¹ Uku njoku toondezwa kwa Jeeso Kirisiti kwa a vaa heewa nne Ireeza kuti a vonesa vahikaana vaakwe zintu zi lukeere ku pangahala mu vu fwiihi. Ava chiti kuti izivinkane choku tumina ingiloyi lyaakwe ku muhikaana waakwe Johani. ² Johani ava kweete vupaki vwe lyinzwi lye Ireeza, mane nne mulaeza kaha Jeeso Kirisiti, mane nne che zintu zoonse za vaa voni. ³ Kwiina mikoonde kwaavo va valyiira lyinzwi kwi iwulu, naavo va teeka maanzwi e chiporofita iichi; mane nne ku pangahaza zi ngolyetwa mwa teni, ka kuti inako chi ina hafwihi. ⁴ Johani, kuya cha makereke a mana iyaanza nne oovere eena mwa Eshiya: Chisemo chive nnaanwe, nne ikozo, kuzwa kwaalyi iiye yo wiina kwa teni, yaa veena kwa teni, mane nni yoo keeza, mane nne kuzwa ku inhuho ziina ku mana iyaanza nne zoovere ziina ha vusu vwe chipura chaakwe, ⁵ mane nnikuzwa kwa Jeeso Kirisiti, iiye mupaki (mushupi) yoo sepahala, nneeye woku zaalwa intaanzi ku vafu, mane nne Simwiine uva Simwiine ve inkaanda. Kwaalyi iiye yaa vat u suni, choku tu shaanza mu zivi zeetu cha malaha aakwe iiye mwiine - ⁶ iye yaa va tu chiti vasimwiine nne vapurisita/ varuti kwe Ireeza nne iisi - ku jolola nne ziiho choku ikalyilyira. Kuve voovo vulyo. ⁷ Muvone, u keeza cha makope; mane lyiinso lyimwe nne lyimwe kalyi muvone, mane nnaavo vava mu giintolyi. Mane vantu voonse ve inkaanda kava lyire che ivaka lyaakwe. Nnizumina, kuve vulyo. ⁸ Njeeme Alufa nne Omegha," ku waamba Simwiine, "iiye yo wiina kwa teni, a veena kwa teni, mane nne yoo keeza, si ziho zoonse." ⁹ Imme Johani - mwaanaswiisu kunineenu nne mulyikani weenu muku nyaandiswa nne mu muvuso nne mu inkulo inde ya Jeeso - nni veena mu chida chi sumpwa Patamosi, cha mavaka e lyiinzwi lye Ireeza, nne kuha vupaki kaha Jeeso. ¹⁰ Nni veena mu luhuho mu izuva lye Ireeza. Choku zuwa lyiinzwi ikaando ku masulye aangu mane iiri intorombita. ¹¹ Nni lyiti, "Ngolye cho voona mu ivuka, choku chi tumiza ku makereke eena ku mana iyaanza nne oovere eena kwa Eshiya; Kwa Efesasi, nne kwa Shaameena, nne kwa Perigamosi, nne kwa Chiyaachira, nne kwa Saradisi, nne kwa Filadelufiya, mane nne kwa Lawudikiya." ¹² Mmi ninaa chevuka kuti nni vone lyiinzwi saka lyi waamba nnaame, muku chevuka kwaangu, nni naa vona ziivikiro za makandera ze ighauda tu mana iyaanza nne toovere. ¹³ Mmi mukati ka makandera eena ku mana iyaanza nne oovere, cho kuva nne zumwe yoo swana mane iiri mwaanaswuiisu wo mukwaame, nna zweete zizwaato zi musika ku mateende mmi ha maheta aakwe nna zweete chizwaato che ighauda. ¹⁴ Mutwi nne insuki zaakwe nni zituva mane iiri lusiinga - hape mane iiri kapuku kuku tuva; mmi menso aakwe nni a suvira mane iiri mulyiro. ¹⁵ Mateende aakwe aawo nni a kola mane iiri chisipi che buronzi, muku vaa ku kola mane iiri a vaati nni a hiishwa mu ibiimbiro, lyiinzwi lyaakwe iilyo choku swana iiri mulyumo wa menzi maangi. ¹⁶ Mmi mu iyaanza lyaakwe lya malyo a vaa kweete inkaani ziina ku mana iyaanza nne zoovere; mu kalomo kakwe nni kwa zwa isavulye yi va shengete koo vere. Mmi vusu vwaakwe vuuva ku vereenga mane uvwiri izuva lyi hiishiza ha hulu. ¹⁷ Mmi chiinga nna muvona, nni nna wiira ha mateende aakwe siina muntu yoo fwiire. Ku zwaaho iiye mpwaa nni viikire iyaanza lyaakwe lya malyo, cho kuni cho kuti," Siye ku kalyirwa. Njeeme we intaanzi nni wa mamanimani, ¹⁸ Njeeme iiye yoo hala, Ya vaa fwiire, mmi lolye, nni halyilyiire muku saa mani! mane nniina izkiyi e ihere nne lufu. ¹⁹ Lyinu ngolye hansi zintu zi waa vona, nne zintu ziina ha teni, mane nne zintu zeeti nni zive kwa teni kuzwa ha hanu. ²⁰ Mmi zilyi wuungwiire ze inkaani ziina ku mana iyaanza nne zoovere zi waa vona ziina mu iyaanza lya malyo, mane nne ziviikiro za makandera ze ighauda twiina ku mana iyaanza nne toovere: Inkaani ziina ku mana iyaanza nne zoovere nje mangiloyi a makereke a mana iyaanza nne oovere; mmi mane nne tusamu twa makandera tu mana iyaanza nne toovere tu waa vona nje makereke a mana iyaanza nne oovere.