¹ Nne ingiloyi lyoku mana iyaanza choku lyiza. Mmi choku vona inkaani nni yiwa ku iwulu nniyi wiirahaansi: Mmi lyoo ingiloyi choku heewa ikiyi ye iriindi lyi seena kulyi manina. ² Mmi nne iwula iriindi lyi seena mamanimani, choku taanga nni ku sintooka vuusi mukati kalyo. mane iiri vuusi vwe imbawula inkaando. Izuva nne luhuho chiku shaala chizi siihite vulyo nni zi siisiizwa vuusi vwe iriindi. ³ Mu vuusi uumu choku zwa iziiye choku injira mu inkaanda, choku heewa ziho siina tuvumwe twe inkaanda. ⁴ Mmi choku lawulwa kuti saanzi zi sasamisa lyaani lye inkaanda, mane nnaangati chimwe vulyo chimenantu chi hala, nnaangati chisamu; mmi mbwiita vulyo aavo vantu va seena chidinto che Ireeeza mu zifateho zaavo. ⁵ Mmi ka nna zi lawulwa kuti zi haye, mbwiita vulyo kuva sasamisa mwezi yi mana iyaanza. Mmi ku sasama kwaazo mbakache kwa kavumwe haka suma muntu. ⁶ Mmi mwaawo mazuva vantu kava sake lufu, mmi lufu keeti nna woolye ku waanika. kava sake kufwa mmi lufu ka lu ngomboolye mu valyi. ⁷ Mmi iziiye lyi ku swana uvuuri imbiizi zi vaakanyezwa inkoondo. Ku zwaaho mu mitwi yaazo cho kuva mane iiri mahwiisi e ighawuda, zifateho zaaazo cho kuva mane iiri nza vantu. ⁸ Insuki za teni iizo cho kuva siina za vakulwaakazi; meeno a teni aawo choku swana nni a vaandavu. ⁹ Cho kuva nne zizuva zi kola ze isipi, ku zwaaho mulyumo wa mavava a teni choku zuweeka mane iiri mulyumo we imbiizi ziingi nni zi kaya vu ngoombweera ku inkoondo. ¹⁰ Mmi zi veena michira yi vaalyi ku swana nne yo tuvumwe; nne ku ghiinta nne vusuungu mwa teni: mmi ziho za teni zi vaalyi zoku sasamisa vantu mweezi yiina ku mana iyaanza. ¹¹ Hape zi veena simwiine he iwulu lyaazo, iiye yoolyi nje ingiloyi lye iriindi lyi seena mamanimani, iiye izina lyaakwe lyi suumpwa kuti nje Abadona mu Chihevera kuya cho lulyimi, mmi cho lulyimi lwe Chiherika nje Apolyoona che izina. ¹² Vumayi vumwe chi vwaa hita; mmi, vone, kusii keeza vumwe voo vere hape ku zwaaha kuya ku vusu. ¹³ Ingiloyi lyo kumana iyaanza nne kaamwiina choku lyiza, mmi nni naa zuwa lyiinzwi kuzwa ku maziya oone e chitavero che ighawuda chiina ha vusu vwe Ireeza, ¹⁴ Nni lyiti ku ingiloyi lyi vaa kweete intorombita, Sumunune mangiloyi oone a sumiinwa ku lwiizi lu kaando lwa Yufuretisa. ¹⁵ Ku zwaaho mangiloyi oone choku sumununwa, a vaa vakanyeezwa inako yi mwiina, izuva lyi mwiina, nne mweezi, nne chirimo, kuti va woolye ku ihaya vantu cho vuungi vo vuutatu. ¹⁶ Mmi ipalo ya masolye ve imbiizi yi vaalyi miyaanda yoo vere ye miyaanda miyaanda ye miyaanda(200 000 000). Cho vuti nni nna zuwa ipalo yaavo. ¹⁷ Infwee muni vazi voni vulyo imbiizi muku tondezwa, mane nnaavo vava ziitantite: che zizuva zi bukuka mulyiro, mane nne ivwe lye jakinese, nne ivwe lye burimo: mane nne mitwi yeezi imbiizi yi vaalyi ku swana mane iiri nji vaandavu; mmi kuzwa mu tulomo twa teni nni yilyi mulyiro, nne vuusi nne mavwe e burimo. ¹⁸ Che iizi zoo tatwe njizi vee hayiswa vuutatu vwa vantu, cho mulyiro nne vuusi, mane nne ivwe lye burimo zi vaalyi kuzwa mu tulomo twaazo. ¹⁹ Ka kuti ziho zaazo ziina mu tulomo twaazo mane nne mu michira yaazo - ka kuti hape michira yaazo yi vaalyi ku kola mane iiri inzoka, ku waanika mane nne mitwi yizi vaalyi ku suma cha teni. ²⁰ Mpaaha lyiinu vantu voonse va sana va vee hayiiwa nneezi zintu, choku saalyi nyaansikiza zivi zaavo, kuti va siye ku rapera madimona, madimona e ighawuda, nne a malyi, nne iburasi, nne mavwe, nne zikuni zi saa woolyi ku vona , ku zuwa mane nne ku yeenda: ²¹ Mane nni vaa vula kulyi nyaansikiza ku ihaya vantu kwaavo, kamba vulozi vwaavo mane nnaangati vu huulye vwaavo kamba vusa.