4अध्याय
बुआज्जै दुआरा रुत्ता दा छड़ाआ जाणा
1
इक्क दिन बुआज गराऐं दे फाटका बला आई करी बैठ्ठी गिह़आ, [जिह़त्थु सारे गराऐं दे फैसले हुन्दे थे] कने जिस रिस्तेदारा दी चरचा बुआज्जै कित्ती थी, सैह़ भी तिह़त्थु सद्दी लिह़आ, तां बुआज्जैं तिसजो ग्लाया मेरे भाह़ऊ एह़त्थु मिंज्जो बल़ा आई करी बैठ्ठी जाह़, तां सैह़ तिस्स बल़ा आई करी बैठ्ठी गिह़आ।
2
बुआज्जै अपणे गराऐं देह़आं दस बजुरग माह़णुआं जो भी सदेह़आ कने ग्लाया तुस्सां भी एह़त्थु आई करी बैठ्ठी जाह़ तां सैह़ भी तिह़त्थु आई करी बैठ्ठी गै।
3
तां बुआज्जैं सारेआं दे सामणे उस रिस्तेदारे जो ग्लाया, “तिज्जो ता पता ई है कि नाओमी मोआब देस्सा ते बापस आई गई है, सैह अपणे घरेबाल़े दिह़आ ‘जिम्मिआं‘ दा इक्क टुकड़ा बेचणा चांह़दी है।
4
इस तांईं मैं सोच्चेआ कि तिज्जो दस्सी दिन्दा कि तू उस्सा जिम्मिआं जो इन्हां बजुरगां दे सामणें खरीदी सके, तू अज्ज मिंज्जो एह़ दस्स कि तैं सैह़ जिम्मी खरीदणी कि नीं, कयो कि तिज्जो ते बाद उस्सा जिम्मिआं खरीदणे दा हक मैं रक्खदा, नह़ईं तां एह़ जिम्मी मैं खरीदणी।“
5
बुआज्जै तिसजो एह़ भी ग्लाया, “जाह़लु तू नाओमिआ दिह़आ जमीनां खरीदगा, तां तिज्जो बिधबा रुत्ता दे हथ्था ते इस्सा मणसा कन्ने खरीदणा पोह़णा कि मरे होए दा नां भी इस्सा जमीनां च बणी रैह़।“
6
एह़ सब सुणी करी तिन्नी रिस्तेदारैं ग्लाया, “मैं इस झंझटा च नी पोहणा चांह़दा, मेरे बच्चेआं इस्सा जमीनां दा बारस नी बणनां, इस तांईं मैं इस्सा जो नी खरीदी सकदा, तू ई इस्सा जमीनां जो खरीदी लैह़।
7
पराणे जमान्ने इस्राईल देस्सा च इक्क रुआज था कि जाहलु भी सैह़ कुस्सी जो छडाणा या अदला बदल़ी करने च सहमत हुन्दे थे, तां माहणु अपणी जुत्ती खोह़ड़ी करी इक्की-दुग्गे जो दिंदे थे इसदे बाद ही सैह इस्राइल च लेण-देण जो पक्का मनदे थे।
8
इस तांईं तिन्नी रिस्तेदारैं अपणी जुत्ती खोह़ड़ी करी बुआज्जे जो देह़ई दित्ती, कने ग्लाया, “तू ई इस्सा जमीनां जो खरीदी लैह़।”
9
फिरी बुआज्जै सारे बुजरगां कने लोक्कां जो ग्लाया, “अज्ज तुस्सां सारे ई इस्सां गल्ला दे ग्बाह हन, कि जेह़ड़ा कुच्छ भी अलीमेलक, किल्योन कने महलोन दा है, अज्ज मैं नाओमिआ ते खरीदी लैह़दा है।
10
कने तिस्सा दिह़आ बिधबा नुह़आं ‘रुत्ता‘ जो भी अपणी घरेबाल़ी बणाई लैंन्दा है। तिस्सा ते जेह़ड़ा भी मुन्नु जमगा सैह़ सरिआ जायदाता दा बारस हु़ंगा, जिसते दुह़ईं पारिबारां दा ना भी चलदा रैह कन्ने ‘बन्स‘ भी गांह़ बधदा रैह़, अज्ज तुस्सां सारे ई इन्हां गल्लां दे गबाह हन।
11
तां तिह़ना सारेआं लोक्कां कने बजुरगां तिसजो ग्लाया, “अस्सां इन्हां सारिआं गल्लां दे गबाह हन, कने एह़ ओरत जेह़ड़ी तेरे घरैं आई है, परमात्मा इस्सा जो ‘राहेल कने लिआ‘ साई बरकत दे, जिन्हां म्हारेआं बजुरगां जो जन्म दितेआ कने इस्राईल दे घरान्ने दी सुरुआत कित्ती थी। तुस्सा ‘एपराता‘ दे बंन्स च बड़ी तरक्की करा कने पुरे बैतलहम च बड़ा नां कमा।
12
परमात्मा इस्सा जुआन ओरता ते जेह़ड़ा बच्चा तिज्जो दिहंगा, तिसते तेरा परिबार यहूदा दे पुत्तर ‘पेरेस‘ कने तामर दे परिबार साई होई जाए।“
13
बुआज कने रुत्ता दा बन्स
फिरी बुआज्जै रुत्ता कन्ने बयाह करी लिआ कने सैह़ तिसदी घरेबाल़ी बणी गई, जाह़लु सैह़ तिस्सा बल़ा गिह़आ ता परमातम्मे दी तिस्सा पर बड़ी दया होई कने तिन्नैं इक्क जागत जम्मेआं
14
बैहतलम्मै दिह़आं सारिआं जणास्सां नाओमिआ जो ग्लाह़णा लग्गिआं, परमात्मा बड़ा महान है, जिन्नी तेरी अणसुणी नी कित्ती कने तिज्जो इक्क ‘पौतरुए‘ दी असीस देह़ई दित्ती, इन्नी इस्राईल देस्सा च बड़ा नां कमाणा है।
15
इन्नी बडाप्पे च तेरा बड़ा ख्याल रक्खणा है, तेरी नूह़ ‘रुत‘ तिज्जो कन्ने बड़ा प्यार करदी है, सैह़ तिज्जो तांईं सत्तां [7] पुतरां ते भी बधी की है।
16
फिरी नाओमिऐं तिस्स बच्चे जो उठाई करी अपणिआं
गोदा च लिह़आं कने तिसदा दाईपण करना लग्गी पह़ई।
एह़ दिक्खी करी अक् खे-बक्खे दिह़आं जणास्सां ग्लाणां लग्गिआं।
17
हुण ता नाओमिआं बल़ा भी इक्क बच्चा होई गिह़आ है, तिन्हां तिसदा नां ‘ओबेद‘ रक्खेआ। एह़ ओबेद यिस्से दा बापू कन्ने राजा दाउद दा दादू था।
18
पेरेस्से दी बन्साबल़ी
पेरेस दा पुत्तर हेसोन था,
19
हेसोन्ने दा पुत्तर राम,
20
राम्मा दा पुत्तर अमींनादाब, तिसदा पुत्तर नसोन, तिसदा पुत्तर सलमोन,
21
सलमोन्ना दा पुत्तर ‘बुआज़‘ तिसदा पुत्तर ‘ओबेद‘
22
ओबेदा दा पुत्तर यीस्से, कने यीस्से दा पुत्तर ‘राजा दाऊद‘ था ।