¹ Lyinzwi lye Ireeza nni lyeeza kwa Joona lo vuuveri, nni lyiti, ² "Katuke, u yeende kwa Ninive, wuna muzi mukaando, mmi uka wu waambire mulaeza weeti nni ku lawiire ku kawu vaha." ³ Lyiinu Joona nna ziima choku yeenda kwa Ninive choku kuteka Ireeza mulyinzwi lyaakwe. Mmi lyiinu Ninive wu vaalyi muzi mukaando a hulu, wu vaalyi ku woola ku yeendwa cho kuva lweendo lwa mazuva ootatwe. ⁴ Joona nna taanga ku injira mu muzi mmi chiinga kwa hita muku woola kuva lweendo lwe izuva lyi mwiina nna huwa cho kucho kuti, "Mu mazuva eena makumi oonne Nninve kaa ku maniiswa." ⁵ Vantu va Ninive nni vaa zumina Ireeza mane choku lawula kulyi nyima kwe zilyio. Mmi nni vaa zwaata zikatana, ku taanga ku mukulwaana ku yeenda vulyo mane mbwiita ku muniini vwaavo. ⁶ Lyilyahanu makande nni a ka waana simwiine wa Ninive. Mmi nna ziima muchipura, choku zavula chizavalo chaakwe, ku zwaaho nna zwaata chikatana, mane choku ikala nne mu itwe. ⁷ Mmi nna zwiisa mulaeza wuti, "Mwa Ninive, che itayero ya simwiine nne vasepahalyi vaakwe, saanzi kuvi muntu kamba chinyolozi, ingoombe nnaangati chilyerantu, cheeti chi soolye chimwe vulyo. Saanzi kuvi cheeti chilyie, nnaangati kunywa menzi. ⁸ Mmi a koonse vulyo muntu nne chinyolozi va zwaate zikatana mane va lyirire ku iwulu a hulu kwe Ireeza. A zumwe nne zumwe a zwe mu inzira zaakwe imbilaala mane nne mu ku ihaya kwiina mu mayaanza aakwe. ⁹ Njeeni yo wiizi? Mweendi Ireeza u woola ku voolyera mu masulye mane nne ku saanduka cho kuzwa mu vukalyi vo kuveenga kwaakwe kuti tu woolye kuhala saanzi tufwi." ¹⁰ Mmi Ireeza nna vona chi vaa panga, kuti chi vaa zwa mu inzira zaavo imbilaala. Ku zwaaho lyiinu Ireeza choku zimika vuvilaala vwa ava teere uvu va panga, nna a vu ziimika.