yesu. ⁹ Ikine bakapenga mumulandu wamuyayaya, aba tamfiwe ukufuma pamenso aba Shikulu nakumakosa abo abuleme. ¹⁰ Pali kaka kasuba ako bakesa mukupoka ubuleme kubantu babo bonse, nekukindikwa kuli babo bonse abaketekela. Na mwebo mukalukuli pebumba lyababo pakuti mwaliketekele amashiwi ayo atwamutulishisheni. ¹¹ Lomba epapo tumutembeleleni inshiku shonse. Tulabalomba ba Lesa besu ati ba mwikalikeni abelelwe mu mweo uyo bamwitilenimo kumakosa abo ngabesushishe ukufwaya kwenu ukwa kuwaminina nekwikonsha imilimo yenu iyakuketekela. ¹² Muli yiyinshila emo ishina lyaba Shikulu besu ba yesu likapokelamo ubuleme.