9 ¹ Kude, hi Saulus, aur mamani nelang ngaheng munu kawan ungkup Tuhan, hanye tulak nadap Imam besar, ² laku surat kuasa teka Imam Besar isa na tuju ma sinagoge-sinagoge hang Damsyik, himpan amun hanye panalu andri kawan ulun sa parisaya ma lalan Tuhan, puang karasa upu atawa wawei, hanye kaiuh ngenei here himpan na hukum hang Yerusalem. ³ Tawuk hanye rahat takia, nelang haut ri'et Damsyik, salenga naan teka langit sahaya sa mara'ai tu'u ngawariung hanye. ⁴ Sindrah hanye tumang ma tane naan lengan teka langit sa kaeau ma hanye, "Saulus, Saulus, daya inun hanyu ngampihanang Aku?" ⁵ Eau Saulus, "Hie Hanyu, Tuhan?" Balalu Hanye kaeau,"Aku Yesus, isa na kahanangennu. ⁶ Kude hayu amuan, hulu tulak ma wuang tumpuk, hang yaru die na wara ma hanyu inun sa harus na gawi dayanu." ⁷ Katuluh ulun sa sinrah hi Saulus mindri nelang manga tawuk karengei lengan yiru, kude here puang kadinung erang kaulun jua. ⁸ Saulus amuan teka tane, mateni pauka, kude hanye puang kadinung inun-inun. Balalu, kawan hengauni negei tanganni nganyak hanye masuk ma Damsyik. ⁹ Salawah telu andrau, Saulus puang kadinung inun-inun, puang kuman pada puang ngu'ut ranu. ¹⁰ Tawuk yiru naan erang kaulun murid hang Damsyik bangaran hi Ananias. Tuhan bapaner ma hanye mitah paninungen, "Ananias!" Balalu, eau Ananias, "Ina aku, Tuhan." ¹¹ Tuhan kaeau ma hanye, "Uan hulu hanyu tulak ma lalan sa na antuh Lalan Witu, antara hang lewu Yudas, erang kaulun Tarsus sa bangaran hi Saulus, dinung, ta'ati hanye rahat lakudua, ¹² pada hang wuang paninunganni hanye kadinung erang kaulun bangaran hi Ananias hawi nelang nganak tangan ma uluni himpan hanye tau kadinung lagi." ¹³ Kude sangai Ananias, " Tuhan aku haut hene karengei sarita ulun rama wangun ulun yina, hene tu'u ngulah kajahaten nadap ungkup-Nu hang Yerusalem, ¹⁴ pada hang ina hanye naan surat kuasa teka imam- iman kapala pakai tau nyama nukum katuluh ulun sa nerau ngaran- Nu," ¹⁵ Kude Tuhan kaeau ma hanye, " Hululeh hanyu tulak daya ulun yina sa napidi-Ku pakai ngenei ngaran-Ku ma hadapan bangsa-bangsa lain, ma kawan raja-raja, pada ma bangsa Israel. ¹⁶ Daya, Aku hamen nutui ma hanye kalaawe hene sakit hanangni hanye harus nakahanangen daya ngaran-Ku," ¹⁷ Balalu hi Ananias tulak ma lewu yiru, dami udi ngan'nak tanganni hang amau hi Saulus, hanye kaeau, u Saulus, Tuhan Yesus isa nantarang tengani ma hanyu tawuk hanyu hang lalan nadap yina, haut nunyu aku manalu hanyu himpan hanyu tau kadinung lagi nelang penu andri Ruh Barasis." ¹⁸ Balalu hamituan yiru jua galis runtun banna' yalah sihi kenah teka mateni, balalu hanye kadinung lagi, udi yiru hanye amuan palus na baptis. Saulus Mulai Nahampe Habar Barita ne'u Yesus ¹⁹ Dami udi kuman hi Saulus mawigas lagi, papire andrau hanye muneng baya kawan murid hang Damsyik. ²⁰ Nahinang hanye tulak lepuh nyarita Yesus hang sinagoge-sinagoge eauni, "Yesus yiru anak Allatalla," ²¹ Katuluh ulun sa karengei hanye wauh, eau here, "Angsa hanye na ulun sa naan hang Yerusalem sa munu here sa ngantuh ngaran Tuhan, nelang hawi ma yina lepuh nyam'ma, nuruk kawan ulun parisaya himpan na enei ma hadapan imam-imam kepala?” ²² Kude hi Saulus magin tamam pangaruhni, hanye ngampi hanang ulu ulun