¹ Mmi nni kweeza ku chitahala kuti, Jeeso chiinga mana ku waamba zoonse iizi, cho kucho varutwana vaakwe. ² ''Kana muiizi kuti mu mazuva oovere muyi ku veere mukiti woku zambuluka, mmi Mwaana wo Muntu kaa yeendwa mane choku vambulwa.'' ³ Lyiinu nni kwaa kungana voonse vapurisita va kulwaana, nne vangolyi, nne vakulwaana va vantu, ku muzi wo mupurisita mukaando a hulu ku valyi voonse, yaa vaalyi u sumpwa Kayafasi, ⁴ Nni vaa waambinsaana nne ku ziminzaana muva woola kuti Jeeso va mo nnantoreke, mane choku mu ihaya. ⁵ Mmi nni vaati, ''kwaanda o luzuva lo mukiti, ku chitira kuti saanzi nni kuvi nne munyunga mu vantu.'' ⁶ Lyiinu Jeeso chiinga aati cho wiina kwa Betani mu inzuvo ya Sayimoni we imbingwa, ⁷ cho lyi goonkete nni kweeza kwaalyi mukulwaazi nna ka kweete inkooma lye zinuunkisa vulotu zidura a hulu, choku mu itira iizo mu mutwi. ⁸ Mmi lyiinu varutwana vaakwe chiinga vaa vona iichi, cho kuva nne kunyeerwa nni vati, ''mavaka o ku zeneenga chinzi ? ⁹ Ka kuti aa mafuta nni a vaa wuzwa cha malyi maangi, ku zwaaho choku aha vahumanehi.'' ¹⁰ Mmi Jeeso, kwi ziva iichi, choku vacho kuti, ''Mu katalyekeza inzi uuzu mukulwaakazi? Kamu vweene kuti waa ni pangera musevezi mulotu. ¹¹ Mmi uunwe mu ikala nni mwiina nne vahumanehi inako zoonse, mane keena inako zonse ne mwiina naame. ¹² Ka kuti wa nni itira aa mafuta ha muviri, a va chitire mu ku wuungwa kwaangu. ¹³ Nni mulwiirite kuti, kumwi nne kumwi kweeti uuwu mulaeza nniwu waambwa mu inkaanda yoonse, u zu mukulwaakazi chaa za chite, Ka chi waambwa cho kumu lyikumbulusa.'' ¹⁴ Lyiinu zumwi wa veena ikumi nne toovere, yoo sumpwa Judaasi Isikariyota, nnaa yeenda ku vapurisita va kulwaana, ¹⁵ Choku ka vacho kuti, ''mu mu nnihe inzi, china mmu muha?'' Mmi aavo nni vaa zumminzaana nnaaye che nne ikumi voo tatwe vu vuwayawaya. ¹⁶ Mane kuzwa cheeyo inako nne kala nna lyiindiire chivaka choku mu twaala kuzalyi. ¹⁷ Lyiinu cho luzuva lwe intaanzi lo mukiti we chiinkwa chi sa viriiswa varutwana vaakwe cho kwiiza kwa Jeeso nni vati, ''u saka kuti tuka ku vaakanyereza kuhi zilyo zoku zaambuluka?'' ¹⁸ Mmi nnaacho kuti, mu kwiiya mu mizi mekaando ko zuna mukwaame choku ka mucho kuti, moruti nnaati, inako yaangu chi yiina ha fwiihi. Mmi muni viike zilyo zaangu zoku zaambuluka he inzuvo yaako nne varutwana vaangu.'' ¹⁹ Mmi varutwana nni vaa chita siina Jeeso mwaava va layi; choku panga zilyo zoku zaambulukwa. ²⁰ Mmi lyiinu chiteengwaana chiinga chaa sika, choku ikala nnaavo veena ikumi nne toovere. ²¹ Chiva kweete kulya, choku vacho kuti, nni mulwiirite, zumwi weenu mwaani wuke.'' ²² Mmi