¹ Lyiinu lyinzwi lye Ireeza nni lyeeza kwa Joona mwaanaswiisu wa Imitayi, nni lyiti, ² "Ziime uye kwa Ninive, wuna muzi mukaando, u kawu kalyimere, ka kuti vuvilaala vwaavo chi vweeza ku sika ha vusu vwaangu." ³ Mmi Joona iiye choku katuka choku ngombweera kwa Tarashishi kuzwa ha vusu vwe Ireeza. Mane cho kuya kwa Jopa kwa ava ka waani chisepe chi vaalye kuya kwa Tarshishi. Lyiinu naa ruwerera musipiri wa teni, ku zwaaho choku ichira kuti a yeende naavo kwa Tarashsishi, kuzwa ha vusu vwe Ireeza. ⁴ Mmi Ireeza naa tuminiza luhuho lukaando ahulu maaswe mu iwate mane choku vuusa masuunda makaando a hulu hape mu iwate. Muku vaalyi ku chita mane iiri chisepe muchi ngaatuke. ⁵ Lyiinu va veresi ve chisepe choku shaala chi valyi kalyilyiirwa mane zumwe nne zumwe waavo nna lyirira kwe ireeza-zana waakwe. Choku taanga nni va sohweerera ziviea zaavo mu iwate ku chitira kuti mweendi chisepe muchi huvahalye.Mmi Joona iiye cha ava ke injiire mukatikati ke chisepe toota, kwa teni ko kooko nna laala choku sukula a hulu. ⁶ Lyiinu mulaulyi we chisepe cho kuiiza kwaalyi choku mucho kuti, "Njo u panga nzi cho u lyeere voovo vuti? Ziime! Rapere ireeza waako! Mbwesha-mbwesha ireeza waako cho u woola kutu teeka ku zwaaho choku vula kufwa." ⁷ Voonse choku zumiinzaana kuti, "Muiize, tu kave indawula, tu vone nandi njeeni iiye uuzu yo utu lyeeteere uuvu vuvilaala vutu pangahalyiire." Mmi nni va kava indawula, mane nni za woonda Joona. ⁸ zwaaho nni vaacho Joona kuti, "Tuku kumbiira tu lwiire kuti njeeni siku chita uuvu vuvilaala vutu pangahalyiire. Musevezi waako chinzi, nne ko u zwa u zwa kuhi? U zwa kwe yihi inkaanda, mane nne kuti u muntu nzi?" ⁹ Joona choku vacho kuti, "Nni Muhevera; mane nni tiya Ireeza, Ireeza we iwulu, ya ava pangi iwate nne inkaanda yi zumite." ¹⁰ Ku zwaaho aava vakwaame nni vaa shaala valyi kalyilyiirwa mane cho kucho Joona kuti, "Lyiinu uuwe nni waa chita vulye hape?" Aava vakwaame nni vaa lyemuha ha aka tiite ha vusu vwe Ireeza, ka kuti cha ava va lwiirite. ¹¹ Ku zwaaho nni vaacho Joona kuti, "Tuku chite vulye kuchitira kuti iwate chilyi tu toontolyera?" Ka kuti iwate nni lya ava nnilyi kalyihira ku vusu. ¹² Joona choku vacho kuti, "Muni nyemune muni ziindire mu iwate. Ku zwaaho iwate njeeti lyi woolye kumu toontolyera, ka kuti nniizi, nji che ivaka lyaangu kuti ku kwiina masuunda nne luuho lukaando vuti lu mu pangahalyiire." ¹³ Nniha kuva vulyo, vakwaame nni vaa lyika ku zuhira ku irizo, mmi nni vaa kaangwa che ivaka lye iwate lyi chilyi va vaa kalyihiire a hulu maaswe. ¹⁴ 14 Lyiinu mpuva lyiriire kwe Ireeza ni vati, Tuku kumbiira, uuwe Ireeza, tuku kumbiira, saanzi utu ihayi che ivaka lyo vuhalo vo uuzu mukwaame, mane saanzi utu viiki mulaandu wo kufwa kwaakwe he iwulu lyeetu, che ivaka lyaako Ireeza ka kuti waa panga chiku saangisa." ¹⁵ Lyiinu mpuva hindiire Joona cho ku mu sohera mu iwate, mmi iwate nni lyaa toontola mu vukalyi vwaalyo. ¹⁶ Ku zwaaho aava vakwaame mpuva tiyiire Ireeza ku zambiriza. Nni vaa zwiisikiza nne ku pangira Ireeza zitavero mane nne ku mu sepisa isepiso. ¹⁷ Mmi lyiinu Ireeza cha ava vaakeenya inswi inkaando kuti zeyi mine Joona, mane Joona nna ava mu ivumu lye inswi mazuva ootatwe nne masiku ootatwe.