¹ Mmi nni kwaa voneka chintu chi komosa mu iwulu; mukulwaakazi nna zweete izuva, nne mweezi nni wiina haansi lya mateende aakwe, ku zwaaho ku mutwi waakwe nni kwiina ingala ye inkaani ziina ku mana iyaanza nne toovere: ² Mmi ka a veena nne ivumu[ a vee mmiinsi/ a veena ha vuholye] choku huwa, nna saka ku hwizumuka, mane nnaa sasamiinwa. ³ Kuzwaaho choku voneka chimwe chintu chi komosa mu iwulu; vone! inzoka inkaando[dirakona] yi suvira yi swa mulyiro, yiina mitwi yi mana iyaanza nne yoo vere mane nne maziya eena ikumi, nne mahwiisi a mana iyaanza nne oovere mu wumwe nne wumwe mutwi. ⁴ Mmi cho muchira waakwe[dirakona] nnaa kwiita vuutatu vwe inkaani ze iwulu, choku zi wiisikiza haansi mu inkaanda: mmi idirakona cho kuiiza ku ziima ha vusu vo mukulwaakazi yo choo hwizumuka kuti yi woolye kumu lyiira mwaane wo muswiisu vulyo mwaa mana kumu hwizumuka. ⁵ Mmi mukulwaakazi nna hwizumuka mwaana wo muswiisu yaa va lukeere ku vusa inkaanda che inkolyi ye chitalye: mmi uuzu mwaana choku manina wa ngombweera kwee Ireeza, mane nne ku chipura chaakwe. ⁶ Mmi mukulwaakazi choku ngombweera ku inkanda, kwaa veena chivaka chi vaakeenywa nne Ireeza , kuti a woolye kuka hazikiza kwa teni mazuva eena miyaanda ye miyaanda nne miyaanda yoo vere nne makumi a mana iyaanza nne lyii mwiina[1260]. ⁷ Mmi cho kuva nne inkoondo ku iwulu: Mikaere nne mangiloyi aakwe nni va lwiisa[dirakona] inzoka inkaando ; mmi inzoka inkaando [dirakona] nnaa lwa nneena ne mangiloyi aakwe, ⁸ Mmi nnaa zuundwa. Choku manina nni va sa siina meekalo mu iwulu. ⁹ Mmi e inzoka Inkaando [diragona]-nna soherwa haansi, yina inzoka ya kalye kalye, yi suumpwa Javulusi nandi Saatani, yoo cheenga inkaanda yoonse-a va soherwa mu inkanda, nne mangiloyi aakwe. ¹⁰ Mmi nni nna zuwa lyiinzwi ikaando mu iwulu nni lyiti, ''Hanu lyiinu nji chi kwaa sika ku hazwa, nne ziho, nne muvuso we Ireeza infumweetu, nne tayero ya Jeeso Kirisiti waakwe. Ka kuti yo wii kala nna zonda vaakweetu chaa soherwa mu inkanda, yo wii kala nna va hambiriza kwe Ireeza musihalyi nne masiku. ¹¹ Mmi va vaati nni va muzuunda cha malaha e imbereere, mane nne che ku waamba lyiinzwi nne kuha vupaki kwaavo; choku manina nni va saa suni mahalo aavo mbwiita lufu. ¹² Mpaaho lyiinu mu saange, uunwe vasi iwulu, mu voonse mu ikala mwa teni. Njeeti ku mayive ve ikalyi ve inkaanda mane nne vee iwate! Ka kuti Javulusi che iza kweenu, nna keeza cho vukalyi, nne ku iziva kuti chivaka [inako] chaakwe chi fwihi [chi niini]. ¹³ Mmi dirakona chiinga vona kuti chaa soherwa mu inkanda, nna sukulula mukulwaakazi yaa va zaalyi mwaana wo muswiisu. ¹⁴ Uuzu mukulwaakazi mpaaha ha heewa mavava oovere e isika ikaando, kuti a woolye ku wulukira ku inkaanda, ku chivaka chaakwe, nne chibalyi che chivaka [inako] kuti a woolye kuka mukuza, chivaka che miyaanda ye miyaanda nne miyaanda yoo vere nne makumi a mana iyaanza, nne lyiimwiina kuzwa-he imbalyi nne inzoka. ¹⁵ Mmi inzoka nni yaa swa lwiizi, cha kalomo kaayo mbakache meenzi o muunda ku mu kulyilyi. ¹⁶ inkaanda iiyo choku tusa mukulwaakazi mane nne inkanda nnaayo choku iwula kalomo kaayo, choku mina lwiizi lu va vaazwi mo mulomo we inzoka inkaado[diragona]. ¹⁷ dirakona choku shaala u kalyihiire mukulwaakazi, mane choku yeenda choku taanga ku kalwa nne veezukulu, aavo va pangahaza milao yaakwe Ireeza, mane nne kuti va kweete vupaki vwa Jeeso Kirisiti. ¹⁸ Mmi inzoka inkaando[diragona] nni ya zima he isekeseke lyiina he irizo lyei iwate.