¹ Jeeso naa sumpa varutwana vaakwe veena ikumi ne toovere, cho ku va ha ziho mu inhuho imbilaala, kuti va zi zwiise, mane ne kuhoza matuku ne malwaalyira onse. ² Mmi lyinu mazina a va Apositoloyi nje aa, we ntanzi, Sayimoni, (hape yo u sumpwa Pitorosi), ne Enduru mukulwe; Jemusi mwaana wa Zebediya ne Johani mwanche. ³ Filipo, Batholomeu; Toomasi, ne Mateu yo u kunganya mitero; Jemusi mwaana wa Alufeyaasi, ne Thadausi ; ⁴ Sayimoni we mpumpu ne Judaasi Isikariyota, ya a va manini wa muwuza. ⁵ Vo vwaava veena ikumi ne toovere, Jeeso naa va tuma cho ku valaya kuti, mu siye ku ya ku ve inkanda, mane nangati mu mizi ya maSamariya, mu siye ku injira mwa teni; ⁶ Mmi vulyo mu kwiya ku imberere ze inzuvo ya Isiraere zi zovete. ⁷ Mmi muyeende, ni mukaya vukutaza ni muti, muvuso wo ku iwulu chi wiina hafwihi. ⁸ Mu hoza va lwaala,mu vuusa vafwiire,mu joloza va si ziseenda mane ne ku zwiisa madimona.mu vaa heewa ne ku seena ituwero,muhe ne ku seena ituwero. ⁹ Mu siye ku hinda igauda,isilifera nandi ikopori mu zikwama zeenu. ¹⁰ Mu siye ku hinda chihindiro cho musipiri nangati chizwaato chimwi he mbalyi,nandi nsaangu nandi inkolyi, mu kuti mutendi u swanerwa ne zilyo zaakwe. ¹¹ Muzi umwi ne umwi weeti ne mu injire mu ulyi,mu sake yo u swaneere cho ku ikala kwateeni mbwiteeri chi na ni mwa nyemuka. ¹² che mu injira mu inzuvo, mu rumeresa. ¹³ cho kuti inzuvo i swaneere,ikozo yeenu ive ku ilyi. cho kuti ka i swaneere, ikozo yeenu i mu voolyere. ¹⁴ Kwaavo va sa mu tambulyi nandi ku teeka manzwi enu, che mu zwa mwe iyo inzuvo nandi muzi, mu kunkumune isuko lya matende eenu. ¹⁵ Vusakusima ni mi lwiira, ka ku ve ku ina vutuka ku mizi ya Sodoma ne Gomora mu izuva lye ikatulo ku zamba kwa iyo mizi. ¹⁶ Mu vone,ni mu tumisa sineeri imberere mukati ka vaasiibwe,lyinu hee,mu talyife sineeri inzoka mmi cho ku vula vuvilaala sineeri inkuva. ¹⁷ Mu mamere vantu! Ka va mu twaalye mu zikota, mane ne ku mu injirika mu masinagoge aavo. ¹⁸ Mane ka mu lyeetwa ha vusu vwa vavusi ne vasimwiine che ivaka lyaangu, ku chitira vupaki kwaavo ne ku vantu ve zisi zinngi ¹⁹ Ha va mu lyeeta, mu siye ku vireera cho kuti mu mu wambe vulye nandi nzi, mu kuti zi mu lukera ku wamba ka mu zi heewa mwe icho chivaka. ²⁰ Mu kuti ka heena unwe mwe eti ne mu ku wamba mmi ka ku ku wamba luhuho lwe Isheenu yeeti naa mambe mweenu. ²¹ Mwaanaswiisu kaa lyeete mukwaamekuninaaakwe ku lufu, ne isi o muntu mwaane. Vaana ka va vukulukire vuzaazi vwaavo ku chita kuti vee ihaiiwa. ²² Ka mu toyeewa ne zumwi no zumwi che ivaka lye izina lyaangu. Mmi yeeti naa wonderere