¹ Mmi nni nna zuwa lyiinzwi ikaando kuzwa mu itempere, nni lyi waamba nne mangiloyi eena ku mana iyaanza nne oovere, nni lyiti, '' mulyi yeendere inzira zeenu, mu kee tire tusuva tu izwiire vuakalyi vwe Ireeza mu inkaanda.'' ² Mmi lye intaanzi nni lyaa yeenda, choku kee tira kasuva ko vukalyi mu inkaanda; choku taanga kuva milyumo, nne ziravi zi sasama a hulu ku vantu va veena luswayo lwe chivatana, mane nne kwaavo vava raperi chiswaniso che chivatana. ³ Mmi ingiloyi lyo vuuveri iilyo choku itira kasuva kaalyo mu iwate. mmi nni lyaa saanduka iiri malaha, u muntu yoo fwiire, mpaaha chimwi nne chimwi chi vare ku hala mwi iwate chi va fwi. ⁴ Ingiloyi lyo vuutatu iilyo choku itira kasuva mu indwiizi nne moonse muzwa meenzi, mmi nni zaa va malaha. ⁵ Mmi nni nnaa zuwa ingiloyi lya meenzi nni lyiti, '' uuwe u jolola-yo wiina kwa teni, yaa veena kwa teni, mane nni yoo keeza, kuya cho mu watwiiro waako. ⁶ Ka kuti va vee itiri malaha a vajolola nne a vaporofita, mane hoo va vahi malaha kuti vanywe; che iswanero. '' ⁷ Mmi nni nnaa zuwa zumwe kuzwa he iziko naati, '' infwee, nni ha kuva vulyo Simwiine Ireeza, si ziho zoonse, ikatulo zaako zi jolola nne vusakusima.'' ⁸ Ku zwaaho ingiloyi lyo vuunne nnaalyo choku itira kasuva kaalyo he izuva, mmi nni lyaa heewa ziho zo kuti chilyi hiisha vantu cho mulyiro. ⁹ Mmi vantu nni va hiishwa a hulu cho mulyiro mukaando, aavo choku taanga ku tuka izina lye Ireeza, iiye yo wiina ziho mweezi imbazi zoonse. choku vula kulyi nyansikiza zivi zaavo nne kuti va muteembe. ¹⁰ Ingiloyi lyoku mana iyaanza iilyo choku itira kasuva kaalyo ha chipura che chivatana, mmi muvuso waacho choku shaala che keerima vulyo. choku shaala chi va kweete kulyira nni valyi suma indimi njo ku sasaminwa. ¹¹ Mmi cho kuva nni va tuka Ireeza we iwulu che ivaka lye ziravi zaavo nne ku sasaminwa kwaavo, nni vaa vula kulyi nyaansa kuya che zivi zaavo, ziva panga. ¹² Mmi ingiloyi lyoku mana iyaanza nne lyi mwiina choku itira kasuva kaalyo mu lwiizi lu kaando lwa Yufuratisi. Mmi meenzi aalo cho kuhwa ku chitira kuti kuve nne inzira yi vasimwiine vo kuvuzwaizuva. ¹³ Mmi nni nnaa vona inhuho zi saa jololyi zoo tatwe nni zizwa mukalomo ke idirakona iiri masesi, mane nne mukalomo ke chivatana, nne mukalomo ko muporofita wa mapa. ¹⁴ Iizi inhuhoza madimona, zi panga zikomokisa. Nni ziya ku vasimwiine ve inkaanda mu inkaanda yoonse, kuva kunganyeza luzuva lwe inkoondo lu kaando lwe Ireeza si ziho zoonse. ¹⁵ ('' Mu vone! nni keeza mane iiri musa! kwiina mikoonde kwaalyi iiye yo lolyelyeere, mane nne ku viika maano ku zizwaato zaakwe, ku chitira kuti saanzi nna yeendi chintenentene choku vona mampunu aakwe.'' ) ¹⁶ Mmi nna va kunganyeza mu chivaka chisuumpwa Amagedona kuya cho lulyimi lwe chihevera. ¹⁷ Mmi ingiloyi lyoku mana iyaanza nne toovere iilyo choku itira kasuva kaalyo mu luuho. Mmi nni kwaa zwa lyiinzwi ikaando mu itempere yoku iwulu ha chipura, nni lyiti, '' Chi kwaa mana!'' ¹⁸ Mmi nni kwaa va nne mu mini miingi, nne ku tiimba, nne mimini, nni kwaa va nne ku nyanganya kwe inkaanda ku kaando a hulu ku chita kuti inkaanda, chiinga yi vaati yiku pangwa ka kwiini ku pangahalyira vantu, ku nyanganya ku kaando a hulu maaswe. ¹⁹ Mmi muzi mukaando nni waa shaala wu kawuheene koo tatwe, chisi nni mizi ya makaanda nni yaa wa. Nne muzi mukaando Babilona, Ireeza nna wu kumbulukwa ha vusu vwaakwe, kuti a wuhe inkomoki yii zwiire a hulu vukalyi vwaakwe vo vujwara. ²⁰ Mmi chimwe nne chimwe chida nni cha zwa, mane nne maruundu choku manina kaa sii kwiina. ²¹ Mmi vantu nni va wiirwa mavwe kuzwa ku iwulu, lyimwe nne lyimwe ivwe nni lyilyi ikozwaana. mpaaha vantu ha vava taangi ku tuka Ireeza che ivaka lye imbazi ya mavwe. Ka kuti imbazi ya teni yi vaalyi inkaando a hulu.