¹ Lyiinu aaha njeeti muvuso woku iwulu nni wu swaniswa nne va kamwalye venna ikumi, va vaati nni vaa hiinda tumparamba twaavo, choku yeenda kuti vaka taambulye yoo sesa. ² Mmi va mana iyaanza vaavo va vaa kwanine, vamwe va mana iyaanza vaavo va vaalyi va holo. ³ Aavo va vaalyi va holo nni vaa hiinda tumparamba twaavo, naanta ku hiinda mafuta amwi he imbalyi. ⁴ Mmi va venna ingana aavo choku hiinda tumparamba twaavo nne amwi mafuta he imbalyi. ⁵ Mmi lyiinu kamwalye chiinga lyieha, voonse vulyo choku manina chi vaa sukula choku laala. ⁶ Mmi hakati ka masiku nni kwa ava nne ku sumpwirira, ko kuti, 'Mu vone, kamwalye! Mu yeende muka mu taambulye.' ⁷ Lyiinu mpaaha voonse aava va kamwalye hava vaa vuuki choku minika a hulu tumparamba twaavo. ⁸ Va mahaafu cho kucho va kwanine kuti mu tuhe kwa teni ku mafuta eenu ka kuti eetu chi aa mana.' ⁹ Mmi vakwanine cho kucho kuti, ka kuti a a mafuta eena ha teni atu lyikeene kwaanda kuti tu muhe kwa teni, mmi lyiinu mu kwiiya kuva wuza mu kalyi wulyire kwa teni.' ¹⁰ Mmi lyiinu chiinga vaa yeenda kuku ka wula, kamwalye cho kuiiza, mpaaha kwaavo vava lyi vaakeenya hava vee njiri nnaaye mu inzuvo yo mukiti, mmi mulyaango choku iyalwa. ¹¹ Mpu ku kee ziriire vamwe aava va kamwalye, nni vati Simwiine, simwiine tu iwulyire. ¹² Mmi nne tava cho kucho kuti, 'Aaho nni mulwiirite, nni lyaate ku muiiziva uunwe.' ¹³ Mpaaho lyiinu mu lyiise, ka kuti ka muiizi izuva mane nne inako yeeti ne ize chaayo. ¹⁴ Ka kuti ku swaniswa mane iiri muntu yaa vaalyi ku kaya ku yiingi inkaanda. Yaa vaati nnaa sumpa vahikaana vaakwe, choku va siira zintu zaakwe. ¹⁵ Mmi ku wumwe nnaa muha malyi a mana iyaanza, ku zumwe oovere, zumwe nnaaye a mwiina. Ku zumwe nne zumwe mwa a vaalyi ku woolyera, hoo hwaaho vulyo choku taanga musipiri waakwe. ¹⁶ Yaa vaati nna hiinda ku mana iyaanza choku yeenda choku kaa zaaza muku lyikana, choku ka lyeeta amwe eena ku mana iyaanza. ¹⁷ Muku swana nnaaye yaa va taambwiire oovere choku kachita amwe oovere. ¹⁸ Mmi iiye yaa va taambulyi a mwiina choku yeenda, choku ka a siira mu iivu, kuka wuungula malyi a simwiine waakwe. ¹⁹ Chiiga kwa hita inako inde simwiine waavo vahikaana cho kuiiza choku ikala choku kandekisaana nnaavo. ²⁰ Mpu ku iziriire yaa vaati nnaa taambula malyi a mana iyaanza choku ka lyeeta amwe eena ku mana iyaanza. Nnaati, 'Simwiine, u va nihi malyi a mana iyaanza. Vone, nni va kaa zaaza choku waana amwe eena ku mana iyaanza he iwulu. ²¹ Simwiine waakwe choku mucho kuti, 'U va ka pangi nenza, uuwe muhikaana yoo shiyeeme nne ku sepahala! U vaa sepahalyi mu zintu zichezana. Choo vulyo muni ku chite kuti u laulye zintu ziingi. Chite wu injire paaho mu kusaanga kwa infumwaako. ²² Mpaaha nnaaye lyiinu yaa vaati nnaa taambula malyi oovere choku iiza cho kucho kuti, 'Simwiine, u vaati nni wa niha malyi oovere. Vone, nni va ka weeri ha teni amwe oovere hee iwulu.' ²³ Infumwaakwe mpwaa muteereere kuti, U vaa chiti nenza, muhikaana yoo shiyeeme nne ku sepahala! u vaa sepahalyi mu zintu zichezana vulyo. Muni ku chite kuti u laulye zintu ziingi. Wu ize zo ulyi tumere mu kusaanga kwa simwiine waako.' ²⁴ Nnaaye yaa vaati nnaa taambula a mwiina malyi choku iiza cho kucho kuti, 'Simwiine, nni veezi kuti u muntu u mukukutu. Yoo siinza ha waa sana waa lyima, mane nne ku kungaanya hoo sana u vaa siyite chimwe chaako. ²⁵ Nni vaa shaalyi nni tiite, choku