¹ Chee inu inzira, unwe vakulwaakazi mu sesetwa mu lyi neere ku va muihyeenwaanwe .Mu chite vuti mane nandi va Mukeenu ka va teeki lyinzwi.Va woola ku woolwa ni ku seena lyinzwi che ikute lyi va muihyaavwaavo. ² Mu kuti ka va ku vweene vusakusima mu ikute lyaavo. ³ Sanngi mu lyi chiti vulotu vwa hanze che: ku luka isunki, che mavwe e igauda, nandi zizwaato ze iyo inako. ⁴ Mmi mu chite ku zwa kunsi lye nkulo zeenu,ne vulutu vu saa mani vo luhuho lu shiyeeme mane ni lu tontorwe lu sakahala ha vusu vwe Ireeza. ⁵ Vakulwakazi va jolola va va lyi ku lyi wonda che inu inziza,Va va sepete mwe Ireeza mane ne ku lyi neera ku va mukaavo. ⁶ Che inzira iswana Sara a va teeki Aburahama cho ku mu sumpa simwiine.Mu vaana vaakwe cho kuti mu chita zi shiyeeme mane ne mu saa tiyi vukaavo. ⁷ Mu inzira iswana uunwe mu vakwaame mu halye ne va mukeenu cho kutaluhanya, kuti vakulwaakazi chivya chi saa kolyete. Mu va kuteke naavo neeri va lya vuswa vwe ineo yo vuhalo.Mu chite ichi kuti itapero zeenu zi tavwa. ⁸ Cha mamanimani, mu vonse mu ve ne nngana i swana, mu fwiire inse,mu lyi sune iri vantu va haa mwiina, inkulo indotu, ne ku lyi twaala hansi. ⁹ Siye ku voolyeza vuvi mu vuvi,ku tukana mu ku tukana.Kunze lya vulyo, mu zwiirire cho ku sehuhaza,mukuti chi mu vaa sumpirwa, kuti mu woolye ku waana matohonolo. ¹⁰ Iye yoo u saka ku suna vuhalo ne ku vona mazuva malotu a ziimike lulyimi lwaakwe mu vu vilala, ne kaholo kaakwe ku wamba iziyezo. ¹¹ A zwe mu vuvilaala a chitahaze zi shiyeeme.A sake ikozo mane a ichitahaze. ¹² Menso a Simwine a vona va Shiyeeme, ne matwi aa kwe a zuwa ku kumbira kwaavo.Mmi chifateho che Ireeza ka chi zuminzani ne vantu va chiita vuvilala. ¹³ Njeni yoo u wola ku mu sasamisa cho kuti mu saka ku chita vulotu? ¹⁴ Cho kuti mu nyanda che ivaka lyo ku shiyama, mwiina mu mikonde. Musiye ku tiya zi va tiya. Mu siye ku katezeha. ¹⁵ Mmi, mu viikire Jeeso Kirisiti he mbalyi mu inkulo zeenu naa jolola. Mu ikalye ne mu lyi tukiseeza kuti mu itave umwi no umwi yoo mu vuuza kuti chinzi ha mu kozeeza mwe Ireeza, mu chite vuti che ku lyi twaala hansi ne che ikute. ¹⁶ U ve ne vuhalo vulotu kuti vantu va nyansa vuhalo vweenu vu mwiina naavo mwa Kirisiti va fwe nsoni mu kuti va mu twaala isuvi iiri mu vantu va chita vuvilaala. ¹⁷ Kwiina vutuka kuti,cho kuti Ireeza, u saka, mu nyandisezwa ku chita vulotu nsinyi vuvilala. ¹⁸ Kirisiti naaye a vaati naa nyandisezwa zivi,Iiye yoo u shiyeeme a va tu nyandiri,uuswe tu va vilaala, kuti a tu lyeete kwa Ireeza.A va ihaiwa mu nnyama,mmi a vaa hazwa cho Luhuho. ¹⁹ Cho Luhuho , a vaa yendi naa ka kutaza ku nhuho ziina mu ntorongo hanu. ²⁰ Ka heena va vaalyi ku teeka mu inako ye inkulonde ye Ireeza chi yi va lyindiire mu mazuva a Nuwa,mu mazuva o ku zaaka iareka,mmi Ireeza a vaa vuluki vachezana- inhuho zi wonda iyanza ne too tatwe -ku zwa mu menzi. ²¹ Iichi nje chishupo che ikolovezo imii vuluka hanu-iinsinyi yo ku shanza ikwe mu muviri, mmi neeri ku lyi wambirira kwe ingana i shiyeeme kwa Ireeza- cho ku vuuswa kwa Jeeso Kirisiti. ²² Kirisiti wiina ku iyaanza lya malyo lya Ireeza. A va injiri mu iwulu. Mangiloyi, vuhitizi, ne ziho zi swanera ku mu fukamina