¹ Mmi ne ichira mu chisepe, naa hitirira vonse mbwiita ku ka sika ku muzi kwa a zwa. ² Mu vone ni va ka mulyeetera muntu a vaa fwiire imwi imbalyi, naa ka dansi ha vulo: mmi Jeeso cho ku vona itumero yaavo naacho yoo u fwiire imwi imbalyi ''Mwaana swiisu,lyitumere, zivi zaako chi zaa woonderwa.'" ³ Mmi, muvone, vamwi va vangolyi ni vaa wambinsaana, cho kuti uuzu muntu u tukana. ⁴ Mmi Jeeso cho ku iziva minahano yaavo naati, Chinzi ha mu nahana vuvilaala mu inkulo zeenu? ⁵ Lyaaho chihuva nchee chihi ku ku chiwaamba, zivi zaako chiwa ziwoonderwa; kamba ku cho kuti, vuuke u yende? ⁶ Mmi kuchitira kuti mu izive kuti mwaana wo muntu wiina ziho zo ku woondera zivi mu inkaanda; iiye naacho yoo u fwiire imwi imbalyi, ''Vuuke, hiinde vulo vwaako, mmi u kwiya ku inzuvo yaako." ⁷ Unkosi cho ku ziima cho ku ya ku inzuvo yaakwe. ⁸ Ikunnga chiinga lya vona ichi chintu, cho ku komokwa mane cho ku temba Ireeza, yo u heere vantu ziho zi sika aho. ⁹ Jeeso chiinga a hita aho, a vaa voni mukwame a vaalyi ku sumpwa Mateu yaa va ikeere ha itante ikunganyezwa mitero.Naa mu cho kuti, "Ni ichirire." A vaa zimi cho ku mu ichirira ¹⁰ Mmi ni kweeza ku pangahala kuti, Jeeso cho u si kweete kulya mu inzuvo, vone, vantu vaangi vulyo ne va panga vuvilaala cho ku iza ku ikala naaye ne varutwana vaakwe. ¹¹ Mmi lyiinu Vafarasayi chiinga vaa vona, ni vaacho varutwana vaakwe, nche chiinzi simwiine weenu haalya ne vantu vulyo va panga zivi? ¹² Mmi Jeeso chiinga zuwa vulyo, cho ku vacho kuti, vasaa lwaalyi kavati niva saka ingaanga, mmi mbwiita vulyo va lwaala. ¹³ Mmi mukwiya paaho muka lyitute kuti ku tarusa nzi, Chisakahala vulyo chisemo, isingi chitavero: ka kuti ka heena nni vee ziri ku sumpa va shiyeeme, mmi mbwiita va panga vuvi kuti valyi nyaanse. ¹⁴ Ni kweeza kwaalyi varutwana va Johani, cho kuti, "Chiinzi uswe ne Vafarasayi ha tulyi nyima zilyo kaangikaangi, mmi varutwana vaako aavo ni va sa lyinyimi. ¹⁵ Mmi Jeeso naa vata kuti, aa mmi ve izite ku iseso va woola ku zunguvalyirwa musesi naa siina kwa teni? Nniha kuva vulyo, mazuva ka eeze, a chita kuti yoo usesa kaaku hiinditwa mu valyi, lyiinu njeeti ni va lyinyime zilyo. ¹⁶ Ka kwiina muntu yo u woola ku shumbera chijira chihya ku chikulukulu, Ka kuti haku pangahala vulyo ibwaanta lya teni lyiiza ku kaanduha a hulu. ¹⁷ Mane hape ne vantu kavati ni va viikaanga vujwara vuhya mu makavi makulukulu; Ka kuti a manina chi aa patuka, mmi vujwara cho ku itika, mmi makavi cho ku shinyeha: mmi va viika vujwara vuhya mu makavi mahya; ku chitira kuti zi woolye ku teenda ne kuva ha teni. ¹⁸ Cho u sii kweete u waamba naavo iizi zintu, vone, ni kweeza induna imwi, cho ku iza ku mu fukamina, ni yiti, mwaanangu wo mukazana u swaneezi chaafwa kalye hanu: mmi wiize umu viike iyanza lyaako, choo vulyo mwaa halye. ¹⁹ Mmi Jeeso naa katuka, cho ku mu ichirira, varutwana vaakwe naavo cho ku yeenda. ²⁰ Mmi, vone, mukulwaakazi,yaa vaalyi ku lwaala vutuku vo ku itika malaha zirimo zimana ikumi ne zoo vere, ne iza ku masulye aakwe, cho ku woonda ijira lye chizwaato chaakwe: ²¹ Ka kuti a va lyilwiiri kuti, chiini naa woonda vulyo chizwaato chaakwe kani holye. ²² Mmi Jeeso cho ku sandumuka chiinga a mu vona, cho kuti, mwaana, humbulyesehe; itumero yaako chiya ku hoza. ²³ Mmi Jeeso chiinga eza mu inzuvo ye induna, cho ku vona va zaanisa zilyizo ne vantu ni va kweete kulyira, ²⁴ Naa cho kuti, "Muyeende, ka kuti mukazanaana kaa fwiire, mmi u lyeere. mmi ni va museka cha kanyanso. ²⁵ Mmi ikunga chinga lyaa zwiisikizwa hanze, iiye cho ku injira, cho ku ka mu wonda che iyaanza, mmi muhwiire naa vuuka. ²⁶ Makande che ichi chintu cho ku izivika mwe iyo inkanda yonse. ²⁷ Mmi Jeeso chingaa zwa uuko, vahofu voo uvere cho ku mu shaala mu masulye, ni va kaya vu huwa, ni vati, uuwe mwaana wa Daafita, ko u tu fwiire inse. ²⁸ Mmi chingaa sika mu inzuvo, vahofu cho ku iza kwaalyi: Jeeso mpaa aha haa va cho kuti, mu zumina kuti ni woola ku mu chitira vulyo? Ni va mu cho kuti "Eni, Simwiine." ²⁹ Lyinu iiye mpaaha ha woonda menso aavo, naati, ku mu pangahalyire ku ya che itumero yeenu. ³⁰ Mmi menso aavo ni e wuka; Jeeso lyinu cho ku va cho kuti, mu vone kuti ka kwiina yo wiiziva iiyi indava. ³¹ Mmi aavo, chinga vaazwa aaho, cho ku ka izuza ilyi ikande mweecho chisi chonse. ³² Ivaati aavo vakwaame voovere chi va ka zwiire, muvone, mukwame yaa sa wambi yaa va injiirwa idimona naa ka lyeetwa kwa Jeeso. ³³ Mmi lyiinu idimona chiinga lyaa zwiiswa, cho ku waamba.Vunnginngi vwa vantu cho ku shaala va komoketwa, ni vati "Iichi ka chiini ku vonwa vuti mwa Isiraere. ³⁴ Mmi Vafarasayi va vaalyi kuti, "Che induna ya madimona,u zwiisa madimona." ³⁵ Mmi Jeeso naa yeenda muzi ne muzizana, naa kaya vu ruta mu masinagoge, naa hasa mulaeza wo muvuso,naa hoza vutuku vumwi ni vumwi mane ne malwaalyira onse mu vantu. ³⁶ Mmi chingaa vona vunngi vwa vantu, cho ku va fwiira inse, mukuti chi va vaa katazehete ne ku honyeha, Va vaalyi ku kola sine iri imberere zi seena mulyisani. ³⁷ Cho ku cho varutwana vaakwe kuti," Ku sinza kunngi, mmi vatendi vache; ³⁸ Lyiinu mpaaho mu rapere Simwiine wo ku sinza kuti a tumiza vatendi mu ku sinza kwaakwe.