manina choku kaa siira mu iivu. Vone, paaho hiinde zaako iizo. ²⁶ Mmi infumwaakwe choku mu itava cho kuti, 'Uuwe muhikaana yoo fosaheere nne vukata kumwiina, u vee zivi vulye kuti nni siinza hani sana nni vaa lyimi, mane nne ku kunganya hani seena chimwe ha teni. ²⁷ U vweene kalyi nno u va kahi malyi aangu vantu va zaaza malyi, hanu nnini vaati mu kuiiza kwaangu cho kuiiza ku waana chimwezana ha teni. ²⁸ Lyiinu mu munyaange malyi aawo ku zwaaho mu ahe uuzo yo wiina eena ikumi. ²⁹ Nkoku tarusa lyiinu kuti kwaalyi yo wiina, kaave nne ku weererwa he iwulu-- kaave nne ku dudeekerwa kamba ku soongerwa, mmi kwaalyi iiye yaa saa kweete nne chiniini chaa kweete kaa chi nyaangwa. ³⁰ Mumu woonde uuzu muhikaana yaa seena musula mumu sohere haanze mu keerima, ku waanika ku huwaana nne kulyira inkuunkuma.' ³¹ Mwaana wo Muntu chi neeza mu kuvereenga kwaakwe mane nne mangiloyi aakwe oonse, njeeti nnee kalye chipura chaakwe chi jolola mu muvuso waakwe wu jolola. ³² Ku zwaaho lyiinu njeeti nni ku kunganine kwaalyi mishovo yoonse, choku taanga nnaa va kauhanya, siina mulyisani yowu ikala nnaa kauhanya impene mu imberere. ³³ Kaa viike imberere ku iyaanza lyaakwe lya malyio mmi impene iizo kulya mamoonso. ³⁴ Mmi lyiinu Simwiine njeeti nnaacho aavo veena ku iyaanza lyaakwe lya malyio kuti, muiize, uunwe mwiina mu mikoonde ya Taayo, mulyie vuswa vwe iwulu vu mu vaati mu ku vaakanyezwa kalye kuzwa ku intaanzi ye inkaanda. ³⁵ Ka kuti nni vaa fwiire inzala, mmi nni mwa nniha cho kulyia; nni vaa fwiire inyoota mmi nni mwa nniha menzi; Nni vaalyi nni muyeenzi mmi nni mwa nni taambula mu mazuvo eenu; ³⁶ Nni veena mampunu, mmi nni mwa nni zwaatika: nni vaalyi ku lwaala mane muva nni poteri; Nni veena mu intorongo, mmi nni mweeza kwaangu.' ³⁷ Lyiinu va jolola njeeti nni va muitave choku mucho kuti, nje lyiiri, 'Simwiine nni twa ku vona nno fwiire inzala ku zwaaho uuswe choku kuha zo kulyia? Kamba nno fwiire inyoota uuswe choku kuha cho kunywa? ³⁸ Nje lyiiri nni twa ku vona nno ulyi umu yeenzi, ku zwaaho uuswe choku kulyi hiindira? kamba nno u saa zweete, mmi uuswe choku ku zwaatika? ³⁹ Kamba nje lyiiri nno u lwaala, kamba mu intorongo hatu veeza kwaako? ⁴⁰ Mmi Simwiine mpweeti nne itavire choku vacho kuti, aaho nni mulwiirite, siina mumu vazi chitiri voo vwaavo va voneka vuniini vaakwaangu, muva chini chitiri. ⁴¹ Lyiinu njeeti nnaacho aavo veena ku iyaanza lya mamoonso nnaati, 'Muzwe aaha haangu, uunwe mu kutitwa, mu kwiiya mu mulyiro wu vaakanyereezwa Saatani nne mangiloyi aakwe, ⁴² Ka kuti nni vaati nni nnaa fwa inzala mmi ka heena muva nnihi cho kulyia; Nni va fwiire inyoota, ka kwiina menzi amu va nnihi: ⁴³ Nni vaalyi nni muyeenzi mmi ka heena muva nni taambulyi; nni nniina mampunu ku zwaaho choku saa nniha zizwaato; chini lwaala nne ku injira intorongo, ka heena muva nni tokomeri. ⁴⁴ Mpaaha lyiinu nnaavo heeti nniva mu itave nni vati, 'Simwiine, nje lyiiri nni twa ku vona noo fwiire inzala, kamba inyoota, nno ulyi umu yeenzi, kamba nno saa zweete, kamba nno lwaala, kamba nno wiina mu intorongo, mmi mane choku saa va nne isipe nnaawe?' ⁴⁵ Njeeti nna ave itave nnaati, 'Aaho nni mulwiirite, siina mumu saana muva zi chitiri voo vwaavo va voneka vuniini, wiizi ka heena mu vazi nni chitiri.' ⁴⁶ Mmi voo vwaava kava yeende muku nyaanseha ku saa mani mmi va jolola aavo cho kuya mu vuhalo vu saa mani.