¹ Lyiinu joona naa rapera simwiine Ireeza waakwe kuzwa mu ivumu le inswi. ² Naacho kuti, Imme vulyo nni nna lyirira kwe Ireeza che ivaka lya masukuluka aangu mmi naa nni itava; ku zwa mu ivumu lye ihere nni nna lyira! mmi uuwe nni wa zuwa lyinzwi lyaangu! ³ Ka kuti uuwe uni soheere he ighala, mu inkulo ye iwate, mane nne kutiya kwa menzi nni kuni zimbulukite; masuunda oonse nne ku kapwantika nni zi hita he iwulu lyaangu. ⁴ Mmi nni naati, lyiinu aaha nji chi naa zwa ha vusu vwaako toota; nni ha kuva vulyo kani voolye hape nni lolye ku itempere yaako yi jolola.' ⁵ nna mina mu meenzi mane mbwiita kuni sika mu isiingo; iruuza ye iwate nni yani zingeera mu mutwi. ⁶ Nni nna a ya kuunsi toota lya maruundu; inkaanda nne ziiyazo zaayo nni zani iyalyira haanze koonse koonse. Mmi nni ha kuva vulyo nni waa nni haza kuzwa mu ikuumbu, Simwiine, Ireeza waangu! ⁷ 7 Mmi luhuho lwaangu chiinga lwa kosoka mukati, nni nna kumbulukwa Ireeza mu italuhanyo yaangu; ku zwaaho itapero yaangu nni yeeza kwaako, mu itempere yaako yi jolola. ⁸ Aavo va teeka tuunga ve Ireezazana tu seena musula va kaana ku sepahala kwaako ku valyi veene. ⁹ Mmi cho kuya chaangu iime vulyo, kani ku zwiisikiza chitavero nne che lyiinzwi lyo vuitumero; kani pangahaze chini vaa koonki. Vuhalo vuzwa kwe Ireeza!" ¹⁰ Ku zwaaho Ireeza nna waamba nne inswi, mmi nni ya ka lukira Joona ha chiinkaanza.