nni vaa taanga ku zuwa vutuku a hulu, muva vaati zumwe nne zumwe waavo choku taanga ku mulyi vuuzikiza nni vati aa njeeme?'' ²³ Nne tava nnaati, iiye sii iyaanza lyi lya naame mu kasuva, njeeye yeeti ani wuke. ²⁴ Mwaana wo Muntu kaa yeende, siina muku ngolyetwa ka haakwe. Mmi ku mayivite vulye uuzo muntu yeeti wuke Mwaana wo Muntu! ku vaa shiyame uuzo muntu kuti kalyi nna sana avaa zaalwa.'' ²⁵ Judaasi, yaava mu wuke nne tava cho kuti, , aa mmi njeeme Moruti? Choku mu cho kuti, chi waa waamba.'' ²⁶ Mmi chi vaa sii kweete kulyi, Jeeso choku hiinda chinkwa, choku chiha mikoonde, choku chi gamuna , cho ku chi ha varutwana vaakwe, nnaati, ''mu hiinde, mulyie, uuwu njo muviri waangu.'' ²⁷ Mmi nna hiinda inkomoki, cho lyi tumero, cho kuyi va ha , nnaati, ''mu yinywe mo voonse. ²⁸ Ka kuti aa nje malaha aangu o tumarano e nhiya, e itirirwa vuungi vuungi vwa vantu kuti vu woolye ku woonderwa zivi zaavo. ²⁹ Mmi nni mu cho kuti, keeti nni ni voolye hape nni nywe menzi aa e chihantu cho muwoomba nnaanwe mbwiita mwee lyiina izuva hape lyeeti nni ni kunywa nni nniina nnaanwe mu muvuso wa Taayo.'' ³⁰ Mmi lyiinu chiinga vaa mana ku ziimba luziimbo, nni vaaya ku iruundu lya Olive. ³¹ Lyiinu Jeeso choku vacho kuti, mu voonse mu mu shaalye mu kupehete che ivaka lyaangu masiku a suunu, Ka kuti ku ngolyetwa, kani kave mulyisani, mmi imberere zo muraka kazi hasane cho kuya kulye. ³² Mmi chini naa vuuka hape, kani yeende ha vusu vweenu kwa Galaliya. ³³ Pitorosi nna mo cho kuti, itava nnaa mucho kuti, mane nnaagati vantu voonse muva kupehe che ivaka lyaako, imme kani kafwe ku kupehaa.'' ³⁴ Jeeso choku mucho kuti, ''nni ku lwiirite, kuti mwa anu masiku unkoombwe nni wu seene kulyira, mmo kuni lyi saampwiire koo tatwe.'' ³⁵ Pitorosi choku mu cho kuti, ''nnaangati kufwa nni woola kufwa nnaawe, keeti chine ku lyisampola.'' Mboona voovo vuti nne varutwana voonse choku waamba mu swana. ³⁶ Lyiinu Jeeso choku yeenda nnaavo ku inkaanda yi sumpwa Getesimani mane cho ku cho varutwana vaakwe, ''Mu ikalye aaha chini si karapera hana.'' ³⁷ Nnaa hiinda Pitorosi nne vaanakwaame va Zevediye choku taanga ku zuwa vutuku a hulu nnaa katazehete. ³⁸ Nnaa vacho kuti, ''Luhuho lwaangu lu sasamiinwa a hulu maaswe, muni woola kufwa. mu ikalye kalye nnaame hanu piri nni Mu lolyelyeere nname.'' ³⁹ Mmi nnaa yeendera ha vusuzana, cho kuwa cho vusu vwaakwe haansi choku rapera. Nnaati, ''Uuwe Taayo, haiva nni ku woolyeeka, a iiyi yini zambuluke. mmi nni ku saalyi choku saka kwaangu, vulyo mbwiita choku saka kwaako.'' ⁴⁰ Nne iiza ku varutwana choku va waana va