Yahudi sa muneng hang Damsyik, daya hanye nganyu' bukti amun Yesus yiru kapinu'u Kristus. Saulus Lepah teka Papire Ulun Yahudi ²³ Ganap papire andrau udi yiru, ulun Yahudi mapakat ka'i munu hi Saulus, ²⁴ kude pipakatan here yiru rasa Saulus. Kaandrau kamalem here nyaga lalan masuk tumpuk himpan munu hi Saulus. ²⁵ Kude, tawuk penah malem kawan muridni suni-suni ngaluar hanye teka wuang tumpuk. Saulus hang Yerusalem ²⁶ Tawuk hi Saulus hampe hang Yerusalem, hanye mansuba bakumpul andri kawan murid. Kude here takut, daya here puang harap amun hanye pada erang kaulun murid sa parisaya. ²⁷ Kude hi Barnabas ngaeh tangan Saulus, ngenei hanye ma hadapan kawan rasul, balalu ngesah ma here kalaawe hi Saulus haut kadinung nelang bapaner andri Tuhan tawuk hang lalan, pada kalaawe hanye kaliru heei bapaner hang wuang ngaran Tuhan hang Damsyik. ²⁸ Balalu hi Saulus muneng baya kawan murid tawuk here ulek-lekuk hang Yerusalem, hanye bapaner andri heei hang wuang ngaran Tuhan. ²⁹ Hanye bapaner nelang basual andri ulun Helenis, kude here bausaha munu hanye. ³⁰ Tawuk kawan pulaksanai saiman karasa garayang here kai munu hanye, here ngenei hanye tulak ma Kaisarea palus ngirim hanye ma Tarsus. ³¹ Daya yiru ungkup hang katuluh Yudea, andri Galilea, kaiuh damai nelang batamah kaharapenni. Welum andri takut ma Tuhan, hang wuang pangarawahen Ruh Barasis, here magin batamah hene. Petrus hang Tumpuk Lida andri Tumpuk Yope ³² Hang hindra andrau, tawuk hi Petrus pasiar hang tumpuk yiru, hanye ganta kawan ulun-ulun barasis sa muneng hang Lida. ³³ Hang yiru hanye panalu andri erang kaulun bangaran hi Eneas, isa haut walu taun lumpuh. ³⁴ Balalu hi Petrus kaeau ma hanye,"Yesus Kristus nyamare hanyu. Indri palus barasis paandreannu!" balalu hamituan yiru jua hi Eneas amuan. ³⁵ Balalu katuluh ulun sa muneng hang Lida andri hang Saron sa kadinung yiru, mulek parisaya ma Tuhan. ³⁶ Tawuk yiru hang Yope nan erang kaulun murid wawei isa bangaran hi Tabita, sa arati ngarani Dorkas. Hanye erang kaulun sa maeh, nelang katuju ngami ma ulun susah. ³⁷ Hang hindra andrau, hanye mekum balalu matei. Udi ulun ngapandrus hanye, here nangkading hanye hang amau loteng. ³⁸ Daya tumpuk Lida ipanriet andri tumpuk Yope, kawan murid, dami karengei hi Petrus naan hang yaru, nunyu rueh ka ulun nadap hi Petrus nelang ilaku ma hanye, "Ada hanyu unte tulak ma unengan kami!" ³⁹ Hi Petrus amuan balalu tulak andri here. Dami hampe, hi Petrus palus enei here ma amau loteng. Katuluh wawei walu mindri hang higa hi Petrus nelang nungkau, nelang nantarang baju pama sa na ulah Dokas tawuk hanye lagi welum baya here. ⁴⁰ Kude hi Petrus nunyu here katuluh ma luar, hanye ileku ulualep lakudua. Udi hie hanye iwaleng nadap bangkai Tabita nelang kaeau, "Tabita, hayu amuan!" Balalu hi Tabita amuan, tawuk hanye kadinung hi Petrus hanye palus maharung. ⁴¹ Hi Petrus nyurung tanganni ma hanye himpan ngarawah hanye mindri. Udi hie, nelang nerau kawan ulun barasis baya kawan wawei walu, hanye nutui amun hi Tabita haut welum. ⁴² Katuluh ulun Yope karasa kesah ina, balalu hene ulun parisaya ma Tuhan. ⁴³ Hi Petrus sukup lawah muneng hang Yope, baya hi Simon, erang kaulun pangulah karajinan upak situa.