¹ Paulusi, muapositola wa Kirisiti Jeeso cho kusuna kwe Ireeza, ku vaantu ve Ireeza vasepahala mwa Ifesasi ne veena vusakusima kwa Kirisiti Jeeso. ² Matohonolo ave kweenu ne chisemo chizwa kwe Ireeza Isheetu ne Simwiine Jeeso Kirisiti. ³ Kuteembwa Ireeza weetu iisi Simwiine Jeeso Kirisiti, yava tutohonolofaza cho luhuho loonse lwiina kwiwulu mwa Kirisiti. ⁴ Ireeza ava salyi haakwe kuzwa kumatangiro e inkaanda, kuti tujololye ne kuvula mulandu mumenso aakwe. ⁵ Ireeza ava tuvaakanyeza kuang'ulwa siina tuvaana vaakwe cha Jeeso Kirisiti, kuya chokusuna kwaakwe. ⁶ Ku ang'ulwa kweetu kumanina muku muteemba kuveera kwe chisemo chaakwe chavatuhi mahala muvumwiina Vaakwe ya suni. ⁷ Cha Jeeso Kirisiti tuva hululwa cha malaha aakwe ne kuwoonderwa zivi zeetu, kuya cho vuhumwi vwa matohonolo aakwe. ⁸ Avatuhi matohonolo maangi cha maanoezulyire ne kuzuwisisa. ⁹ Ireeza ava tutoondeza maikaerero o kusuna kwaakwe avalyiwungwire, kuya chokusuna kwaakwe, ne chava toondeza mwa Kirisiti. ¹⁰ Muteendo wa Kirisiti ivaalyi kuvakanyeza inako yoose imanininine, kulyeeta ziintu zoonse hamwiina, ziintu zoonse zina kwi wulu ne munkaanda, kuunsi lyo mutwi uumwiina, mane ne Kirisiti. ¹¹ Mwa Kirisiti tuvasalwa kuva vaswaana. Tuva zezererwa kuntaanzi kuya cho muteendo waakwe iye yo chita chimwi ne chimwi kuya chamaikaerero o kusuna kwaakwe. ¹² Ireeza avatusalyi vaswaana kuti tuve ventaanzi kuva ne sepo imaniine mwa Kirisiti, kuti tuve tuvateembi vo kujolola kwaakwe. ¹³ Mwa Kirisiti, uunwe naanwe, ngamwazuwa maanzwi ovusakusima, ivangelyi yo kuhazwa kweenu, mmi ni mwazumina kwaalyi, mmi ni mwaasinkwa che isepiso yo Luhuho Lujolola. ¹⁴ Luhuho Lujolola nje isepiso yo vuswa bweetu mbwiita hakuti chituwoola kulyi woonderera muvulyi, mu kuteemba ko kuveera kwaakwe. ¹⁵ Cheeri ivaka, kuzwa hani vazuwiiri kaha itumero yeenu mwa Simwiine Jeeso ne irato lyeenu kuvaantu ve Ireeza va varumeri, ¹⁶ Kana ni vaazimiki kulyitumera kwee Ireeza cheenu moona Muni misumpa mu mirapero yaangu. ¹⁷ Ni rapera kuti Ireeza wa Simwiine Jeeso Kirisiti, Taayo wo kuveera, kamihe luhuho lwa maano ne kutoodezwa kuti mu mwiizive. ¹⁸ Ni rapera kuti meenso ee inkulo zeenu eewulwa, kuti mwiizive vusakusima vwaava misumpiri ne buhumi vweeti ni vaswaane varumeri voonse. ¹⁹ Mmi mu mirapero yaangu Ni kumbira kuti mwizive vukaando vusena chirikanyo ve ziho zaakwe kweetu tuzumina, kuya cho vukaando vwaakwe kuku teenda. ²⁰ Iizi nzeziho ziswana zava teendesa Ireeza kuku vuusa Kirisiti kuvafu naa mwikalyika kwiiyaanza lyaakwe lya malyo muzivaka zo kwiiwulu. ²¹ Ne ikalyika Kirisiti kwiiwulu lye milao yoonse ne mivuso ne valaulyi ne inkaanda yoonse, ne iizina lyimwi ne lyimwi liva wulyikwa. Kirisiti keeti navusa vulyo mweeyinu innako, kono ne munako ikeeza. ²² Ireeza ava viiki ziintu zoonse kuunsi lya mateende a Kirisiti mmi namuha ikereke kuti aave mutwii we ziintu zoonse. ²³ Ikereke njo muviri waakwe, iye wizwiire muziintu zoonse.