lyeere, cho kucho Pitorosi, ''Chiinzi, ka heena wa woola mane nnaangati ku yiiza nnaame mu inako yi mwiina? ⁴¹ Mu lyiise choku rapera, kuti saanzi mu injiri mu mulyiko. Cho vusakusima luhuho lu tavera, mmi inyama yi kataheere.'' ⁴² Nna yeenda hape lo vuuveri, choku ka rapera. Nnaati, ''Taayo, haiva keeti chiku hita vulyo mbwiita nni nywe, a ku suna kwaako ive uuko ku pangahala.'' ⁴³ Neeza hape mmi choku va waana va lyeere, meenso aavo nni a lyemete. ⁴⁴ Choku va siya hape, nna a lyi yeendeere kuku rapera lo vuutatu, nna waamba manzwi a swana. ⁴⁵ Ku zwaaho cho kuiiza ku varutwana vaakwe choku vacho kuti, ''Mu sii lyeere nne kulyi teeka? Mu vone, inako chi yiina ha fwihi, kuti Mwaana wo Muntu a heewa mu manza ava panga zivi. ⁴⁶ Mu vuuke, tu kwiya. Mu vone, iiye yo uni wuza cho wiina hafwihi.'' ⁴⁷ Cha ava ku sii kweete ku waamba, haa, Judaasi wumwe wa veene ikumi nne toovere, nne iza. Vantu vaangi vaangi nni ve iza nnaaye ku kazwa ku vapurisita vakulwaana nne vakulwaana va vantu. Nni va keeza nne milyiinga nne inkolyi. ⁴⁸ Lyiinu iiye mukwaame siku wuza Jeeso nna vaha chikuka, nnaati, Zumwe vulyo weeti nni xhoote, nje iye yoozo. Mu muwoonde.'' ⁴⁹ Hoo hwaaho vulyo nneza kwa Jeeso cho kuti, ''Rumere, Muruti!'' choku mu xhoota. ⁵⁰ Jeeso choku mucho kuti, ''Mulyikani, chite cho u ke ziriire.'' Ku zwaaho nni ve iza choku woonda Jeeso, choku mu hiinda. ⁵¹ Mmi mu vone, umwe kuva veena nne Jeeso choku tapulula iyaanza lyaakwe, choku hiinda mulyiinga, choku kaanka muhikaana wo mupurisita mukaando mbwiita ku kosola kutwi kwaakwe. ⁵² Lyiinu Jeeso nnaa mucho kuti, ''Chite u vooze mulyiinga uuwo mu meekalo aawo, ka kuti voonse va kweete mulyiinga ka ve ihayiiwa cho mulyiinga. ⁵³ Mu nahana kuti imme hahanu keeti chini rapera Taayo, mpohona hoo hwaaho vulyo choku nniha mangiloyi maangi maangi? ⁵⁴ Mmi lyiinu mangolo a woola ku izuzirizwa vulye, ka kuti muku lukeere kuva mboona vo vuti? ⁵⁵ Che iyweeyeyo inako yi swana Jeeso nna lwiira vuungi vuungi, ''Aa mu kee zirire ku woonda musah chi mu keeza che inkolyi nne milyiinga vuti? Nni vaalyi ku ikalaanga nnaanwe mu iteempere izuva nne izuva nni ni ruta, mmi ka heena muva ku woola kuni woonda. ⁵⁶ Mmi zoonse iizi chi zaa pangahalyira kuti mangolo ava porofita a woolye ku izuzirizwa.'' Ku zwaaho mpaaha varutwana vaakwe ha vava ngombolyi, choku mu siya yee yeena. ⁵⁷ Mmi aavo vava woondi Jeeso choku mu hiinda choku mutwaala kwa Kayafaasi mupurisita mukaando, uuko kuva ka kungeene vangolyi nne vakulwaana voonse. ⁵⁸ Mmi Pitorosi nna mushaalyira ha masulyezana mane mbwiita kuka sika ku inzuvo yo