mbwiteeri ku mamanimani, uuzo muntu kaa vulukwa. ²³ Ha va mu kataza mu munzi umwi mu ngombweere koo umwi, mukuti vusakusima ni mi lwiirite, keeti ne mu mane mizi yonse mwa Isiraele Mwaana O muntu naa seeni ku sika. ²⁴ Murutwana ka heena mukando ku muruti waakwe, mane ne muhikaana ku va he iwulu lya simwiine waaakwe. ²⁵ Ku lyikeene kuti murutwana a swane ne muruti waakwe, mane ne muhikaana a swane ne simwiine waakwe. Cho kuti va sumpite muhitizi we inzuvo Bilizebule, lyinu mazina aavo ve iyo inzuvo aawo mu a viihire hayi! ²⁶ Lyinu he mu siye ku va tiya, mukuti ka chi heena chi wungwiirwa chi seeti ne chi tondezwa, mane ne chi lyi wunngwiire chi seeti ne chi izivwa. ²⁷ Chi ni mu lwiira mu keerima, mu chi wambire mu iseri, mane ne chi mu zuwira kunsi mu matwi eenu, mu chi wambire ku iwulu ha iwulu lya mazuvo. ²⁸ Mu siye ku tiya avo va woola ku ihaya muviri ni va sa woolyi ku ihaya luhuho. Kunzelyaaho,mutiye yoo uwola ku sinya konse muviri ne luhuho mu ibimbiro. ²⁹ Aa tunsinsi toovere ka tu wulyi isherenyi lyi niinizana? Mmi mane ka kwiina kaamwiina kaato ka wiira hansi kwanda izivo ye Isheenu. ³⁰ Lyinu mane ne isuku ze mitwi yeenu zonse zi valyitwa. ³¹ Mu siye ku tiya. Mu sakahala ahulu ku zamba tunsinsi tungitungi. ³² Lyinu hanu yoo u ha vupaki chaangu ha vusu vwa vantu, ka ni he vupaki chaawe ha vusu vu vataayo ku iwulu. ³³ mmi yo u ni kanana ha vusu vwa vantu, ka ni mu kaane havusu vu vataayo ku iwulu. ³⁴ Mu siye ku zeeza kuti ni va iziri ku lyeeta ikozo mu inkanda. Ka heena ni va iziri ku lyeeta ikozo, ni vaa lyeeti chilwiisaniso. ³⁵ Mu kuti ni vaa iziri ku chita kuti mukwaame a lyi lwiisa ne isi, ne mwaanakazana ne nnyina, ne mwaanazaala ne nnyinazaala. ³⁶ Zira zo muntu ka ive avo ve nzuvo yaakwe. ³⁷ Iye mwiine yo u suni isi nandi nnyinaku ni zamba ka ni mu swaneere.Mane naaye yo u suni mwaana kazana aakwe nandi mwaanaswiisu waakwe ku zamba ime kaa ni mu swaneere. ³⁸ Iyee mwiine yaa sa hindi chifapaano chaakwe cho ku ni ichirira ka ni mu swaneere. ³⁹ Iye yoo u u lyi waanina vuhalo vwaakwe ka vu mu zovere.Mmi iye yoo u zoverwa vuhalo vwaakwe che ivaka lyaangu kaa a vu waane. ⁴⁰ iye yoo mu tambula,u tambula ime, mane naaye yoo ni tambula u tambula iye yaa va ni tumi. ⁴¹ Iye yoo u tambula muporofita mukuti muporofita ka a waane mupuzo wo muporofita.Naaye yo u tambula mushiyami mukuti u shiyeeme kaa waane mupuzo wo mushiyami. ⁴² Mwiine yoo u ha kwaava va niinizana, nandi inkomoki ya menzi a tontola kuti vanywe, mukuti murutwana,vusakusima ni mu lwiirite, ka kwiina mweeti naa zoverwa mupuzo waakwe.