¹ Lyinu mu viikire vu vilaala voonse ku imbalyi, kuziyeza koonse, vuitmukanyi, kulakamina, nne koonse ku twaala isuvi. ² Siina iiri vachiche va nyonka, muzwiire inkulo muziriri wo luhuho, kuti chaawo mu kulyire mu ku hazwa, ³ haiva mu vaa lyikeri nne ku iziva kuti Simwiine u shiyeme. ⁴ Muiize kwaalyi iiye ivwe lyi hala lyi vaa kaanwa nne vantu, mmi lyi va salwa nne Ireeza nni lyi sakahala ahulu kwaalyi. ⁵ Mmi naanwe mu swana mane iiri mavwe a hala a kweete a zaakwa kuti ive inzuvo yo luhuho, kuti kuve nne chiruti chi jolola chi zwiisa zitavero zo luhuho zi tambulyeseha kwe Ireeza cha Jeeso Kirisiti. ⁶ Ku waanika iichi mu ivuuka: ''Mu vone, nni viika ivwe lya mawonderero mwa Siyona, lyi salyitwa nni lyi sakahala. Zumwe nne zumwe yo zumina kwaalyi keeti nna fwe insoni.'' ⁷ Ku kutekwa che nje kweenu uunwe mu zumina. Mmi, ''ivwe lyi va kanwa nne vazaasi, nji chi lyaava ivwe lyi sakahala a hulu''-- ⁸ mane, ''nne ingomwe lyo ku chuunchuna nne ivwe lyo ku chuunchuna.'' Va chuunchuna, va saa kuteki lyiinzwi, kuva vaa lukeere kuti voonse veeze. ⁹ Mu vantu mu salyitwa, vo luzuvo lo vusimwiine lwe chipurisita, mu inkaanda yi jolola, vantu ve Ireeza, kuti mu woolye ku waamba zintu zilotu zikomosa zaakwe iiye a va mu suumpi kuzwa mu keerima choku mu lyeeta mu iseri lyaakwe lyi kumosa. ¹⁰ Lwe taanzi ka heena mu vaalyi mu vantu, lyiinu hanu che mu vantu ve Ireeza. Ka heena mu va tambulyi inse, lyiinu hanu chi mu va tambulyi inse. ¹¹ Vasunitwa, nni waamba nnaanwe siina vayenzi nne vayembaani kuti muzwe mu itakazo ze inyama, zi lwisanisa ihuho zeenu. ¹² Mu lukeera ku lyi woonda che ikute ku vantu ve nkanda, kuti ha va, wamba cheenu, kuti mwa panga zintu zi saa shiyeeme, va vone misevezi yeenu milotu choku temba Ireeza mu izuva lyo kuiiza kwaakwe. ¹³ Mu chitahaze chimwi ne chimwi chi zwa ku vahitizi va vantu che ivaka lye Ireeza. Mu chitahaze za simwiine neeri iye mukando cha maziimo aakwe, ¹⁴ mane koonse vulyo ne vavusi, va ka tumitwa kuiiza ku watula va panga vu vilaala nne ku teemba va panga vulotu. ¹⁵ Iichi ku suna kwe Ireeza, kuti cho kupanga vulotu mu toonteze ku wamba zi holohete kwa vantu va lyi lyangeenya. ¹⁶ Iiri vantu va sumunukite, mu siye ku teendesa ku sumunuka kweenu kuva chiipato cho ku panga vuvilaala, mmi mu swane iiri vahikaana ve Ireeza. ¹⁷ Mu kuteke vantu voonse. Mu sune ku halyinsaana siina vantu va zaalwa ha mwiina. Mu tiye Ireeza. Mu kuteke simwiine. ¹⁸ Vahikaana, mu lyineere ku vanfumweenu che ikute lyoonse. Mu siye ku lyineera vulyo ku va vanfumweenu vashiyeeme ni veena luwolyiso, mmi koonse vulyo ne ku veena lunya. ¹⁹ Ka kuti chintu chi tembeka haiva muntu zumwi u woola ku zimanina ku sasamiswa neena mu manyando a saa lyivaheene che ivaka lye ku iziva Ireeza. ²⁰ mu voolyerwa nzi mu ku chita chivi mane cho ku zimanina ku nyaandiswa? Mmi haiva mu vaa pangi vulotu ku zwaaho cho ku sasamiswa mu ku nyaandiswa, ichi chintu chi teembwa kwe Ireeza. ²¹ Ka kuti nchoochweechi chi mu vaa suumpirwa, mukuti Kirisiti naaye a va mu nyandiri. A va mu siiri chishupo kuti mu shaalye mutala waakwe mu masulye ²² Ka kwiina chivi chaava pangi, mane nandi kuziyeza ku va waaniki mukalomo kaakwe. ²³ Chi va kwete ku mu nyansa, ka heena a va vozeekeza kanyanso.Cho u nyanda, ka heena a va va voozekeza cho ku vakalyiza, mmi iiye nna a lyi viika kwaalyi iiye yoo watula nenza. ²⁴ Iye mwiine a va hindi zivi zeetu mu muviri waakwe ku ya ku chisamu, ku chitira kuti tu zwiiririre mu chivi,ne kuti tu halyire ku jolola. Che ziravi zaakwe tu va hozwa. ²⁵ Mu vonse vulyo mu vaalyi ku yembaana mane iiri imberere zi zovete, mmi lyiinu hanu mu va ka voolyi ku mulyisani mane ne mutokomezi we inhuho zeenu.