¹ Hairi unwe, muvafwiire mukuluta mulao ne muzivi zeenu. ² Avalyi chezweezi zimuvalyi kuchita kuti muyende munzira ze yinu inkaanda. Muvalyi kuchita kuya cho mulao wo muvuso o muluhuho. Ulu ndoluhuho luteeda muvaana valuta mulao. ³ Naaswe tuvoonse imwi inako tuvaalyi kuhala naavo vasazumini. Tuvalyi kuchita kuya chokusuna kwee inyama. Tuvalyi kuchita kusuna kwe inyama ne muhupulo. Chokuzaalwa tuvalyi tuvakalyi chiina mbavamwi. ⁴ Kono Ireeza mukuti uhumine iinse ze irato lyaakwe ikaando lya vatusuni chaalyo. ⁵ Ha tuvafwiire muchivi, naatulyeeta kuvuhalo vuhya cha Kirisiti. Ivaka lya matohonolo chiingi muvaahazwa. ⁶ Ireeza ava tunyemuni haamwiina naatuchita kuti tuve haamwiina muzivaka zo kwiiwulu cha Kirisiti Jeeso. ⁷ Ava chiti vuti kuti munako zikeeza na tutoondeza vuhumi vukaando vwa matohonolo azwa waalyi. Utu toondeza iizi che inzira yo kushiyama kwaake cha Kirisiti Jeeso. ⁸ Mmi chamatohonolo muvahazwa che itumero, mmi ichi kana chivazwi kweenu, inewo ye Ireeza. ⁹ Kaheena cho muteendo kaanzi kuvi ne yolyiteemba. ¹⁰ Mukuti tu muteendo we Ireeza, tuva vuumba cha Kirisiti Jeeso kuchita zishiyeeme zituva vaakanyezwa ne Ireeza kalyekalye uuko, kuti tuyeende chaazo. ¹¹ Chikwina vulyo muzeze kuti kalye muvalyi ve inkaanda che inyama. Nimusumpwa " vasena mumupato" isuumpwa mupato we inyama ivachitwa chamaanza a vaantu. ¹² Mukuti cheeyo inako muva zwiisizwa kwa Kirisiti. Muvalyi mu mabukweenda muvaantu va Isiraele. Muvalyi muveene muze chilyikani ze isepiso. Ni musena isepo muzisikeeza. Kana mveena Ireeza munkaanda. ¹³ Lyinu cha Kirisiti Jeeso unwe muveena kulye ne Ireeza imwi inako muvalyetwa hafwihi ne Ireeza cha malaha a Kirisiti. ¹⁴ Mukuti nje chisemo cheetu. Ava chiti vovere kuva umwiina. Che inyama yaakwe ava sinya imota lyivalyi kutu kauhanya, lye chitoyo. ¹⁵ Ava manisa mulao wo kulawula ne wo kuyeenza kuti awolye kuvumba muntu muhya mwaalyi. Ava chiti chisemo. ¹⁶ Ava chiti ichi kuvozekeza vaantu voonse mumuviri umwiina kwe Ireeza che chifapano. Che chifapano manisa chitoyo. ¹⁷ Jeeso aveeza kuruta maanzwi e chisemo kweenu muvena kulye ne chisemo ku vaveena hafwihi. ¹⁸ Mmi cha Jeeso tuvoonse twiina iswanero cho luhuho lumwiina kwe Isheetu. ¹⁹ Lyinu hanu, unwe venkaanda kamusiri mu mabukweenda ne veene. Lyinu chimuvantu vamwiina ne vana vaviikiirwa hembalyi ve Ireeza ne vaantu vo munzuvo ye Ireeza. ²⁰ Muva zaakwe ha matangiro a va apositola ne va porofita. Kirisiti Jeeso iye mwiine nje pinahalyi. ²¹ Chaalyi muzaako oonse uwondinsana ne kukula niilyi itempere mwa Simwiine. ²² Chaakwe naanwe chiingi muvazaakwa haamwiina siina chivaka chovwikalo che Ireeza cho Luhuho.