mupuirisita mukaando. Choku ke injira mukati, mane nne ku ke ikala nne vashangavira kuti a woolye ku vona che iti chi pangahalye. ⁵⁹ Mmi lyiinu vapurisita vakulwaana nne vaziwululyi voonse choku ikala nni va kweete kulyika ku vona muva woola ku hambiriza Jeeso, kuti va woolye kumu ihayira ha teni. ⁶⁰ Mmi choku vula waana chimwe, mane nnaangati vahambirizi vaangi va vaa lyiki ku hambiriza ka kwiina mulaandu uva va mu waanini. Mpaaha lwa mamanimani haku ve iza vakwaame voovere ha vusu ⁶¹ cho kucho kuti, Uuzu mukwaame a vaati, ''Nni woola ku zakununa itempere ye Ireeza mane cho kuyi zaaka mu mazuva ootatwe.''' ⁶² Muruti mukaando nna ziima, choku mucho kuti, ''Chiinzi hoo seena cho wu itava ha teni? Aava vantu koo zuwiire kuti kete va tiinzi he iwulu lyaako?'' ⁶³ Mmi Jeeso nnaalyi toontolyeza, mupurisita mukaando choku mucho kuti, Nni ku laula che Ireeza yoo hala, kuti utu lwiire haiva njo uuwe Kirisiti, mwaana we Ireeza.'' ⁶⁴ Jeeso nnaa mu itava nnaati, ''Chi waa waamba uuwe u mwiine. Mmi nni mulwiirite, kuzwa hanu njeeti nni muvone Mwaana wo Muntu nne ikeere ku iyaanza lya malyio lye ziho, mane nna keeza cha makope e iwulu.'' ⁶⁵ Lyiinu mupurisita mukaando nna ngatoola zizwaato zaakwe nnaati, ''Chaa waamba matuka! Mutu ku sakira inzi vapaki? Ka muvone, uunwe mu veene chi mwa mulyi zuwira mwaa tukana. ⁶⁶ Muyi vona vulye?'' Nni vee tava nni vati, ''Ngo ku ihaya vulyo cho kuya cha mafosisa aakwe.'' ⁶⁷ Mpaaha ha vava mu swiiri mate mu vusu mane choku mukava ku zwaaho choku mu wopa cha mapaama a mayaansa aavo, ⁶⁸ nni vati, ''Tu porofite, uuwe Kirisiti, njeeni toota waku kava?'' ⁶⁹ Lyiinu Pitorosi cho wuikeere mu irapa, mpaaha muhikaana kazana haa vee iza kwaalyi cho kucho kuti, ''Mfwee nnaawe saka wiina nne Jeeso wa Galaliya.'' ⁷⁰ Mmi nna kanana hakati kaavo voonse, nnaati, ''Ka niizi nne kuti kete u waamba nzi.'' ⁷¹ Mmi chiinga zwiira haanze, zumwe mukazana choku muvona, choku lwiira voonse va veena ha teni, ''Uuzu mukwaame saka wiina nne Jeeso wa Nazareta. ⁷² Hape nnaho aaha nna kanana cho kulyi konka, ''Ka niizi uuzo muntu.'' ⁷³ Ka vakazana vulyo nni kweeza aavo va vaa zimeene he imbalyi, choku cho Pitorosi, 'Aaho tuku lwiirite nnaawe u wumwi[e] waavo, ka kuti nne ku waamba kwaako vulyo kulyi tarusa. ⁷⁴ Mpaaha lyiinu iiye haa taanga ku koonka nne ku tukana, Ka niizi uuzo muntu,'' choku hweera vulyo hoo hwaaho mukoombwe choku lyira. ⁷⁵ Pitorosi choku kumbulukwa manzwi a Jeeso, a vaalyi ku mucho kuti, ''Piri mukoombwe nni wu seeni kulyira mmo kuni lyi sampwiire koo tatwe, ku zwaaho nna zwiira choku ka lyira a hulu maaswe.